Ezekiel 8:1-18

  • Niyakar ed Jerusalem si Ezequiel diad sakey a pasingawey (1-4)

  • Anengneng ed templo iray makapadimlan bengatla (5-18)

    • Aakisan na bibii si Tamuz (14)

    • Dadayewen na lalaki so agew (16)

8  Tan diad komanem a taon, ed komaliman agew na komanem a bulan, sanen akayurong ak ed abung ko tan akayurong ed arapan ko iray mamatatken na Juda, niwalad siak so pakayari na Soberanon Katawan a Jehova.  Legan kon onnenengneng, walay naimanok a singa apoy; walay apoy ed leksab na awak to,+ tan masmasnag so manlapud awak to a patagey, a singa mankirlap a metal.*+  Insan inyunat to so singa lima tan binembenan to ak ed buek na ulok, tan inawit ak na espiritu diad baetan na dalin tan tawen tan inyakar to ak ed Jerusalem diad panamegley na pasingawey na Dios, diad puerta ed loob+ ya akaarap ed amianen, diad kawalaan na samay dadayewen a simbolo* na imon a sengegay sanok na Dios.+  Tan wadman so gloria na Dios na Israel,+ singa samay anengneng ko ed patar a lawak.+  Insan inkuan tod siak: “Anak na too, ipangasim, nengneng kad amianen.” Kanian ninmengneng ak ed amianen, tan wadman so simbolo* na imon diad lolooban a dalan, ed amianen na puerta na altar.  Tan inkuan tod siak: “Anak na too, kasin nanenengneng mo ditan so mauge-uges tan makapadimla iran gagawaen na sankaabungan na Israel,+ saray bengatlan sengegay iyaarawik ed santuaryok?+ Balet wala ni ray mas makapadimlan bengatla a nanengneng mo.”  Insan inyakar to ak ed lolooban na sular na templo, tan sanen ninmengneng ak, walay anengneng kon abot ed padir.  Inkuan tod siak: “Anak na too, ipangasim pan bungawan so padir.” Kanian binungawan koy padir, tan walay anengneng kon sakey a lolooban a dalan.  Inkuan tod siak: “Loob ka tan nengneng mo ray mauges tan makapadimlan gagawaen da ditan.” 10  Kanian linmoob ak tan ninmengneng ak, tan anengneng ko so amin a klase na imahen na onkukurong a bengatla tan makapadimlan ayayep+ tan amin a makapadimlan idolo* ed sankaabungan na Israel;+ akaukit iratan ed interon akapaliber a padir. 11  Tan 70 ed saray mamatatken na sankaabungan na Israel so akaalagey ed arapan na saratan, a kaibay Jaazanias ya anak nen Safan.+ Balang sakey et akaawit na panagpoolan na insenso, tan mamapaatagey so ambalingit ya asewek na insenso.+ 12  Inkuan tod siak: “Anak na too, kasin nanenengneng moy gagawaen na amin a mamatatken na sankaabungan na Israel diad kabilungetan, diad saray kuarto ed loob a kawalaan na saray idolo ra? Ta ibabaga ran, ‘Ag-itayo nanenengneng nen Jehova. Tinaynan la nen Jehova iyan dalin.’”+ 13  Tan inkuan to nid siak: “Wala ni ray mas mauges tan makapadimlan gagawaen da a nanengneng mo.” 14  Kanian inawit to ak ed bandad amianen a puerta na abung nen Jehova, tan akanengneng ak diman na saray bibiin akayurong ya aakisan day dios a Tamuz. 15  Tan inkuan to lamet ed siak: “Kasin nanenengneng mo iya, O anak na too? Wala ni ray mas mauges tan makapadimlan bengatla a mas grabe nen saraya.”+ 16  Kanian inawit to ak ed loob a sular na abung nen Jehova.+ Diman ed lolooban na templo nen Jehova, diad baetan na balkonahe tan altar, walay manga 25 lalaki ya akabeneg ed templo nen Jehova tan akaarap irad bukig; ondadakmomo rad agew diad bukig.+ 17  Inkuan tod siak: “Anak na too, kasin nanenengneng mo iya? Kasin anlemew labat a bengatla parad sankaabungan na Juda so panggawa ed sarayan makapadimlan bengatla, pian panoen day inkaruksa so dalin+ tan naynay da ak a pasanoken? Idudugsol dad eleng ko so sanga.* 18  Kanian onkiwas ak lapud sanok ko. Agko ra kasian odino abageyen.+ Anggano ontawag iran maksil ed siak, agko ra dengelen.”+

Paimanod leksab

Impanlaokan a balitok tan pilak.
Odino “ya imahen.”
Odino “imahen.”
Say Hebreon termino na saya et nayarin mikonektaan ed salita parad “tai na ayep” tan uusaren a panmudmora.
Mapatnag a sakey iyan sanga ya uusaren ed panagdayew ed idolo.