Ezekiel 2:1-10

  • Aturoy Ezequiel bilang propeta (1-10)

    • “Balanglan ondengel ira odino andi” (5)

    • Nipanengneng so lukot ya akasulatan na saray kansion a tagleey (9, 10)

2  Insan oniay inkuan tod siak: “Anak na too,* alagey ka ta walay ibagak ed sika.”+  Sanen sikatoy nansalita, niwalad siak so espiritu tan pinaalagey ak na satan+ pian narengel ko imay mansasalita ed siak.  Inkuan tod siak: “Anak na too, ibaki ta kad saray totoo na Israel,+ diad saray nasyon a nanrebelde ed siak.+ Sikara tan saray inmuunan atateng da et nankasalanan ed siak anggad sayan mismon agew.+  Ibaki ta kad saray ananak ya agmanpasakop tan anawet-impanpuso,+ tan ibagam ed sikara, ‘Saya so inkuan na Soberanon Katawan a Jehova.’  Balanglan ondengel ira odino andi—ta rebelyoso ran sankaabungan+—naamtaan da a walay propeta ed limog da.+  “Balet sika, anak na too, agka ontatakot ed sikara,+ tan agmo tatakotan iray ibabaga ra, anggaman apaliberan ka na saray turok tan saray sabit*+ tan manaayam kad kawalaan na saray alakdan. Agmo tatakotan iray ibabaga ra,+ tan agka onkekebbiew ed saray lupa ra,+ ta rebelyoso ran sankaabungan.  Nepeg mon ibaga ed sikara iray salitak, ondengel man ira odino andi, ta rebelyoso ran totoo.+  “Balet sika, anak na too, dengel moy ibabagak ed sika. Agka manrerebelde a singa sayan rebelyoson sankaabungan. Sangi ka tan akan mo so iter kod sika.”+  Sanen ninmengneng ak, anengneng ko so sakey a lima ya akaunat ed siak,+ tan anengneng koy sakey ya asulatan a lukot*+ a sankaegnaan na satan. 10  Sanen binuskag to itan ed arapan ko, asulatan itan ed arap tan beneg.+ Akasulat ditan iray kansion a tagleey,* tan panermen tan pannangis.+

Paimanod leksab

“Anak na too”; say primero ed 93 ya akausaran na sayan balikas diad Ezequiel.
Odino posiblin, “anggaman benger iran totoo tan singa ra bengatlan manuturok ed sika.”
Odino “lukot na sakey a libro.”
Odino “iray kansion parad paneermen.”