Ezekiel 31:1-18

  • Inkaplag na Ehipto, say atagtagey a sedro (1-18)

31  Diad koma-11 a taon, diad unonan agew na komatlon bulan et oniay mensahe nen Jehova a sinmabi lamet ed siak:  “Anak na too, ibagam ed Faraon ya ari na Ehipto tan ed dakerakel a totoo to,+‘Siopay miparad katagyan mo?   Walay sakey ya Asiryano, sakey a kiew a sedro ed Lebanon,A marakep iray sanga to a singa kakiewan a mangiiter na sirom, tan atagtagey;Sinmabi ed lurem so toktok to.   Binmaleg iya lapud saray danum, tinmagey iya lapud araralem a subol na danum. Saray kulos et walad kaliberliber na akataneman to;Saray aagusan na saratan so manasalog ed amin a kakiewan ed uma.   Kanian mas tinmagey itan nen say amin a kakiewan ed uma. Dinmakel tan dinmukey iray sanga toLapud dakel so danum ed saray kulos a kawalaan to.   Diad saray sanga to so nanubongan na amin a manok ed katawenan,Diad silong na saray sanga to so nan-anakan na amin ya atap ya ayayep ed uma,Tan diad sirom to so panaayaman na amin a matoon nasyon.   Nagmaliw itan a makapadinayew lapud karakpan to tan lapud karukey na saray sanga to,Ta saray lamot to et sinmabi ed dakel a danum.   Sikatoy agnaparaan na arum a kiew a sedro diad hardin na Dios.+Saray angkabaleg a sanga to et agnaparaan na saray kiew ya enebro, Tan saray sanga to et agnaparaan na saray kiew a platano. Anggapo lay arum a kiew ed hardin na Dios a makapipara ed inkarakep to.   Pinagmaliw ko itan a marakdakep tan mabulobulong,Tan makakaibeg ed sikato so amin a kakiewan ed Eden, say hardin na tuan Dios.’ 10  “Kanian oniay inkuan na Soberanon Katawan a Jehova: ‘Lapud nagmaliw itan* ya atagtagey, tan sinmabi ed lurem so toktok to, tan nagmaliw a mapaatagey so puso to lapud kaatagey to, 11  iyawat ko itan ed lima na makapanyarin manuley na saray nasyon.+ Sikatoy seguradon onkiwas sumpad satan, tan ipulisay ko itan lapud inkauges to. 12  Tan batangen itan na saray dayo, saray sankaruksaan ed saray nasyon, tan taynanan da itan diad kapalandeyan, tan napagpag iray bulong to diad amin a lawak, tan naputer iray sanga to ed kawalaan na amin a kulos na dalin.+ Amin a totoo ed dalin et ontaynan ed sirom to tan paulyanan da. 13  Diad atumban sengeg to so panayaman na amin a manok ed katawenan, tan diad saray sanga to so panayaman na amin ya atap ya ayayep ed uma.+ 14  Nagawa iya pian anggapoy kiew ed abay na saray danum ya ontagey a maong odino onsabi ed lurem so toktok to, tan anggapoy kiew a nasasalog a maong a makasabi ed kaatagey da. Ta ompatey iran amin, onla ra ed dalem na dalin, a kaiba iray anak na katooan ya onlalasur ed abot.’* 15  “Oniay inkuan na Soberanon Katawan a Jehova, ‘Diad agew na ilasur to ed Lubok* et panermenen ko ray totoo. Kanian, sakbongan ko so aralem a danum tan amperen ko iray kulos na satan pian ag-onagus so dakel a danum. Pabilungeten koy Lebanon lapud sikato, tan nalenes ya amin so kakiewan ed uma. 16  Diad ungol na pakatumba to et panmayegmegen ko iray nasyon sano iyabebak itan ed Lubok* a kaiba iramay amin ya onlalasur ed abot,* tan naligliwa ed dalem na dalin so amin a kakiewan ed Eden,+ saray sankarakepan tan sankaabigan ed Lebanon, saramay nasasalog a maong. 17  Linmasur ira a kaiba to diad Lubok,* diad saramay pinatey ed espada,+ a kaiba iramay mananulong* to a nanayam ed sirom to diad limog na saray nasyon.’+ 18  “‘Dinan ed saray kiew diad Eden so miparad sika ed gloria tan katagyan?+ Balet niyabeba kad dalem na dalin a kaiba iray kiew diad Eden. Ondukol kad limog na saramay ag-asegat, a kaiba iramay pinatey ed espada. Oniay nagawa ed Faraon tan ed dakerakel a totoo to,’ so imbaga na Soberanon Katawan a Jehova.”

Paimanod leksab

Literal, “ka.”
Odino “lubok.”
Odino “Sheol,” salanti, say lubok na katooan. Nengnengen so Glosaryo.
Odino “Sheol,” salanti, say lubok na katooan. Nengnengen so Glosaryo.
Odino “lubok.”
Odino “Sheol,” salanti, say lubok na katooan. Nengnengen so Glosaryo.
Literal, “taklay.”