Ezekiel 17:1-24

  • Say pabitla nipaakar ed duaran agila tan say sengeg na ubas (1-21)

  • Magmaliw a mabunabunan sedro so malangwer a simit (22-24)

17  Oniay mensahe nen Jehova a sinmabi lamet ed siak:  “Anak na too, mangibaga kay pabitla tan mangibalikas kay proverbio nipaakar ed sankaabungan na Israel.+  Ibagam, ‘Oniay inkuan na Soberanon Katawan a Jehova: “Say baleg ya agila,+ a walaan na angkakabaleg tan andurukey a payak, tan makakapal tan makolor a bago, so linmad Lebanon+ tan inekal toy toktok na kiew a sedro.+  Pinuter toy sankanguroan a simit na satan tan inawit tod dalin na saray negosyante* tan intanem to itan ed syudad na saray negosyante.+  Insan inala toy arum a bini ed saman a dalin+ tan inyan tod mabunan uma. Intanem to itan a singa kiew a sause ed abay na dakdakel a danum.  Diad saman et tinmubo itan tan nagmaliw ya abeba tan onkukurong a sengeg na ubas,+ a saray bulong to et ontutubon paloob, tan saray lamot to et ontutubo a paleksab. Kanian nagmaliw itan a sengeg na ubas tan atuboan na saray simit tan saray sanga.+  “‘“Tan sinmabi so sananey nin agila+ a walaay angkakabaleg tan andurukey a payak.+ Insan mapilit ya inggawat na sayan sengeg na ubas iray lamot to ed samay agila, a paarawi manlapud hardin ya akataneman to, tan inyunat na satan iray bulong to ed samay agila pian nasalog.+  Nitanem la itan ed maabig ya uma ed abay na dakdakel a danum, ta pian mansanga, manbunga, tan magmaliw a marakdakep a sengeg na ubas.”’+  “Ibagam, ‘Oniay inkuan na Soberanon Katawan a Jehova: “Ombuna ni kasi itan? Agta walay mamagot ed saray lamot to+ tan maneral ed saray bunga to tan mamalenes ed saray simit to?+ Namagaan itan a maong, kanian agla kaukolan so mabiskeg a taklay odino amayamay a totoo a mamagot ed satan ya anggad lamot. 10  Anggaman niyalis tan nitanem la itan, ombuna ni kasi? Agta sigpot itan a namagaan sano nasiplogan na dagem a nanlapud bukig? Namagaan itan diad hardin a tinuboan to.”’” 11  Tan oniay mensahe nen Jehova a sinmabi lamet ed siak: 12  “Ipangasim ya ibaga ed rebelyoson sankaabungan, ‘Agyo ta amtay kabaliksan na sarayan bengatla?’ Ibagam, ‘Say ari na Babilonia et linmad Jerusalem tan inala toy ari tan saray prinsipe ditan tan inawit to rad Babilonia.+ 13  Ontan met, inala to so sakey ed saray ilalak* na ari+ tan akisipanan ed sikato tan sikatoy impansamba to.+ Insan inala to ray prominentin lalaki na dalin,+ 14  ta pian niyabeba so panarian, tan agla makaalagey. Mansiansia labat itan no sumpalen to so impisipanan to.+ 15  Balet nanrebelde ed sikato so ari+ diad impangibaki tod saray mensahero ya onlad Ehipto, pian makala ed sikara na saray kabayo+ tan baleg ya armada.+ Kasin sikatoy ontalona? Kasin makaliktar ed dusa imay manggagawa ed sarayan bengatla? Nayarian to kasin deralen so sipanan tan siansia nin makaliktar?’+ 16  “‘“Unong a mabilay ak,” so imbaga na Soberanon Katawan a Jehova, “sikatoy ompatey ed Babilonia, diad pasen a panaayaman na samay ari* ya anuro ed sikato* a manari, sikato a nanleglemew ed samba to tan aneral ed impisipanan to.+ 17  Tan diad guerra et sikatoy agnatulongan na baleg ya armada tan dakerakel a sundalo na Faraon,+ sano wala la ray tambak a dalanen parad pangubkob tan nipaalagey iray padir a maneral ed dakerakel a bilay.* 18  Nileglemew toy sakey a samba tan dineral toy sakey a sipanan. Anta sikatoy nansipan la,* ginawa to nin siansia irayan amin a bengatla, kanian sikatoy agmakaliktar.”’ 19  “‘Kanian oniay inkuan na Soberanon Katawan a Jehova: “Unong a mabilay ak, iyakar kod ulo to iray pansumpalan na impanleglemew tod sambak+ tan impaneral tod sipanan ko. 20  Ibuntok koy iket ko ed sikato, tan naerel ed iket ko.+ Sikatoy awiten kod Babilonia tan ukomen ko diman lapud agnanmatoor ed siak.+ 21  Amin a tinmakas a kabiangan ed saray sundalo to et ompatey ed espada, tan saramay nakera et nitaytayak diad nanduruman direksion.*+ Insan naamtaan yo a siak a mismo, si Jehova, so angibaga.”’+ 22  “‘Oniay inkuan na Soberanon Katawan a Jehova: “Mangala ak na simit ed toktok na atagey a kiew a sedro+ tan itanem ko itan, mamuter ak na malangwer a simit ed nguro na saray sanga to,+ tan itanem ko itan ed atagey tan balbaleg a palandey.+ 23  Itanem ko itan ed atagey a palandey na Israel; tan mansanga, manbunga, tan magmaliw itan a mabunabunan kiew a sedro. Tan manayam ed silong to so amin a klase na manok tan manayam ira ed sirom na bulobulong to. 24  Tan naamtaan na amin a kakiewan ed uma a siak a mismo, si Jehova, so angiyabeba ed atagey a kiew tan angiyatagey ed abeban kiew;+ pinamagak so mabunan kiew tan pinabunak so amagan kiew.+ Siak a mismo, si Jehova, so angibaga tan nanggawa ed satan.”’”

Paimanod leksab

Literal, “dalin na Canaan.”
Literal, “bini.”
Salanti, si Nabucodonosor.
Salanti, si Zedekias.
Odino “kamarerwa.”
Literal, “inter toy lima to.”
Literal, “diad kada dagem.”