Ezekiel 36:1-38

  • Propesiya nipaakar ed kapalandeyan na Israel (1-15)

  • Kipawil na Israel (16-38)

    • “Pasantosen ko so maglorian ngaran ko” (23)

    • “Singa hardin na Eden” (35)

36  “Balet sika, anak na too, manpropesiya ka nipaakar ed kapalandeyan na Israel, tan ibagam, ‘O kapalandeyan na Israel, dengel yoy salita nen Jehova.  Oniay inkuan na Soberanon Katawan a Jehova: “Imbaga na kabusol sumpad sikayo, ‘Saray atagey a pasen nensaman et akayarian tayo la!’”’+  “Kanian manpropesiya ka, tan ibagam, ‘Oniay inkuan na Soberanon Katawan a Jehova: “Lapud pinagmaliw da kan agnapanayaman tan inataki da ka ed amin a direksion, pian nakayarian ka na saray akaliktar* manlapud saray nasyon tan naynay kan pantotongtongan na saray totoo tan papaugesen da ka,+  kanian dengel yoy salita na Soberanon Katawan a Jehova, O kapalandeyan na Israel! Oniay inkuan na Soberanon Katawan a Jehova ed kapalandeyan tan saray pukdol, ed saray kulos tan lawak, ed saray aderal a pasen ya agla napanayaman,+ tan ed saray ataynanan a syudad a sinamsam tan binalawbalaw na saramay akaliktar ed saray nasyon a walad kaliberliber da;+  diad saraya et oniay inkuan na Soberanon Katawan a Jehova: ‘Diad mandarlang a sanok ko+ et mansalita ak ed saray akaliktar ed saray nasyon tan ed interon Edom, saramay angala ed dalin ko bilang kayarian da tekep na baleg a panliliket tan panagmudmora,*+ pian alaen day panagpastolan to tan samsamen da itan.’”’+  “Kanian manpropesiya ka nipaakar ed dalin na Israel, tan ibagam ed saray kapalandeyan tan saray pukdol, ed saray kulos tan saray lawak, ‘Oniay inkuan na Soberanon Katawan a Jehova: “Mansalita ak lapud baleg a sanok ko, ta inako yoy kababaingan a nanlapud saray nasyon.”’+  “Kanian oniay inkuan na Soberanon Katawan a Jehova: ‘Intagey koy limak pian mansamba ak ya akoen na saray nasyon a walad kaliberliber yo so dilin kababaingan da.+  Balet sikayo, O kapalandeyan na Israel, mamawala kayo na saray sanga tan manbunga kayo parad Israel a totook,+ ta asingger la ran ompawil.  Ta wala ak ed sikayo, tan imanoen ta kayo, tan sikayoy nadalusan tan nataneman na bini. 10  Parakelen koy totoom—say interon sankaabungan na Israel—tan napanayaman la iray syudad+ tan nipaalagey lamet iray aderal a pasen.+ 11  On, parakelen ko iray totoom tan ayayep mo;+ ondakel ira tan manbunga ra. Tan pagmaliwen ta kayon napanayaman a singa dati,+ tan paaligwasen ta kayo a mas ni nen inmuna;+ tan naamtaan yo a siak si Jehova.+ 12  Panakaren kod sikayo iray totoo—say Israel a totook—tan kayarianen da kayo.+ Magmaliw kayon tawir da, tan agyo lan balot paandien ed sikara so ananak da.’”+ 13  “Oniay inkuan na Soberanon Katawan a Jehova: ‘Lapud ibabaga rad sikayo, “Sakey kayon dalin a mangaakmon na saray totoo tan mamapaandi na saray ananak ed saray nasyon yo,”’ 14  ‘kanian agyo la akmonen iray totoo odino paandien iray ananak ed saray nasyon yo,’ so imbaga na Soberanon Katawan a Jehova. 15  ‘Agko la iyabuloy ya insultoen kayo na saray nasyon tan agyo la akoen so panagkantiaw na saray totoo,+ tan agkayo la pansengegan na pakagapolan na saray nasyon yo,’ so imbaga na Soberanon Katawan a Jehova.” 16  Tan oniay mensahe nen Jehova a sinmabi lamet ed siak: 17  “Anak na too, sanen say sankaabungan na Israel et manaayam ed dalin da, dinutakan da itan ed saray kagagawa tan pidedeneng da.+ Parad siak, saray kagagawa ra et singa say ag-inkamalinis lapud panreregla.+ 18  Kanian inkalbok so sanok kod sikara lapud dala ya impaagus dad sayan dalin,+ tan lapud dinutakan day dalin ed saray makapadimlan idolo* ra.+ 19  Kanian intaytayak ko rad saray nasyon tan dalin.+ Inukom ko ra unong ed kagagawa ra tan unong ed saray pidedeneng da. 20  Balet sanen sinmabi rad saratan a nasyon, pinabanday na totoo so masanton ngaran ko+ diad impangibaga ran, ‘Saraya so totoo nen Jehova, balet nakaukolan dan taynan so dalin to.’ 21  Kanian iyansakit koy masanton ngaran ko, a pinabanday na sankaabungan na Israel diad saray nasyon a nakar da.”+ 22  “Kanian ibagam ed sankaabungan na Israel, ‘Oniay inkuan na Soberanon Katawan a Jehova: “Onkiwas ak aliwan lapud sikayo, O sankaabungan na Israel, noagta lapud masanton ngaran ko, a pinabanday yo ed saray nasyon a nakar yo.”’+ 23  ‘Pasantosen ko so maglorian ngaran ko,+ ya apabanday ed saray nasyon, a pinabanday yo ed limog da; tan naamtaan na saray nasyon a siak si Jehova,’+ so imbaga na Soberanon Katawan a Jehova, ‘sano napasanto ak ed limog yo diad pakanengneng da. 24  Alaen ta kayo ed saray nasyon tan tiponen ta kayo manlapud amin a dalin tan iyakar ta kayo ed dalin yo.+ 25  Walsikan ta kayoy malinis a danum, tan magmaliw kayon malinis;+ linisan ta kayo ed amin a karutakan yo+ tan ed amin a makapadimlan idolo yo.+ 26  Ikdan ta kayoy balon puso+ tan iyan kod dalem yo so balon espiritu.+ Ekalen kod laman yo so puso a singa bato+ tan ikdan ta kayoy anlemek a puso.* 27  Iyan kod dalem yo so espirituk, tan pankurangen ta kayo ed saray totontonen ko,+ tan sumpalen yo tan gawaen yo iray ganggan ko. 28  Insan manayam kayo ed dalin ya inter kod saray inmuunan atateng yo, tan magmaliw kayon totook tan siak so magmaliw a Dios yo.’+ 29  ‘“Ibulos ta kayo manlapud amin a karutakan yo tan tawagen koy ilik tan parakelen ko, tan agko idapo ed sikayo so eras.+ 30  Parakelen koy bunga na kiew tan say aanien ed uma, pian agyo la nasagmak so kababaingan ed saray nasyon lapud eras.+ 31  Insan nanonotan yo iray mauges a dalan yo tan saray makapuy a kagagawa yo, tan busolen yon mismo so inkasikayo lapud saray kasalanan yo tan lapud saray makapadimlan kagagawa yo.+ 32  Balet amtaen yo iya: Agko iya gagawaen lapud sikayo,’+ so imbaga na Soberanon Katawan a Jehova. ‘Imbes, ombaing kayo komon tan liknaen yon nipaabeba kayo lapud saray dalan yo, O sankaabungan na Israel.’ 33  “Oniay inkuan na Soberanon Katawan a Jehova: ‘Diad agew a linisan ta kayo ed amin a kasalanan yo, pagmaliwen kon napanayaman la iray syudad+ tan nipaalagey lamet iray aderal a pasen.+ 34  Nataneman la so dalin ya agpanaayaman, a nagmaliw nensaman ya agpanaayaman pian nanengneng na amin ya ondadalan. 35  Tan ibaga na saray totoo: “Say dalin ya agpanaayaman et nagmaliw a singa hardin na Eden,+ tan saray syudad ya aderal tan agpanaayaman tan nagba et apadiran tan panaayaman la natan.”+ 36  Tan saray nasyon a nakera ed kaliberliber yo et naamtaan da a siak a mismo, si Jehova, so angipaalagey ed samay inggeba, tan tinaneman ko so dalin ya agpanaayaman. Siak a mismo, si Jehova, so angibaga, tan nanggawa ed satan.’+ 37  “Oniay inkuan na Soberanon Katawan a Jehova: ‘Abuloyan ko met a kerewen ed siak na sankaabungan na Israel a gawaen ko iya parad sikara: Parakelen ko iray totoo da a singa sakey a pulok. 38  Singa say pulok na saray masanto, singa say pulok ed Jerusalem* legan na saray panaon na piesta to,+ saray aderal a syudad et napano na saray pulok na totoo;+ tan naamtaan da a siak si Jehova.’”

Paimanod leksab

Literal, “na nakdaan; na saray akera.”
Odino “panagmudmoray kamarerwa.”
Say Hebreon termino na saya et nayarin mikonektaan ed salita parad “tai na ayep” tan uusaren a panmudmora.
Salanti, sakey a puson matulok ed panangiwanwan na Dios.
Odino posiblin, “Singa saray pulok na karnero ya ibabagat diad Jerusalem.”