Sithandazela ukuthi abantu abanengi balalele nxa sibaxwayisa besebebuya bezokhonza uJehova kanye lathi. Kodwa kuzakwenzakalani kulabo abangasoze basilalele? Kungenzeka ukuthi uJehova abasindise labo abazathi sebebone ukubhujiswa kweBhabhiloni Enkulu batshintshe besebekholwa kuye. Yikho kuqakatheke kakhulu ukuthi siqhubeke sixwayisa abantu. Esibatshela khona khathesi kungaba yikho abazakukhumbula ngalesosikhathi. (Khangela uHezekheli 33:33.) Mhlawumbe bazakhumbula lokho esasibaxwayisa ngakho bakhethe ukuzokhonza uJehova kanye lathi bengakaphuzi kakhulu. Njengoba nje umgcinijele weFiliphi watshintsha ‘sekube lokuzamazama komhlaba okukhulu’ kungenzeka ukuthi abanye abangasilaleliyo khathesi batshintshe sebebone ukubhujiswa kweBhabhiloni Enkulu.—Imiseb. 16:​25-34. w24.05 17 ¶9-10

Kulesifundo esiqakathekileyo esisifunda emazwini umphostoli uPhawuli awabhalela amaKhristu angamaHebheru. Amanye awo ayengamadela, engathuthuki ekukhonzeni. Yikho ‘kwasekumele aphiwe uchago futhi, hatshi ukudla okuqinileyo.’ (Heb. 5:12) Babesehluleka ukufunda lokwamukela izinto uJehova ayebacacisela zona kancane kancane esebenzisa ibandla. (Zaga. 4:18) Ngokwesibonelo, amanye amaKhristu angamaJuda ayelokhu esithi abantu kumele bagcine uMthetho kaMosi lanxa kwasekudlule iminyaka engaba ngu-30 umhlatshelo kaKhristu wasusa uMthetho lo. (Tit. 1:10) Yikho uPhawuli wawabhalela incwadi ukuze awancede azwisise izinto ezijulileyo ayewafundisa zona. Incwadi leyo yawanceda amaKhristu lawo ukuthi aqinise ukholo lwawo njalo abone ukuthi uhlelo lwebandla lobuKhristu lwalungcono kakhulu ukwedlula indlela amaJuda ayekhonza ngayo. Yawanceda lokuthi abe lesibindi sokuqhubeka etshumayela.—Heb. 10:​19-23. w24.04 6 ¶15

U-Adamu lo-Eva babambana loSathane bahlamukela uJehova uNkulunkulu. Kusukela ngalesosikhathi sekufe amabhiliyoni abantu. Kuzakwenzakalani ngabantu bonke laba abafayo? Abalutshwana abangu-144 000 abakhethwa phakathi kwabalandeli bakaKhristu abathembekileyo bazavuselwa ukuyaphila ezulwini njalo abasoze baphinde bafe. (Isam. 14:1) Kanti njalo kulamadoda labesifazana abanengi ababethanda uJehova abazavuswa nxa ‘sekuvuswa abalungileyo.’ Bazaphila emhlabeni kuze kube nini lanini nxa bangaqhubeka besenza okulungileyo ngesikhathi sokubusa kukaKhristu okweminyaka eyinkulungwane langesikhathi sokulingwa kokucina. (Dan. 12:13; Heb. 12:1) Kanti njalo ngalesosikhathi sokubusa kweminyaka eyinkulungwane kuzavuswa “labangalunganga” besebephiwa ithuba lokuthi batshintshe ukuze babe zinceku zikaJehova ezithembekileyo. Phakathi kwabantu labo kulalabo abangazange bakhonze uJehova kanye ‘lababesenza izinto ezimbi.’ (Joh. 5:29; Luk. 23:​42, 43) Kodwa kulabanye abantu ababesenza izinto ezimbi kakhulu okokuthi ukhethe ukuthi kasoze abavuse.—Luk. 12:​4, 5. w24.05 2 ¶3; 5 ¶15; 6 ¶17

Umuntu ofuna ukwamukelwa nguJehova kumele ‘akhulume iqiniso enhliziyweni yakhe.’ (Hubo. 15:2) Lokhu akutsho ukungaqambi amanga kuphela. UJehova ufuna sithembeke kukho konke esikukhulumayo lesikwenzayo. (Heb. 13:18) Kuqakathekile ukuthi senze njalo ngoba “uJehova uyamzonda umuntu oliqili, kodwa ungumngane omkhulu wabathembekileyo.” (Zaga. 3:32) Umuntu “okhuluma iqiniso enhliziyweni yakhe” kazitshayi umuntu olalela uNkulunkulu nxa esebantwini kodwa abesesenza okubi nxa eseyedwa. Kanti njalo kayisiloqili. Umuntu oliqili loba ongathembekanga angaqalisa ukuthandabuza ukuthi imithetho kaJehova iyasinceda zikhathi zonke. (Jak. 1:​5-8) Angakhetha ukungalaleli uJehova endabeni yena abona angani kaziqakathekanga kangako. Nxa angabona ukuthi akulalutho olubi olwenzakalayo ngenxa yokungalaleli kwakhe, angaqalisa ukwenza izinto ezimbi kakhulu. Lanxa yena eyabe ezitshela ukuthi uyakhonza, uJehova uyabe engasamamukeli. (Umtshu. 8:11) Kodwa thina sifuna ukuthembeka ezintweni zonke. w24.06 10 ¶7-8

Abantu bakaJehova bayalithanda iqiniso eliseLizwini lakhe. Yilo eliyinsika yokholo lwethu. (Rom. 10:17) Kasithandabuzi ukuthi uJehova ubeke ibandla lamaKhristu laba ‘yinsika lesisekelo seqiniso.’ (1 Thim. 3:15) Inhloso kaSathane ngeyokuthi sicine singasalithembi iBhayibhili kumbe lokho esikufundiswa yinhlanganiso kaNkulunkulu. (Efe. 4:14) Esikhathini esiseduze uSathane uzasebenzisa amanga ukuthi aqile izizwe ukuze zimelane loJehova. (Isam. 16:​13, 14) Okunye esikwaziyo yikuthi uzakwenza konke okusemandleni akhe ukuthi adukise abantu bakaJehova. (Isam. 12:9) Ngakho kuqakathekile ukuthi sizifundise ukwehlukanisa iqiniso lamanga njalo sizimisele ukulandela iqiniso. (Rom. 6:17; 1 Phet. 1:22) Ukwenza njalo kuzasinceda ukuthi sisinde ekuhluphekeni okukhulu. w24.07 8 ¶1-3

Ngesikhathi uJehova enika ama-Israyeli imithetho yakhe, wenza lawo isivumelwano. Wawathembisa ukuthi nxa ayengaqhubeka elalela imithetho yakhe wayezawavikela futhi awabusise. Kodwa nxa babengamhlamukela bakhethe ukukhonza abanye onkulunkulu, wayengasoze aqhubeke ebabusisa futhi babezathwala nzima. Lanxa kunjalo lokhu kwakungatsho ukuthi uNkulunkulu usebalahle kokuphela. ‘Babengabuyela kuJehova uNkulunkulu wabo balalele ilizwi lakhe.’ (Dute. 30:​1-3, 17-20) Lokhu kutsho ukuthi babengaphenduka baphinde babe ngabangane bakaJehova futhi wayezababusisa. Ama-Israyeli kwakuwehlula ukuthi ahlale ethembekile kuJehova, ayemhlamukela. Lokhu kwenza aqalisa ukuhlupheka. Kodwa uJehova kazange abalahle abantu bakhe lanxa babengamlaleli. Wayelokhu ethuma abaphrofethi bakhe ukuthi babakhuthaze ukuthi baphenduke njalo bamkhonze ngenhliziyo yonke.—2 Amakho. 17:​13, 14. w24.08 9 ¶4-5

AmaKhristu angamaHebheru ayehlala eJerusalema leJudiya ahlangana lobunzima ngemva kokufa kukaJesu. Ibandla lamaKhristu lathi lisanda kubunjwa, amaKhristu la aqalisa ukuhlukuluzwa kakhulu. Kwathi sekudlule iminyaka engaba ngu-20 kwaba lokunye okwawathwalisa nzima. Ezomnotho zawohloka, mhlawumbe kwabangelwa yindlala eyayike yaba khona endaweni leyo. (Imiseb. 11:​27-30) Kodwa ngabo-61 C.E., kwathi cosololo amaKhristu aba lokuthula, lanxa ayesazokubona okukhulu. Ngalesosikhathi amukela incwadi eyayivela kumphostoli uPhawuli eyayizawanceda ukuthi alungele ubunzima obabusazowehlela. Incwadi eyayibhalelwe amaHebheru yafika ngesikhathi sibili ngoba ukuthula ababelakho kwakungokwesikhatshana. UPhawuli wanika amaKhristu la amacebo ayezawanceda ukuthi aqinisele ebunzimeni obasebuseduze. w24.09 8 ¶1-2

Nxa sisebunzimeni, uJehova usebenzisa abafowethu labodadewethu ukuze atshengise ukuthi uyasithanda. Esikhonza labo bangasiduduza ngokusilalela nxa sibatshela lokho okusikhathazayo njalo bangasivakatshela ukuze batshengise ukuthi balendaba lathi. Bangasibalela ivesi eduduzayo kumbe bathandaze lathi. (Rom. 15:4) Kwezinye izikhathi umfowethu kumbe udadewethu angasikhumbuza indlela uJehova asibona ngayo futhi asincedise ukuthi singakhathazeki kakhulu. Abafowethu labodadewethu bangasincedisa langezinye izindlela, ngokwesibonelo bangasiphekela ukudla nxa sikhathazeke kakhulu. Kwezinye izikhathi kungadinga ukuthi sicele ukuthi abanye basincedise. (Zaga. 17:17) Bangabe bengakwazi ukuthi sizwa njani lokuthi sifunani. (Zaga. 14:10) Yikho ungafeli ngaphakathi. Khuluma labangane obathembayo. Batshele ukuthi ufuna bakuncedise njani. Ungakhetha ukukhuluma lomdala oyedwa kumbe ababili ongabe ukhululekile ukuxoxa labo. Abanye odadewethu bakhetha ukukhuluma labanye odade ababathembayo futhi lokho kwenza baduduzeke. w24.10 10 ¶15-16

Abantu abanengi badla ukudla okwakha umzimba futhi baqeqetsha lemizimba yabo ukuze babe lempilakahle. Lanxa kunjalo sonke siyakwazi ukuthi sizakufa. Ukuphila okungapheliyo kungakhanya kuliphupho nje njalo kuyinto umuntu angeke ayifune ngenxa yokuthi nxa iminyaka ilokhu itshova imizimba layo iyabilokhu isiba buhlungu. Kodwa kuJohane 3:16 laku-​5:24 uJesu wathi kungenzakala sibili ukuthi abantu bakuthole ‘ukuphila okungapheliyo’ njalo kuyisibusiso esivela kuNkulunkulu. Ngelinye ilanga uJesu wanika izinkulungwane zabantu isinkwa lenhlanzi. Basala bengelankani sibili. Kodwa akukhuluma ngelanga elilandelayo kwabatshiya bebambe owangaphansi. Abantu laba bamlandela baze bayamthola eKhaphenawume, duze lekhunjini leGalile. Wabatshela ukuthi uyenelisa ukuvusa abafileyo lokuthi bangakuthola ukuphila okungapheliyo. (Joh. 6:​39, 40) Amazwi kaJesu atshengisa ukuthi abanengi asebasitshiyayo bazavuswa baphinde baphile. Wena lezihlobo labangane bakho lingakuthola ukuphila okungapheliyo. w24.12 8 ¶1-2

Omunye umbiko we-World Health Organization osanda kuphuma uthi amadoda amanengi abaphatha kubi omkawo. Ayabatshaya njalo akhulume izinto ezibazwisa ubuhlungu futhi kawalandaba lokuthi bazizwa njani. Amanye amadoda nxa ephakathi kwabantu enza angani ayabathanda omkawo kodwa nxa sebebodwa ngekhaya kuba ngokunye. Kuyini okwenza amanye amadoda aphathe kubi omkawo? Omunye uyabe wakhula ebona uyise ehlukuluza unina abesezitshela ukuthi yikho ukuba yindoda. Ikanti abanye bangabe belandela amasiko abo abenza babone angani indoda kumele isebenzise amandla, ibe lesihluku ukuze kukhanye ukuthi iyindoda kuzwa. Amanye amadoda kawazange akufundiswe ukuzibamba yikho nxa angazonda enza loba yini. Amanye amadoda abukela iphonografi yikho elemicabango engayisiyo ngezemacansini langabesifazana. Imibiko itshengisa ukuthi ngesikhathi seCovid-19 amadoda amanengi aqalisa ukuhlukuluza omkawo. Kodwa konke lokhu akuniki amadoda isizatho sokuthi ahlukuluze omkawo. w25.01 8 ¶2-3

“Kumele uthande uJehova uNkulunkulu wakho ngenhliziyo yakho yonke, langomphefumulo wonke, langamandla akho wonke, langengqondo yonke.” (Luk. 10:27) UJesu wathi lo yiwo umthetho oqakatheke kulayo yonke eMthethweni kaMosi. Nanzelela ukuthi kumele sithande uJehova ngenhliziyo yethu yonke. Lokhu kugoqela esikufisayo kanye lendlela esizizwa ngayo. Kanti njalo kumele simthande ngomphefumulo wonke langamandla ethu wonke. Kumele simthande langengqondo yethu yonke, okutsho indlela esicabanga ngayo. Liqiniso ukuthi asingeke siyizwisise ngokugcweleyo indlela uJehova acabanga ngayo kodwa nxa singahlola indlela uKhristu acabanga ngayo sizazwisisa ukuthi uJehova ucabanga njani. Phela uJesu wayecabanga ngendlela uYise acabanga ngayo.—1 Khor. 2:16. w25.03 8 ¶1

Njengoba uJesu wayengelasono, wayefanana lo-Adamu engakawoni. (1 Khor. 15:45) Ngesikhathi uJesu esifa, wabhadalela isono esasenziwe ngu-Adamu njalo wabuyisela lokho okwakulahlwe ngu-Adamu. (Rom. 5:19) Yikho iBhayibhili limbiza ngokuthi ‘ngu-Adamu wokucina.’ Akusadingeki ukuthi kubuye omunye umuntu ongelasono azobhadala lokho okwalahlwa ngu-Adamu. UJesu wafa “kwaba kanye kuphela.” (Heb. 7:27; 10:12) Kuyini okwenza senelise ukuba ngabangane bakaJehova? Yikuthi uJehova wenza uhlelo lokuthi izono zethu zihlawulelwe. Wasihlawulela ngeNdodana yakhe. UJesu wanikela ngempilo yakhe. Igazi lakhe eliligugu lachitheka ngenxa yethu.—Heb. 9:14. w25.02 5 ¶12-13

Ukukholwa ukuthi uJehova nguNkulunkulu ophilayo kuzasinceda ukuthi singadani kakhulu nxa sisebunzimeni. Njani? Kuzasinceda sibone ukuthi lokho esizakwenza nxa siphakathi kwenhlupho kunganceda ukuthi uJehova aphendule uSathane. Phela uSathane uthi nxa singehlelwa yibunzima sizamtshiya uJehova. (Jobe. 1:​10, 11; Zaga. 27:11) Kodwa nxa singahlala siqotho kuJehova lanxa sisebunzimeni sizenelisa ukutshengisa ukuthi siyamthanda lokuthi uDeveli ulamanga. Mhlawumbe lapho ohlala khona uhulumende kalivumeli ukuthi likhonze likhululekile kumbe ungabe ulohlupho lwemali. Kungenzeka ukuthi abantu elibatshumayezayo kabafuni ukulalela njalo lawe ungabe ulezinye nje inhlupho. Nxa kunjalo, khumbula ukuthi ubunzima ophakathi kwabo bukunika ithuba lokuthi wenze inhliziyo kaJehova ithokoze. Khumbula lokuthi kasoze avume ukuthi ulingwe ngalokho ongeke wenelise ukukubekezelela. Uzakunika amandla okuthi uqinisele. w24.06 22 ¶9

Uyazazi yini izinto okumele uzinanzelele kakhulu ukuze ungaweli esilingweni? Akusoze kusincede ngalutho ukuzitshaya angani asiboni lapho esisilela khona kumbe ukuzitshela ukuthi siqine kakhulu okokuthi ngeke siwele esonweni. (1 Joh. 1:8) Khumbula ukuthi uPhawuli wathi lalabo ‘abakhokhelwa ngumoya’ bangacina belingwa nxa bengananzeleli. (Gal. 6:1) Kumele singaziqili kodwa sivume ukuthi kulalapho esisilela khona. (2 Khor. 13:5) Kumele senzeni nxa singananzelela izinto ezisilinga lula? Kumele sibophe ziqine. Ngokwesibonelo, kudala amagedi ayelindwa ngabalindi abanengi ukuze bavikele idolobho ngoba izitha zazijayele ukungena ngawo. Yikho lathi nxa singabazazi izinto ezisilinga lula kumele sizinanzelele ukuze singaweli esonweni.—1 Khor. 9:27. w24.07 15 ¶5-7

Imisebenzi emihle okukhulunywa ngayo embhalweni walamuhla igoqela lokutshumayela izindaba ezinhle. Yikho nxa singabala iBhayibhili sicabangisise ngesikubalayo, ukholo lwethu luzaqina njalo sizakuqakathekisa kakhulu ukutshela abanye izindaba ezinhle ezimayelana loMbuso. Nxa sifuna ukuthola okunengi eLizwini likaNkulunkulu kumele sizinike isikhathi sokucabangisisa, singabali sigijima. Nxa ungahlangana levesi okukhanya kunzima ukuyizwisisa ungayidluli masinyane. Sebenzisa Ibhuku Lokuchwayisisa LaboFakazi BakaJehova kumbe i-Watch Tower Publications Index ukuze ubone ukuthi ivesi leyo ichasiswa njani. Ukutaditsha ungajahanga kuzakunceda ungathandabuzi ukuthi iLizwi likaNkulunkulu liliqiniso. (1 Thes. 5:21) Nxa ukukholwa lokho okubala eBhayibhilini uzakukholisa ukuxoxela abanye ngalokho osukufundile. w24.04 15 ¶4-5

UDavida wathi: “Wena Jehova umuhle futhi uzimisele ukuthethelela.” (Hubo. 86:5) UMikha wathi: “Nguphi uNkulunkulu onjengawe, oxolela izoni leziphambeko?” (Mik. 7:18) U-Isaya yena wathi: “Owenza okubi katshiye indlela yakhe, loxhwalileyo atshiye imicabango yakhe, kabuyele kuJehova, yena uzakuba lesihawu kuye, abuyele kuNkulunkulu wethu ngoba uzamthethelela ngendlela enkulu.” (Isaya. 55:7) Ibandla leKhorinte kwakumele lilingisele uJehova ngokwamukela indoda eyayisiphendukile langokuyiqinisekisa ukuthi liyayithanda. Ibandla leli latshengisa ukuthi ‘liyalalela ezintweni zonke’ ngoba lakwenza lokho elakutshelwa nguPhawuli. Ngemva kwezinyanga ezilutshwana nje indoda le isusiwe, yayisitshintshile yaphenduka. Yikho kwakungelasizatho sokuthi abadala baphuze ukuyibuyisela ebandleni yona isiphendukile. w24.08 17-18 ¶12-13

Sikulindele ngabomvu ukubona iziphrofetho ezitshiyeneyo zigcwaliseka. Sekuseduze ukuthi uJesu ahlulele wonke umuntu osemhlabeni. UJesu watshela abafundi bakhe ukuthi lokhu kungakenzakali, kwakuzakuba ‘lesibonakaliso’ sokuba khona kwakhe “lesesiphetho somumo lo wezinto.” (Mat. 24:3) Isibonakaliso lesi kukhulunywa ngaso kuMathewu 24 lo-​25 lakuMakho 13 loLukha 21. UJesu wakhuluma umzekeliso wezimvu lembuzi, lowentombi ezihlakaniphileyo leziyizithutha kanye lowamathalenta. Imizekeliso le imumethe izixwayiso ezisinceda sizwisise ukuthi uJesu uzasahlulela ekhangela lokho esikwenzayo. w24.09 20 ¶1-2

Cabanga ngalokho okwenziwa nguJesu Khristu njengoba kunguye esifuna ukumlingisela. Wayemthanda uYise futhi wayebathanda labantu. Lokho yikho okwakusenza ukuthi asebenze nzima futhi enze lemisebenzi eyayikhangelelwa phansi. (Mat. 20:28; Joh. 13:​5, 14, 15) Lawe mfowethu, uJehova uzakubusisa njalo uzakuncedisa ukuthi wenze okunengi enhlanganisweni okugoqela lokuba yinceku ekhonzayo nxa umthanda futhi ubathanda abantu. (1 Phet. 5:5) Emhlabeni lo, abantu bajayele ukubabuka abantu abaziphakamisayo. Kodwa abantu bakaJehova bona kabanjalo. Umzalwane obathandayo abantu njengoJesu kazenzi umaqhuzu phakathi kwabanye futhi uyabe engafuni abanye bambone angathi yena uqakatheke kakhulu. Nxa umuntu oziphakamisayo engabekwa ebandleni, angayala ukwenza imisebenzi ekhangelelwa phansi futhi angehluleka ukuncedisa izimvu zikaJehova eziligugu. Angabona angani imisebenzi le imehlisa isithunzi.—Joh. 10:12. w24.11 15 ¶6-7

Emhlabeni wonke nje kufuneka abazalwane abanengi abangaba ‘yizipho ezingabantu.’ (Efe. 4:8) Nxa ungumzalwane obhabhathiziweyo uyenelisa yini ‘ukuthi uncedise’? (Zaga. 3:27) Uzimisele yini ukusebenza nzima ukuthi ube yinceku ekhonzayo? Nxa kuyikuthi uyinceku ekhonzayo uyafuna yini ukuthuthuka ukuze ube ngumdala? Zikhona yini izinto ongazitshintsha empilweni yakho ukuze wenelise ukufaka isicelo sokuya eSikolo Sabavangeli BoMbuso? Ozakufunda esikolo lesi kuzakunceda ukuthi uJesu akusebenzise ezintweni ezinengi. Nxa ubona angani ngeke wenelise ukukwenza konke lokhu thandaza kuJehova. Mcele ukuthi akunike umoya wakhe ongcwele ozakuncedisa ukuthi uwenze kuhle loba yiwuphi umsebenzi ozawuphiwa. (Luk. 11:13) Abafowethu abasebenza nzima futhi ababekwe nguJesu ukuthi babe ‘yizipho ezingabantu’ bayibufakazi bokuthi uJesu nguye sibili osikhokhelayo kulezinsuku zokucina. (Mat. 28:20) Uzwa njani ngokuthi sileNkosi elothando, ephanayo, elendaba lathi futhi esinika abazalwane abafaneleyo ukuthi basikhangele? w24.10 23 ¶16-17

Kuzakwenzakalani ngezinto ezizwisa abantu bakaNkulunkulu ubuhlungu khathesi futhi ezibenza bahlupheke? “Zizakhohlakala, zisuswe emehlweni [kaNkulunkulu].” (Isaya. 65:16) UJehova uzasusa konke okusikhathazayo njalo ngokuhamba kwesikhathi sizakhohlwa lokuthi inhlupho lezo zazisizwisa ubuhlungu obunganani. Sizizwa sihlalisekile nxa sisemihlanganweni yebandla ngoba siyabe sichelesile futhi singacabangi ngezinto ezisihluphayo. Nxa silezithelo zomoya ezigoqela uthando, ukuthokoza, ukuthula, umusa kanye lokuba mnene, siyabe sisenza ukuthi abafowethu labodadewethu bahlaliseke futhi bakholise epharadayisi esikulo. (Gal. 5:​22, 23) Kuyisibusiso esikhulu sibili ukuba senhlanganisweni kaNkulunkulu. Labo abaqhubeka besepharadayisi leli bazasibona sigcwaliseka isithembiso sikaNkulunkulu sokuthi kuzakuba ‘lamazulu amatsha lomhlaba omutsha.’ w24.04 22 ¶9-10

Lanxa abantu abathandanayo besiba lezikhathi ezimnandi, akumelanga bakhohlwe ukuthi ukuthandana kwabo kumele kubancede babone ukuthi kungavuma yini ukuthi batshade. Nxa abantu betshada bayafunga phambi kukaJehova ukuthi bazaqhubeka behloniphana futhi bethandana isikhathi sonke besaphila. Kumele siqale sicabangisise singakenzi loba yisiphi isifungo. Ngakho umuntu ofuna ukwenza isifungo somtshado laye kumele acabangisise engakasenzi. Ngesikhathi ijaha lentombi bethandana bayathola ithuba lokuthi bazane ngcono futhi lokhu kuyabanceda ukuthi benze isinqumo esihle. Bangakhetha ukuthi batshade kumbe ukuthi batshiyane. Nxa intombi lejaha bangayalana akutsho ukuthi benze into embi. Ukuthandana kwabo kuyabe kuyifezile inhloso yakho ngoba kubancedile ukuthi benze isinqumo esihle. Kungani kuqakathekile ukwazi inhloso yokuthandana? Nxa abantu abangatshadanga beyizwisisa inhloso yokuthandana abasoze bathandane lomuntu abangafisi ukutshada laye. w24.05 26-27 ¶3-4

Kwezinye izikhathi abasakhulayo bangatshaywa luvalo kube nzima ukuthi bachasisele abanye abakukholwayo. Nxa kungavuka indaba yokuthi izinto zazivelela azidalwanga nguNkulunkulu, bangesaba ukutsho abakukholwayo. Ngenxa yani? Ngenxa yokuthi ababalisi babo bangabe bebaqinisekisa ukuthi izinto zazivelela, kazidalwanga. Nxa ungumzali ungamncedisa njani umntanakho ukuthi angathandabuzi ukuthi akukholwayo kuliqiniso? Mtshele ukuthi akumelanga kumyangise ukuthi ukholwa ukuthi izinto zadalwa nguNkulunkulu. Phela labanye abezesayensi abakukholwa ukuthi izinto zaphonguzivelela. Bayabubona ubufakazi bokuthi kulomuntu okhaliphileyo owadala zonke izinto eziphilayo, yikho bengavumelani lokuthi izinto kazidalwanga, zazivelela. Okunye okunganceda umntanakho ukuthi angathandabuzi ukuthi akukholwayo kuliqiniso yikudinga ukuthi kuyini okwanceda abanye abafowethu labodadewethu bakholwa ukuthi izinto eziphilayo zadalwa, abesecabangisisa ngalokho abayabe bemtshele khona. w24.12 18 ¶14-15

UJesu wayehlala elethemba lokuthi bakhona ababezalalela izindaba ezinhle. Lokhu kwamnceda ukuthi ahlale etshiseka emsebenzini wokutshumayela. Ngokwesibonelo, kwathi sekusiyaphela umnyaka ka-30 C.E., uJesu wabona ukuthi abanengi babezimisele ukumlalela, yikho wabafanisa lamasimu aselindele ukuvunwa. (Joh. 4:35) Kwathi sekwedlule umnyaka waphinda watshela abafundi bakhe wathi: “Manengi amabele okumele avunwe.” (Mat. 9:​37, 38) Ngemva kwesikhathi waphinda wagcizelela wathi: ‘manengi amabele okumele avunwe. Ncengani iNkosi yokuvuna ukuthi ithumele izisebenzi emsebenzini wayo wokuvuna.’ (Luk. 10:2) UJesu kazange ake azitshele ukuthi abantu abasoze balalele izindaba ezinhle futhi wayethokoza nxa wayebabona belalela. UJesu wakhuthaza abafundi bakhe ukuthi bangazitsheli ukuthi abantu babengasoze balalele izindaba ezinhle. Lokhu kwakuzakwenza bahlale bekhuthele emsebenzini lo. w25.03 18-19 ¶15-16

UJehova uyindawo yokucatsha. Njengoba nje idwala lingaba yindawo umuntu angacatsha kuyo nxa kungaba lesiphepho esilolaka, loJehova uyasivikela ngezikhathi ezinzima. Uyasilinda futhi usiqinisekisa ukuthi lanxa singahlupheka emhlabeni lo omubi kuyabe kungokwesikhatshana nje. Kanti njalo uthembisa ukuthi esikhathini esizayo uzasusa loba yini eyenza ukuthi singabi lokuthula lokuvikeleka. (Hez. 34:​25, 26) Eyinye indlela esingenza ngayo uJehova abe lidwala esicatsha kulo yikuthandaza kuye. Nxa singathandaza kuJehova uyasinika ‘ukuthula kwakhe’ okuzalinda izinhliziyo zethu lengqondo zethu. (Flp. 4:​6, 7) UJehova uhlala ekulungele ukusincedisa. Singamthemba ngoba “uliDwala laphakade.” (Isaya. 26:​3, 4) Uzahlala ephila futhi ekulungele ukugcina izithembiso zakhe, lokulalela imithandazo yethu kanye lokusisekela ngezikhathi zobunzima. Okunye okwenza simthembe uJehova yikuthi uqotho kulabo abamkhonzayo. (2 Sam. 22:26) Kasoze akukhohlwe esimenzela khona futhi kasoze ayekele ukusinika umvuzo.—Heb. 6:10; 11:6. w24.06 27 ¶4-6

Ukuzilibazisa ngezinto ezimbi kungenza sicine singasakhonzi uJehova ngenhliziyo yonke. Okunye okumele sikunanzelele ngabangane esibakhethayo ukuze singacini sesicabanga ukuthi imali iqakatheke kakhulu empilweni. Nxa singananzelela ukuthi kulokunye okwenza singasamthandi kakhulu uJehova kumele silungisise masinyane. (Mat. 5:​29, 30) Akumelanga sivumele inhliziyo zethu zehlukane phakathi. Singaziyenga sicabange ukuthi nxa sisenza izinto ezinengi eziphathelane lokukhonza, izinto ezimbi ngeke zisiphambanise. Ngokwesibonelo, ake sithi uqeda kuklina endlini. Ubungavula yini amawindi leminyango ikakhulu nxa kulomoya? Ubungeke ngoba kungahle kungene uthuli. Lokho singakufanisa lobungane bethu loJehova. Kumele sizenze sibili izinto ezinhle ezingasinceda ukuthi siqhubeke sisondela kuye kodwa akumelanga siphelele khonapho. Njengoba nje singafuni ukuthi nxa sesiklinile kungene uthuli endlini, asifuni ukwenza loba yini engaphambanisa ubungane bethu loJehova.—Efe. 2:2. w24.07 21 ¶6-7

UJesu waphathwa kubi kakhulu futhi wenziwa isihluku. Ngeke sibuzwisise kuhle ubuhlungu abuzwayo. Lanxa kunjalo wanqoba okubi ngokuhle. Kazange awathethise amasotsha ayembethele kodwa wathandaza wathi: “Baba, bathethelele ngoba abakwazi abakwenzayo.” (Luk. 23:34) Ukuthandazela abantu abasiphatha kubi kungasinceda ukuthi singabi silokhu sibabambele izikhwili lokuthi singahlali sibazondele. Kanti njalo kungasinceda ukuthi sitshintshe lendlela esibabona ngayo. Inqe nje sisaphila emhlabeni lo obuswa nguSathane sizaqhubeka siphathwa kubi. Lanxa kungaze kwenzakaleni, kasingayekeli ukuqhubeka sithandaza sicela ukuthi uJehova asincedise. Kanti njalo kasilingiseleni lokho okwenziwa nguJesu ngesikhathi ephathwa kubi futhi sisebenzise izimiso eziseBhayibhilini. Singenza njalo uJehova uzasibusisa.—1 Phet. 3:​8, 9. w24.11 6 ¶16; 7 ¶17, 19

UJehova kabemukeli abantu abenza okubi njalo uyasizonda isono. (Hubo. 5:​4-6) Ukhangelele ukuthi silandele imithetho asinika yona eseLizwini lakhe. Uyakwazi ukuthi sizelwe silesono, yikho kakhangelelanga ukuthi singaphambanisi. (Hubo. 130:​3, 4) Lanxa kunjalo, kabemukeli ‘abantu abangamhloniphiyo, abatshintsha umusa wakhe omkhulu bawenze ube yisizatho sokwenza izinto ezilihlazo bengelandaba.’ (Jud. 4) IBhayibhili likhuluma ‘ngokubhujiswa kwabantu abangamesabiyo uNkulunkulu’ empini yakhe ye-Amagedoni. (2 Phet. 3:7; Isam. 16:16) Lanxa kunjalo, uJehova kafuni ukuthi loba ngubani abhujiswe. IBhayibhili liyakucacisa ukuthi “ufisa ukuthi abantu bonke baphenduke.” (2 Phet. 3:9) Abadala bebandla balingisela uJehova ngokubekezela nxa bezama ukuncedisa umuntu owonileyo ukuthi atshintshe izindlela zakhe, aphinde amukelwe nguJehova. w24.08 26 ¶1-2

Singalingisela uJehova ngokuncedisa abanye ngezinto ezitshiyeneyo ngenxa yokuthi siyabathanda. Ngokwesibonelo nxa kulomfowethu kumbe udadewethu oswela ukudla kumbe okokugqoka, kungaba kuhle ukuthi umncede. Nxa ungenza njalo, uJehova uyabe esesebenzise wena ukuthi amncede. Abantu bakaJehova baziwa ngokuncedisa abanye nxa kube lomonakalo. Ngesikhathi somkhuhlane weCOVID-19, abafowethu labodadewethu babencedisana ngokudla lezigqoko langezinye izinto. Abanengi babenikela ngemali ukuze umsebenzi womhlaba wonke uqhubekele phambili. Lokho kwenza kwaba lula ukuthi abafowethu labodadewethu abasemazweni atshiyeneyo bancediswe. Bakwenza sibili okutshiwo kuHebheru 13:16 othi: “Lingakhohlwa ukwenza okuhle lokunika abanye lokho elilakho ngoba imihlatshelo enjalo iyamthokozisa kakhulu uNkulunkulu.” w24.09 27 ¶6-7

Ake sithi udinga umsebenzi, ubusubizwa endaweni ezimbili. Ungahlola konke okuphathelane lemisebenzi le, ngokwesibonelo ukuthi uyabe usenzani, kusetshenzwa isikhathi esinganani, kukhatshana okunganani njalo njalo. Kungabe kungelalutho olubi ngokuthi umKhristu ayenze imisebenzi le. Mhlawumbe ungakhetha omunye wakhona ngoba uyawuthanda futhi uyabona ukuthi uzabe uhola imali enengi. Kodwa kulokunye okuyabe kumele ucabange ngakho ungakakhethi. Ngokwesibonelo, usungahlola ukuthi phakathi kwemisebenzi le yiwuphi ozakuvumela ukuthi ungene yonke imihlangano yebandla? Yiwuphi umsebenzi ozakuvumela ukuthi uthole isikhathi sokuncedisa imuli yakho ukuthi isondele kuJehova lokuthi ube leqiniso lokuthi ihlala ithokoza? Ukuzibuza imibuzo enjalo kuzakunceda ubone ukuthi ukukhonza uJehova kanye lokunakekela imuli yakho, ‘yizinto eziqakatheke kakhulu’ ukwedlula imali. Ungenza njalo uzakwenza isinqumo esizathokozisa uJehova. w25.01 17 ¶11-13

Lanxa abanye abantu bekuphatha kubi, qiniseka ukuthi uJehova uyakuthanda lokuthi uyakuqakathekisa. Nxa ‘udanile’ khumbula ukuthi kukhona okuhle uJehova akubona enhliziyweni yakho, yikho wakudonsela kuye. (Joh. 6:44) Uzimisele ukukuncedisa zikhathi zonke ngoba uligugu kuye. Okungasinceda sizwisise ukuthi uJehova ulendaba lalabo abalenhliziyo ezidabukileyo yikukhangela lokho okwenziwa nguJesu. Ngesikhathi esenza inkonzo yakhe emhlabeni, wayebananzelela labo ababekhangelelwa phansi futhi wayesiba lesihawu kubo. (Mat. 9:​9-12) Omunye owesifazana owayelomkhuhlane owawusumhlukuluze kakhulu wathinta isembatho sikaJesu efuna amsilise. UJesu wamduduza wasemncoma ngenxa yokuthi wayetshengise ukuthi ulokholo. (Mak. 5:​25-34) UJesu ulingisela uYise kukho konke. (Joh. 14:9) Ngakho ungathandabuzi ukuthi uJehova uyakuqakathekisa lokuthi uyakubona okuhle okwenzayo. Uyalubona ukholo lwakho kanye lendlela omthanda ngayo. w24.10 7 ¶4-5

UDavida wake waba lenhlupho ezazimenza ehlise inyembezi. Kulabantu ababemzonda bemfuna ephansi njalo kulabanye ayebathembile ababemdanisa. (1 Sam. 19:​10, 11; 2 Sam. 15:​10-14, 30) Ngesinye isikhathi esebunzimeni wabhala wathi: “Sengidiniwe ngokukhala, ngikhala ubusuku bonke umbheda uze ubemanzi. Isofa lami selimanzi te ngezinyembezi.” (Hubo. 6:6) Lanxa uDavida wayeke ehlelwe zinhlupho wayengathandabuzi ukuthi uJehova uyamthanda. Wabhala wathi: “UJehova uzakuzwa ukukhala kwami.” (Hubo. 6:8) Amazwi asembhalweni walamuhla enza kucace ukuthi uJehova uyasithanda kakhulu futhi enza sibone ukuthi ulendaba lokuthi sizwa njani. Ngesikhathi uDavida ekhala kwakungathi ubona uJehova ekhongozele inyembezi zakhe ngesigubhu kumbe ezibhala ebhukwini. Wayeqiniseka ukuthi uJehova wayebubona ubuhlungu ayebuzwa lokuthi wayengasoze alukhohlwe usizi ayephakathi kwalo. UDavida wayengathandabuzi ukuthi uYise osezulwini olothando uyabubona ubunzima aphakathi kwabo njalo uyazwisisa ukuthi ubunzima lobu bumenza azizwe njani. w24.12 22 ¶11-12