Ezekiel 14:1-23

  • Akondena iray managdayew ed idolo (1-11)

  • Agnaliktaran so panangukom ed Jerusalem (12-23)

    • Matunong ya Noe, Daniel, tan Job (14, 20)

14  Tan linmay arum a mamatatken na Israel tan yinmurong ed arapan ko.+  Insan oniay mensahe nen Jehova a sinmabi ed siak:  “Anak na too, determinado irayan lalaki ya ontumbok ed saray makapadimlan idolo* ra, tan angiyan ira na pakagapolan a sengegay pankakasalanan na totoo. Ebatan ko kasi so panetepet da?+  Mansalita ka natan ed sikara tan ibagam, ‘Oniay inkuan na Soberanon Katawan a Jehova: “No walay sakey ya Israelita a determinadon ontumbok ed saray makapadimlan idolo to tan mangiyan na pakagapolan a sengegay pankasalanan na totoo insan onlan mantepet ed sakey a propeta, siak, si Jehova, sikatoy ebatan kod paraan a manepeg ed kinarakel na makapadimlan idolo to.  Ta iyan ko so takot ed kapusoan na saramay walad sankaabungan na Israel,* lapud inmarawi ran amin ed siak tan tinmumbok irad saray makapadimlan idolo ra.”’+  “Kanian ibagam ed sankaabungan na Israel, ‘Oniay inkuan na Soberanon Katawan a Jehova: “Pawil kayo tan taynan yo iray makapadimlan idolo yo tan ibeneg yoy amin a makapadimlan kagagawa yo.+  Ta siopaman ya Israelita odino dayo a manaayam ed Israel ya onsian ed siak tan determinadon ontumbok ed saray makapadimlan idolo to tan mangiyan na pakagapolan a sengegay pankasalanan na totoo, insan sikatoy onlad sakey a propeta pian mantepet,+ siak, si Jehova, so onebat a mismo ed sikato.  Sumpaen ko itan a too tan gawaen kon panmadmaran tan pantotongtongan, tan sikatoy ekalen kod saray totook;+ tan naamtaan yo a siak si Jehova.”’  “‘Balet no samay propeta et apalikdo tan mangiter na ebat, siak a mismo, si Jehova, so amalikdo ed satan a propeta.+ Insan iyunat koy limak sumpad sikato tan sikatoy deralen ko manlapud saray totook ya Israel. 10  Akoen day kasalanan da; say kasalanan na samay mantetepet et mipara ed kasalanan na samay propeta, 11  pian say sankaabungan na Israel et agla onarawi ed siak tan agda la dutakay inkasikara lapud amin a kasalanan da. Tan sikaray magmaliw a totook, tan siak so magmaliw a Dios da,’+ so imbaga na Soberanon Katawan a Jehova.” 12  Tan oniay mensahe nen Jehova a sinmabi lamet ed siak: 13  “Anak na too, no say sakey a dalin et mankasalanan ed siak diad agto panmatoor, iyunat koy limak ed satan tan deralen koy suplay ton kakanen,*+ tan iyakar ko ditan so eras+ tan paandien ko ditan so too tan say ayep.”+ 14  “‘Anggano wadtan irayan taloran lalaki—si Noe,+ Daniel,+ tan Job+—sarili* da labat so niliktar da lapud inkatunong da,’+ so imbaga na Soberanon Katawan a Jehova.” 15  “‘Odino no bilang ta padalanen kod satan a dalin iray masesebeg ya atap ya ayep, tan paandien day totoo* ditan tan gawaen dan agla napanayaman tan anggapo lay ondalan ditan lapud saray atap ya ayep,+ 16  unong a mabilay ak,’ so imbaga na Soberanon Katawan a Jehova, ‘anggano wadtan irayan taloran lalaki, agda niliktar iray ananak dan lalaki odino bibii; niliktar da labat so inkasikara, tan satan a dalin et agla napanayaman.’” 17  “‘Odino no bilang ta iyakar kod satan a dalin so espada,+ tan ibagak: “Ondalan komon so espada ed satan a dalin,” tan paandien ko ditan so too tan say ayep,+ 18  anggano wadtan irayan taloran lalaki, unong a mabilay ak,’ so imbaga na Soberanon Katawan a Jehova, ‘agda niliktar iray ananak dan lalaki odino bibii; sarili da labat so niliktar da.’” 19  “‘Odino no bilang ta salot so iyakar kod satan a dalin+ tan iyibung ko ditan so sanok ko diad panamegley na pamaagus na dala, pian paandien ko ditan so too tan say ayep, 20  anggano wadtan si Noe,+ Daniel,+ tan Job,+ unong a mabilay ak,’ so imbaga na Soberanon Katawan a Jehova, ‘agda niliktar iray ananak dan lalaki odino bibii; sarili* da labat so niliktar da lapud inkatunong da.’”+ 21  “Ta oniay inkuan na Soberanon Katawan a Jehova: ‘Ontan so nagawa sano iyakar ko so apatiran pananusak*+—say espada, eras, masesebeg ya atap ya ayep, tan salot+—sumpad Jerusalem pian paandien ko ditan so too tan say ayep.+ 22  Balet arum a nakera et makaliktar tan ipaway ditan,+ namparan ananak a lalaki tan bibii. Onla rad sikayo, tan sano nanengneng yo iray dalan da tan saray kagagawa ra, naligliwa kayo anggaman ed kadederal ya indapok ed Jerusalem, anggaman ed amin a ginawak ed sikato.’” 23  “‘Naligliwa kayo sano nanengneng yo iray dalan da tan saray kagagawa ra, tan naamtaan yo a walay maabig a rason no akin a ginawak iya ed sikato,’+ so imbaga na Soberanon Katawan a Jehova.”

Paimanod leksab

Say Hebreon termino na saya et nayarin mikonektaan ed salita parad “tai na ayep” tan uusaren a panmudmora.
Literal, “erelen ko so abung na Israel ed kapusoan da.”
Literal, “puteren ko iray baston parad tinapay to.” Posiblin manutukoy ed saray baston a pangisasabitan na tinapay.
Odino “kamarerwa.”
Odino “paandien day ugugaw.”
Odino “kamarerwa.”
Odino “apatiran makaderal a panangukom ko.”