Ezequiel 38:1-23
38 Oniay mensahe nen Jehova a sinmabi lamet ed siak:
2 “Anak na too, iyarap moy lupam ed si Gog ed dalin na Magog,+ say manunan pangulo* na Mesec tan Tubal,+ tan manpropesiya ka sumpad sikato.+
3 Ibagam, ‘Oniay inkuan na Soberanon Katawan a Jehova: “Onsumpa ak ed sika, O Gog, say manunan pangulo* na Mesec tan Tubal.
4 Ipaarap ta kad sananey a dalan tan mangiyan ak na saray taga ed saray pangam+ tan ipaway ta kan kaiba so interon armadam,+ saray kabayo tan saray sundalon akakabayo, amin da et akakawes na marakdakep, sakey a baleg a grupon walaay angkabaleg a panagsamper tan saray panagsamben,* amin da et mamebemben na saray espada;
5 kaiba ray Persia, Etiopia, tan Put,+ amin da et walaay panagsamben tan hilmit;
6 say Gomer tan amin a sundalo to, say sankaabungan nen Togarma+ a nanlapud sankaarawian iran pasen ed amianen, a kaiba so amin a sundalo to—kaibam so dakerakel a totoo.+
7 “‘“Manparaan ka, tan iparaan yoy inkasikayo, sika tan amin ya armadam a kaibam a nantitipon, tan sika so magmaliw a komandante* ra.
8 “‘“Kayari na dakel ya agew, iteen kod sikay imanok.* Diad kayari na dakel a taon, lusoben mo so dalin a kawalaan na saray totoon nipawil tan akaliktar ed panagderal na espada, atipon ira manlapud dakel a totoo tan niyakar ira ed kapalandeyan na Israel, ya abayag ya aderal. Saray manaayam ed sayan dalin et natipon manlapud arum a totoo, tan amin da et manaayam ed kaligenan.+
9 Onsumpa kad sikara a singa sakey a bagyo, tan sakbongan mo so dalin a singa saray lurem, sika tan say amin a sundalom tan say dakerakel a totoon kaibam.”’
10 “Oniay inkuan na Soberanon Katawan a Jehova: ‘Diad satan ya agew et wala ray kanonotan ya onlad pusom, tan manggetma kay mauges.
11 Ikuan mon: “Lusoben ko so dalin a kawalaan na saray ayaman ya andiay proteksion.*+ Onsumpa ak ed saramay manaayam ed kaligenan tan andian na kapagaan, amin da et manaayam ed saray pasen ya ag-asalimbengan na padir, balewet, odino puerta.”
12 Say getmam et mangalay dakel a samsam, pian atakien mo iray aderal a pasen a panaayaman la natan+ tan saray totoo ya atipon lamet manlapud saray nasyon,+ saramay mantitipon na kayamanan tan kayarian,+ saramay manaayam ed pegley na dalin.
13 “‘Say Sheba+ tan Dedan,+ saray negosyante ed Tarsis+ tan amin a sundalo* to et ibaga ra ed sika: “Kasin onlulusob ka pian mangalay dakel a samsam? Kasin tinipon moy armadam pian mangibatik kay pilak tan balitok, mangalay kayamanan tan kayarian tan dakdakel a samsam?”’
14 “Kanian manpropesiya ka, anak na too, tan ibagam ed si Gog, ‘Oniay inkuan na Soberanon Katawan a Jehova: “Diad satan ya agew, seguradon naamtaan mo a say Israel a totook et manbibilay a maligen.+
15 Onsabi ka manlapud pasen mo, manlapud sankaarawian a parte ed amianen,+ sika tan say dakerakel a totoo a kaibam, amin da et akakabayo, sakey a baleg a grupo, sakey a baleg ya armada.+
16 Onsumpa kad Israel a totook, a singa saray lurem a manakbong ed dalin. Diad kaunoran iran agew, iyakar ta ka sumpad dalin ko,+ pian naamtaan na saray nasyon no siopa ak sano pasantosen koy inkasiak ed pakanengneng da ed panamegley mo, O Gog.”’+
17 “Oniay inkuan na Soberanon Katawan a Jehova: ‘Agta sika imay sinalitak ed saray lingkor kon propeta na Israel, ya impropesiya da ed dakerakel a taon a niyakar ka sumpad sikara?’
18 “‘Diad satan ya agew, say agew na ilusob nen Gog ed dalin na Israel,’ so imbaga na Soberanon Katawan a Jehova, ‘ondalang so baleg a sanok ko.+
19 Mansalita ak lapud sanok ko, lapud mandarlang a pasnok ko; tan diad satan ya agew et walay nagawan maksil a yegyeg ed dalin na Israel.
20 Lapud siak et onggiwgiw iray sira ed dayat, saray manok ed tawen, saray atap ya ayep ed uma, amin ya onkukurong ya ayayep* ed dalin, tan amin a katooan ed tapew na dalin, tan nakusbo iray kapalandeyan+ tan nageba iray kelas, tan natumba so amin a padir.’
21 “‘Tawagen koy sakey ya espada sumpad sikato ed amin a palandey ko,’ so imbaga na Soberanon Katawan a Jehova. ‘Say espada na balang sakey so onsumpa ed dilin agi to.+
22 Idapok ed sikato so panangukom ko ed panamegley na salot+ tan panamaagus na dala; tan say maksil ya uran, uran a kristal,+ apoy,+ tan asupre+ et papelagen kod sikato tan ed saray sundalo to tan ed saray dakerakel a totoon kaiba to.+
23 Tan itandorok tan pasantosen koy inkasiak tan ipakabat koy inkasiak ed pakanengneng na dakerakel a nasyon; tan naamtaan da a siak si Jehova.’
Paimanod leksab
^ Odino “manunan prinsipe.”
^ Odino “manunan prinsipe.”
^ Melag a panagsamper a kaslakan ya aawiten na saray managpana.
^ Literal, “guardia.”
^ Odino “patawag ta ka.”
^ Odino “saray ag-apadiran a baryo.”
^ Odino “a mabiskeg tan malangwer a leon.”
^ Odino “reptilya.”
