Ilezi 119:1-176
-
Edẹro kẹ ẹme Ọghẹnẹ nọ ọ rrọ ghaghae
א [Alẹf]
119 Jọ eva e were enọ i bi yeri uzuazọ nọ o kare afuẹwẹ,*Enọ i bi koko uzi Jihova.+
2 Jọ eva e were enọ i bi ru lele ekareghẹhọ riẹ,+Enọ e be rọ udu rai kpobi gwọlọ iẹe.+
3 A bi ru umuomu ovo ho;A be nya evaọ idhere riẹ.+
4 Who jie uziInọ a romatotọ koko ijaje ra.+
5 Dodokọ me re dikihẹ ga ẹsikpobi*+Re me koko ijaje* ra!
6 Me te ru ere, a gbe ru oma vuọ omẹ hẹ+Okenọ me te bi roro kpahe ijaje ra kpobi.
7 Mẹ te rọ udu nọ u kiete jiri owhẹOkenọ me te bi wuhrẹ iziẹibro ikiẹrẹe ra.
8 Me ti koko ijaje ra.
Ivie, whọ siọ omẹ ba riẹriẹriẹ hẹ.
ב [Bet]
9 Ẹvẹ ọmoha ọ sai ro ru edhere riẹ fo ẹsikpobi?
Ẹkwoma ẹme ra nọ o re ro su* oma riẹ.+
10 Mẹ be rọ udu mẹ kpobi gwọlọ owhẹ.
Whọ kuvẹ re me ghoro siọ ijaje ra ba ha.+
11 Mẹ jọ udu mẹ rehọ ẹme ra ghaghae*+Re mẹ siọ uzi ra ba ẹraha.+
12 Ujiro u te owhẹ, O Jihova;Wuhrẹ omẹ ijaje ra.
13 Mẹ rọ igbenu mẹ taIziẹibro ra kpobi nọ who whowho via no.
14 Ekareghẹhọ ra i bi ru omẹ ghọghọ+Vi eware eghaghae efa kpobi.+
15 Mẹ te romatotọ roro kpahe* ijaje ra+Jẹ tẹrovi idhere ra.+
16 Izi ra e rẹ were omẹ gaga.
Ẹme ra ọ rẹ thọrọ omẹ ẹro ho.+
ג [Gimẹl]
17 Riẹ odibo ra ru ziezi,Re mẹ jọ uzuazọ je ru lele ẹme ra.+
18 Rovie aro mẹ re mẹ ruẹ ude zieziRe mẹ ruẹ eware igbunu nọ e rrọ uzi ra vevẹ.
19 Mẹ yọ ọrara evaọ ẹkwotọ na.+
Whọ kuọ ijaje ra dhere omẹ hẹ.
20 Me* wo isiuru egagaRọkẹ iziẹibro ra ẹsikpobi.
21 Whọ rẹ whọku ahwo omorro,Enọ a bọwo ehao, nọ i bi ghoro siọ ijaje ra ba.+
22 Si omẹ no ẹpoviẹ gbe orivo,*Keme me bi ru lele ekareghẹhọ ra.
23 O tẹ make rọnọ ikpahwo-esuo a keria be ta eme iyoma kpahe omẹ,Odibo ra ọ rẹ romatotọ roro kpahe* ijaje ra.
24 Ekareghẹhọ ra e rẹ were omẹ gaga;+Eye e be kpọ omẹ.*+
ד [Dalẹt]
25 Me kiẹzẹ* ẹkpẹ.+
Siwi uzuazọ mẹ wọhọ epanọ whọ ya eyaa riẹ.*+
26 Mẹ vuẹ owhẹ kpahe idhere mẹ, who te fiobọhọ kẹ omẹ;Wuhrẹ omẹ ijaje ra.+
27 Ru omẹ wo otoriẹ ijaje* ra,Re mẹ ruẹse romatotọ roro kpahe* iruo igbunu ra.+
28 Mẹ* be sae wezẹ hẹ fiki uweri.
Kẹ omẹ ẹgba wọhọ epanọ whọ ta.
29 Thọ omẹ no edhere eviẹhọ,+Rri omẹ aro re who wuhrẹ omẹ uzi ra.
30 Mẹ salọ nọ me re yoẹme kẹ owhẹ ẹsikpobi.*+
Me vuhumu nọ iziẹibro ra i kiehọ.
31 Mẹ talamu ekareghẹhọ ra.+
O Jihova, whọ jọ omẹ vioja ha.*+
32 Mẹ te rọ ọwhọ koko* ijaje raKeme whọ ruẹrẹ oria họ kẹ onana no evaọ udu mẹ.*
ה [[He]
33 O Jihova, wuhrẹ omẹ+ edhere ijaje ra,Mẹ vẹ te nyae te oka.+
34 Kẹ omẹ otoriẹ,Re mẹ ruẹsi koko uzi raRe mẹ rọ udu mẹ kpobi koko iei.
35 Su* omẹ nya edhere ijaje ra,+Keme o rẹ were omẹ gaga.
36 Kpọ udu mẹ rri ekareghẹhọ ra,Orọnikọ uvou-uthei hi.*+
37 Si ibiaro mẹ no eware nọ i fioka ha nọ me re rri;+Siwi uzuazọ mẹ evaọ edhere ra.
38 Ru eyaa* ra gba kẹ odibo ra,Re a ruẹse dhozọ ra.*
39 Thọ omẹ no oware omovuọ nọ ozọ riẹ u bi mu omẹ gaga na,Keme iziẹibro ra i woma.+
40 Rri epanọ ijaje ra i bi si omẹ urru.
Rehọ ẹrẹreokie ra siwi uzuazọ mẹ.
ו [Whọọ]
41 Dhesẹ uyoyou ra nọ o rẹ hiẹ hẹ kẹ omẹ, O Jihova,+Jọ esiwo ra o te omẹ obọ wọhọ epaọ eyaa* ra;+
42 Kẹsena mẹ vẹ te kpahe ẹme kẹ ọnọ ọ be poviẹ omẹ na,Keme me fievahọ ẹme ra.
43 Ivie who si ẹme uzẹme no unu mẹ riẹriẹriẹ hẹ,Keme me fi ẹruore mẹ họ* oziẹobro ra.
44 Me ti koko uzi ra kẹse kẹse,Bẹdẹ bẹdẹ.+
45 Yọ mẹ te nya evaọ oria omofọwẹ,*+Keme mẹ be gwọlọ ijaje ra.
46 Mẹ te jọ aro ivie ta kpahe ekareghẹhọ ra,Yọ oma o te vuọ omẹ hẹ.+
47 Ijaje ra e were omẹ gaga,Ẹhẹ, me you rai.+
48 Mẹ te kpare abọ mẹ kpehru fiki ijaje ra, enọ e were omẹ gaga na,*+Yọ mẹ te romatotọ roro kpahe* ijaje ra.+
ז [Zayin]
49 Kareghẹhọ ẹme nọ whọ ta* kẹ odibo ra,Onọ whọ rọ kẹ omẹ ẹruore.*
50 Onana họ oware nọ o be kẹ omẹ omosasọ evaọ oja-oriọ mẹ,+Keme ẹme ra o siwi uzuazọ mẹ no.
51 Ahwo omorro a be rọ omẹ jijehwẹ,Rekọ mẹ rẹ nyasiọ uzi ra ba ha.+
52 Mẹ kareghẹhọ iziẹibro ra nọ e rrọ anwọ oke krẹkri ze,+ O Jihova,Yọ e be kẹ omẹ omosasọ.+
53 Ofu o bi mu omẹ gaga fiki ahwo omuomu na,Enọ e nyasiọ uzi ra ba.+
54 Ijaje ra mẹ be rọ so ileEvaọ oria kpobi nọ mẹ be rria.*
55 Mẹ rẹ kareghẹhọ odẹ ra evaọ aso, O Jihova,+Re mẹ ruẹsi koko uzi ra.
56 Onana họ oware nọ mẹ be hai ruKeme me bi koko izi ra.
ח [Hẹt]
57 Jihova họ ẹkẹ mẹ;+Mẹ ya eyaa nọ me re ru lele eme ra.+
58 Mẹ rọ udu mẹ kpobi lẹ owhẹ;*+Rri omẹ aro+ wọhọ epaọ eyaa* ra.
59 Mẹ kiẹ idhere mẹ riwi,Re mẹ ruẹse kpọ awọ mẹ zihe ziọ ekareghẹhọ ra.+
60 Me re ru ovovẹrẹ re me koko ijaje ra,Mẹ rẹ raha oke he.+
61 Ifi ahwo omuomu e wariẹ omẹ họ,Rekọ uzi ra o thọrọ omẹ ẹro ho.+
62 Mẹ rẹ kpama evaọ udevie aso re me yere owhẹ+Fiki iziẹibro ikiẹrẹe ra.
63 Mẹ yọ ogbẹnyusu ohwo kpobi nọ ọ be dhozọ raGbe enọ i bi koko ijaje ra.+
64 Uyoyou ra nọ o rẹ hiẹ hẹ, O Jihova, o da otọakpọ na fia;+Wuhrẹ omẹ ijaje ra.
ט [Tet]
65 Whọ riẹ odibo ra ru ziezi,O Jihova, wọhọ epanọ whọ ta.
66 Wuhrẹ omẹ emamọ areghẹ gbe eriariẹ,+Keme me fievahọ ijaje ra.
67 Taure me te ti mu oja họ ẹre, mẹ jẹ hae nyathọ,*Rekọ obọnana me bi ru lele ẹme ra.+
68 Who woma,+ yọ iruo ra i woma.
Wuhrẹ omẹ ijaje ra.+
69 Ahwo omorro a gu erue ruru omẹ,Rekọ mẹ be rọ udu mẹ kpobi koko ijaje ra.
70 Udu rai u re brukpe ai hi,*+Rekọ uzi ra o rẹ were omẹ gaga.+
71 U woma inọ a gboja kẹ omẹ,+Re mẹ ruẹsi wuhrẹ ijaje ra.
72 Uzi nọ who jie u woma kẹ omẹ,+U woma vi ewẹ igoru gbe isiliva idu buobu.+
י [Yod]
73 Abọ ra whọ rọ ma omẹ jẹ ruẹrẹ omẹ họ.
Kẹ omẹ otoriẹ,Re mẹ ruẹsi wuhrẹ ijaje ra.+
74 Enọ e be dhozọ ra a tẹ ruẹ omẹ a rẹ ghọghọ,Keme ẹme ra họ ẹruore mẹ.*+
75 Mẹ riẹ, O Jihova, inọ iziẹibro ra i kiẹrẹe+Gbe nọ fiki ọtẹruo ra who ro gboja kẹ omẹ.+
76 Ivie jọ uyoyou ra nọ o rẹ hiẹ hẹ+ o sasa omẹ oma,Wọhọ epanọ whọ ya eyaa riẹ* kẹ odibo ra.
77 Re ohrọ mẹ re mẹ ruẹse gbẹ jọ uzuazọ,+Keme uzi ra o were omẹ gaga.+
78 Jọ a kpomovuọ họ ahwo omorro oma,Keme a bi ru omẹ thọ gheghe gheghe.*
Rekọ mẹ te romatotọ roro kpahe* ijaje ra.+
79 Jọ enọ e be dhozọ ra a zihe bru omẹ ze,Enọ e riẹ ekareghẹhọ ra.
80 Jomẹ rehọ udu mẹ kpobi* ru lele ijaje ra,+Re a gbe ru oma vuọ omẹ hẹ.+
כ [Kaf]
81 Me bi rẹro esiwo ra gaga,*+Keme ẹme ra họ ẹruore mẹ.*
82 Ibiaro mẹ i bi rẹro ẹme ra+Yọ mẹ be ta nọ: “Oke vẹ whọ te rọ sasa omẹ oma?”+
83 Keme mẹ wọhọ ẹkpa oviẹ-arao nọ iwiri e ya fia no,Rekọ ijaje ra e rẹ thọrọ omẹ ẹro ho.+
84 Bro edẹ odibo ra ọ te hẹrẹ?
Ẹdẹ vẹ who ti ro bruoziẹ kpe ahwo nọ a bi kpokpo omẹ?+
85 Ahwo omorro a tọ egọdọ fihọ kẹ omẹ,Enọ e be wọso uzi ra.
86 A rẹ sai fievahọ ijaje ra kpobi.
Ahwo a bi kpokpo omẹ gheghe gheghe; fiobọhọ kẹ omẹ!+
87 Omojọ u kiọkọ, a je ti kpe omẹ no otọakpọ na no,Rekọ mẹ nyasiọ ijaje ra ba ha.
88 Sẹro uzuazọ mẹ fiki uyoyou ra nọ o rẹ hiẹ hẹ,Re mẹ ruẹsi ru lele ekareghẹhọ ra.
ל [Lamẹd]
89 Ẹme ra, O Jihova,Ọ te jọ bẹdẹ bẹdẹ evaọ obọ idhiwu na.*+
90 Ọtẹruo ra ọ rẹ jọ evaọ ige na kpobi.+
Whọ ma otọakpọ na gaga kothi, oyejabọ nọ ọ gbẹ rọ rrọ na.+
91 Iziẹibro ra e soriẹ ze nọ e* gbẹ rọ rrọ rite inẹnẹ na,Keme aikpobi yọ idibo ra.
92 O gbẹ rrọ uzi ra nọ o be were omẹ hẹ,Enẹ yọ me whu kufiẹ no fiki oja nọ mẹ be re.+
93 Ijaje ra e te thọrọ omẹ ẹro vievie he,Keme eye who ro siwi uzuazọ mẹ.+
94 Whẹ họ ọnọ o wo omẹ; siwi omẹ,+Keme mẹ kiẹ gwọlọ ijaje ra.+
95 Ahwo omuomu a be hẹrẹ re a kpe omẹ no,Rekọ me bi muẹrohọ ekareghẹhọ ra ziezi.
96 Mẹ ruẹ no inọ oware ogbagba kpobi u wo umuo,Rekọ ujaje ra u wo umuo ho.*
מ [Mem]
97 Uzi ra o were omẹ* kẹhẹ!+
Mẹ rẹ romatotọ roro kpahe* iẹe ẹsikpobi.*+
98 Ujaje ra u ru omẹ wo areghẹ vi ewegrẹ mẹ,+Keme o rrọ kugbe omẹ bẹdẹ bẹdẹ.
99 Me wo orimuo* vi iwuhrẹ mẹ kpobi,+Keme mẹ be romatotọ roro kpahe* ekareghẹhọ ra.
100 Me wo areghẹ* vi ekpako soso,Keme me bi koko ijaje ra.
101 Mẹ se inọ mẹ rẹ nya edhere omuomu ọvuọvo ho,+Re mẹ ruẹsi ru lele ẹme ra.
102 Mẹ rẹ nyasiọ iziẹibro ra ba ha,Keme who wuhrẹ omẹ no.
103 Eme ra e rẹ were unu* mẹ gaga,E tubẹ mere vi ọnyọ evaọ unu mẹ.+
104 Ijaje ra e be lẹliẹ omẹ rọ otoriẹ ru eware.+
Oyejabọ nọ me ro mukpahe edhere ọrue kpobi.+
נ [Nun]
105 Ẹme ra yọ ukpẹ rọkẹ owọ mẹ,Gbe elo kẹ edhere mẹ.+
106 Me duwu iyei no, yọ me ti ru ei gba,Inọ me re ru lele iziẹibro ikiẹrẹe ra.
107 Mẹ reoja gaga no.+
O Jihova, siwi uzuazọ mẹ wọhọ epaọ ẹme ra.+
108 Ivie jọ ekẹ unevaze ujiro nọ mẹ be kẹ owhẹ* e were owhẹ,+ O Jihova,Re who wuhrẹ omẹ iziẹibro ra.+
109 Uzuazọ* mẹ o rrọ ọza* kẹse kẹse,Rekọ uzi ra o re thọrọ omẹ ẹro ho.+
110 Ahwo omuomu a kpahe ẹta kẹ omẹ,Rekọ me ri ghoro siọ ijaje ra ba ha.+
111 Mẹ rehọ ekareghẹhọ ra wọhọ okwakwa nọ me wo bẹdẹ bẹdẹ,*Keme eye i bi ru udu mẹ ghọghọ.+
112 Mẹ gba riẹ mu no* inọ me re ru lele ijaje raEvaọ oke kpobi, rite urere.
ס [Samẹk]
113 Me mukpahe ahwo nọ a rẹ rọ udu rai kpobi ru oware he,*+Rekọ me you uzi ra.+
114 Whẹ họ uwou mẹ gbe ojese mẹ,+Keme ẹme ra họ ẹruore mẹ.*+
115 Wha kẹnoma kẹ omẹ, whai ahwo omuomu,+Re mẹ ruẹsi koko ijaje Ọghẹnẹ mẹ.
116 Fiobọhọ kẹ omẹ wọhọ epanọ whọ ya eyaa riẹ,*+Re mẹ ruẹse gbẹ jọ uzuazọ;Whọ kuvẹ re mẹ vioja fiki ẹruore nọ me wo ho.*+
117 Fiobọhọ kẹ omẹ re mẹ ruẹse zọ;+Kẹsena mẹ vẹ te tẹrovi ijaje ra ẹsikpobi.+
118 Whọ rẹ siọ enọ i ghoro no ijaje ra kpobi,+Keme yọ ahwo erue gbe eviẹhọ.
119 Who re si ahwo omuomu no otọakpọ na wọhọ ekagba nọ i fioka ha.+
Oyejabọ nọ ekareghẹhọ ra e rọ were omẹ gaga na.*
120 Idudu ra i re ru omẹ* nuhu;Mẹ rẹ dhozọ iziẹibro ra.
ע [Ayin]
121 Me ru oware nọ u woma je kiẹrẹe.*
Ivie who vu omẹ wa kẹ enọ i bi kienyẹ omẹ hẹ!
122 Kẹ odibo ra imuẹro inọ o ti wo omofọwẹ;Whọ kuvẹ hẹ re ahwo omorro a kienyẹ omẹ.
123 Ibiaro mẹ i dhe no nọ mẹ be hẹrẹ esiwo ra+Gbe eyaa* ikiẹrẹe ra na.+
124 Dhesẹ uyoyou ra nọ o rẹ hiẹ hẹ kẹ odibo ra,+Re who wuhrẹ omẹ ijaje ra.+
125 Mẹ yọ odibo ra; kẹ omẹ otoriẹ,+Re mẹ ruẹse riẹ ekareghẹhọ ra.
126 Oke u te no nọ Jihova ọ rẹ rọ jowọ,+Keme a raha uzi ra no.
127 Oyejabọ nọ ijaje ra e rọ were omẹ gaga*Vi igoru, makọ emamọ igoru* dede.+
128 Fikiere, mẹ rehọ uthubro* kpobi nọ whọ kẹ inọ o gba;+Me mukpahe edhere ọrue kpobi.+
פ [Pe]
129 Ekareghẹhọ ra i gbunu kẹhẹ.
Oyejabọ nọ me* bi ro koko* ai na.
130 Eme ra nọ a fere via e rẹ wha elo ze,+E rẹ kẹ ohwo nọ ọ rrọ ogbori otoriẹ.+
131 Me rovie unu mẹ fihọ kẹkẹe je kuẹwẹ,*Keme ijaje ra i bi si omẹ urru gaga.+
132 Nyabru omẹ ze re whọ re ohrọ mẹ,+Wọhọ epanọ whọ ta nọ who re ru kẹ enọ i you odẹ ra.+
133 Rọ ẹme ra kpọ ithihi awọ mẹ re me gbe kpowọ họ oware ovo ho;*Jọ oware umuomu ovuovo u su omẹ hẹ.+
134 Siwi* omẹ no obọ ahwo okienyẹ,Me ve ti koko ijaje ra.
135 Ru ovao ra lo* kẹ odibo ra,+Re who wuhrẹ omẹ ijaje ra.
136 Irui-oviẹ i bi su no omẹ aro zeKeme ahwo a bi koko uzi ra ha.+
צ [Sade]
137 Who kiẹrẹe, O Jihova,+Yọ who re bru uvioziẹ.+
138 Ekareghẹhọ nọ whọ rẹ kẹ i kiẹrẹeA rẹ sai fievahọ ae riẹriẹriẹ.
139 Ọwhọ o kpe omẹ no,+Keme eme ra e thọrọ ewegrẹ mẹ ẹro no.
140 Ẹme ra yọ ẹme nọ a nabi ru fo no ziezi,+Yọ odibo ra o you ẹme ra.+
141 Me te oware ovuovo ho yọ a be jẹ omẹ fiẹ;+Ghele na, ijaje ra e re thọrọ omẹ ẹro ho.
142 Ẹrẹreokie ra yọ ẹrẹreokie ebẹdẹ bẹdẹ,+Yọ uzi ra uzẹme.+
143 O tẹ make rọnọ uye gbe eware egaga i te omẹ,Ijaje ra e rẹ gbẹ were omẹ ẹsikpobi.
144 Ẹrẹreokie ekareghẹhọ ra ọ rẹ jọ bẹdẹ bẹdẹ.
Kẹ omẹ otoriẹ,+ re mẹ ruẹse gbẹ jọ uzuazọ.
ק [Kof]
145 Mẹ rọ udu mẹ kpobi bo se owhẹ. Yo kẹ omẹ, O Jihova.
Me ti koko ijaje ra.
146 Me bi bo se owhẹ; siwi omẹ!
Me ti ru lele ekareghẹhọ ra.
147 Mẹ kpama taure oke o tẹ te ke* re me bo se owhẹ kẹ obufihọ,+Keme eme ra họ ẹruore mẹ.*
148 Me rovie aro taure oke irou aso u te ti te,Re mẹ sae romatotọ roro kpahe* ẹme ra.+
149 Gaviezọ kẹ urru mẹ fiki uyoyou ra nọ o rẹ hiẹ hẹ.+
O Jihova, sẹro uzuazọ mẹ fiki uvioziẹ ra.
150 Ahwo nọ i duomahọ uruemu omovuọ* a nya kẹle omẹ;A thabọ no uzi ra.
151 Whọ kẹle, O Jihova,+Ijaje ra kpobi e tẹ jẹ rrọ uzẹme.+
152 U kri gaga no nọ mẹ riẹ kpahe ekareghẹhọ raInọ who ru rai re e jọ bẹdẹ bẹdẹ.+
ר [Resh]
153 Rri oja-oriọ mẹ re who siwi omẹ,+Keme uzi ra o re thọrọ omẹ ẹro ho.
154 Thothọ* mẹ re who siwi omẹ;+Sẹro uzuazọ mẹ wọhọ epanọ whọ ya eyaa riẹ.*
155 Esiwo o thabọ no ahwo omuomu,Keme a kiẹ gwọlọ ijaje ra ha.+
156 Ohrọ ra o rrọ ruaro, O Jihova.+
Rehọ uvioziẹ ra sẹro uzuazọ mẹ.
157 Enọ i bi kpokpo omẹ gbe ewegrẹ mẹ a rrọ buobu;+Rekọ mẹ re nyasiọ ekareghẹhọ ra ba ha.
158 Me re rri ahwo ẹghẹ tọtọtọ,Keme a bi ru lele ẹme ra ha.+
159 Rri epanọ ijaje ra e were omẹ* te!
O Jihova, sẹro uzuazọ mẹ fiki uyoyou ra nọ o rẹ hiẹ hẹ.+
160 Uzẹme ọvo o rrọ ẹme ra,+Yọ iziẹibro ikiẹrẹe ra kpobi e rẹ jọ bẹdẹ bẹdẹ.
ש [Sin] hayo [Shin]
161 Ikpahwo-esuo* a bi kpokpo omẹ+ gheghe gheghe,Rekọ eme ra i bi mu omẹ ọwhewhe.*+
162 Mẹ ghọghọ fiki ẹme ra+Wọhọ ohwo nọ ọ kwa egbo-ẹmo buobu rehọ.
163 Me mukpahe ọrue, o re tu omẹ oma,+Me you uzi ra.+
164 Isiahrẹ evaọ okpẹdoke me re jiri owhẹFiki iziẹibro ikiẹrẹe ra.
165 Enọ uzi ra o were* a re wo udhedhẹ ulogbo;+Oware ovo u re ru ai zoruẹ hẹ.*
166 Me bi rẹro iruẹru esiwo ra, O Jihova,Yọ me bi koko ijaje ra.
167 Me bi* ru lele ekareghẹhọ ra,Yọ e were omẹ* gaga.+
168 Me bi ru lele* ijaje ra gbe ekareghẹhọ ra,Keme whọ riẹ oware kpobi nọ me bi ru.+
ת [Tọọ]
169 Jọ oviẹ mẹ kẹ obufihọ u do te owhẹ oma, O Jihova.+
Rọ ẹme ra ru omẹ wo otoriẹ.+
170 Jọ ayare mẹ kẹ obufihọ o bru owhẹ ze.
Siwi omẹ wọhọ epanọ whọ ya eyaa riẹ.*
171 Jọ ujiro o hai no igbenu mẹ ze ẹsikpobi,+Keme who wuhrẹ omẹ ijaje ra.
172 Jọ ẹrọo mẹ ọ so ole kpahe ẹme ra,+Keme ijaje ra kpobi i kiẹrẹe.
173 Jọ obọ ra o ruẹrẹ oma kpahe re u fiobọhọ kẹ omẹ,+Keme mẹ salọ nọ me re ru lele* ijaje ra.+
174 Me bi rẹro esiwo ra gaga, O Jihova,Yọ uzi ra o were omẹ gaga.+
175 Jomẹ* jọ uzuazọ re mẹ ruẹsi jiri owhẹ;+Jọ iziẹibro ra i fiobọhọ kẹ omẹ.
176 Me ghoro vrẹ wọhọ ogodẹ nọ o vru.+ Gwọlọ odibo ra,Keme ijaje ra e re thọrọ omẹ ẹro ho.+
Eme-Obotọ
^ Hayo “enọ i kru ẹgbakiete.”
^ Evaọ Hibru, “O dodokọ idhere mẹ i dikihẹ kothi.”
^ Hayo “ru lele ithubro.”
^ Hayo “rou.”
^ Hayo “Me fi ẹme ra họ udu mẹ.”
^ Hayo “Me ti wuhrẹ.”
^ Evaọ Hibru, “Ghelie ẹpoviẹ gbe orivo no oma mẹ.”
^ Hayo “o re wuhrẹ.”
^ Hayo “Eye họ ekohrẹ mẹ.”
^ Hayo “wọhọ epanọ whọ ta.”
^ Evaọ Hibru, “edhere ijaje.”
^ Hayo “ruẹsi wuhrẹ kpahe.”
^ Hayo “mẹ rẹ jọ ohwo ọtẹruo.”
^ Hayo “whọ jọ oma o vuọ omẹ hẹ.”
^ Evaọ Hibru, “dhẹ evaọ edhere.”
^ Hayo o sae jọ nọ, “whọ lẹliẹ omẹ fi udu dhe no.”
^ Hayo “Ru.”
^ Hayo “erere nọ me re wo ho.”
^ Hayo “ẹme.”
^ Hayo o sae jọ nọ, “Onọ whọ ya kẹ enọ e be dhozọ ra.”
^ Hayo “ẹme.”
^ Hayo “mẹ be hẹrẹ.”
^ Hayo “oria nọ u whrowhro oma.”
^ Hayo “enọ me you gaga na.”
^ Hayo “Yọ me ti wuhrẹ.”
^ Hayo “eyaa nọ whọ ya.”
^ Hayo “Onọ whọ ta nọ mẹ hẹrẹ.”
^ Hayo “Evaọ uwou nọ mẹ be rria wọhọ ọrara.”
^ Hayo “ru ovao ra ghariẹ.”
^ Hayo “ẹme.”
^ Hayo “mẹ jẹ hae rọ ethobọ raha uzi.”
^ Evaọ Hibru, “o rrọ kpimẹ, wọhọ iwhri.”
^ Hayo “ẹme ra mẹ be hẹrẹ.”
^ Hayo “whọ ta.”
^ Hayo o sae jọ nọ, “a bi gu erue ruru omẹ.”
^ Hayo “me ti wuhrẹ.”
^ Hayo “udu nọ o kare afuẹwẹ.”
^ Hayo “ẹme ra mẹ be hẹrẹ.”
^ Hayo “wọhọ idhiwu na.”
^ Koyehọ, emama riẹ kpobi.
^ Evaọ Hibru, “o kẹre gaga.”
^ Hayo “Me you uzi ra.”
^ Hayo “Me re wuhrẹ.”
^ Hayo “evaọ okpẹdoke na soso.”
^ Hayo “otoriẹ udidi.”
^ Hayo “me bi wuhrẹ.”
^ Hayo “Mẹ rẹ rehọ otoriẹ ru eware.”
^ Hayo “ẹrọo.”
^ Evaọ Hibru, “ekẹ unevaze unu mẹ.”
^ Hayo “o rrọ omẹ evabọ.”
^ Hayo “ukuoriọ mẹ bẹdẹ bẹdẹ.”
^ Evaọ Hibru, “Mẹ jẹlẹ udu mẹ no.”
^ Hayo “ahwo nọ i wo eva ivẹ; ahwo nọ udu rai o ghale.”
^ Hayo “ẹme ra mẹ be hẹrẹ.”
^ Hayo “wọhọ epanọ whọ ta.”
^ Hayo “re oma o vuọ omẹ fiki ẹruore mẹ hẹ.”
^ Hayo “Oyejabọ nọ me ro you ekareghẹhọ ra.”
^ Evaọ Hibru, “uwo-oma mẹ.”
^ Hayo “Me bruoziẹ nọ u kiẹrẹe.”
^ Hayo “eme.”
^ Hayo “Oyejabọ nọ me ro you izi ra.”
^ Hayo “igoru nọ a ru fo no.”
^ Hayo “ujaje.”
^ Hayo “muẹrohọ.”
^ Evaọ Hibru, “jẹ wẹ fuele fuele.”
^ Hayo “re awọ mẹ o dikihẹ kothi.”
^ Evaọ Hibru, “Ta.”
^ Hayo “ghariẹ.”
^ Hayo “oke u te ti rrie.”
^ Hayo “eme ra mẹ be hẹrẹ.”
^ Hayo “Re mẹ sai wuhrẹ.”
^ Hayo “uruemu ugbogbo.”
^ Hayo “Guẹdhọ.”
^ Hayo “wọhọ epanọ whọ ta.”
^ Hayo “me you ijaje ra.”
^ Evaọ Hibru, “Emezae-ivie.”
^ Hayo “ẹme ra o bi mu omẹ ọwhewhe evaọ obọ udu mẹ.”
^ Hayo “Enọ i you uzi ra.”
^ Hayo “Utho ezoruẹ ọvo ọ rrọ kẹ ae he.”
^ Hayo “me you rai.”
^ Hayo “muẹrohọ.”
^ Hayo “wọhọ epanọ whọ ta.”
^ Hayo “yoẹme kẹ.”
