Ezequiel 6:1-14
6 Oniay mensahe nen Jehova a sinmabi lamet ed siak:
2 “Anak na too, iyarap moy lupam ed kapalandeyan na Israel tan manpropesiya ka sumpad sikara.
3 Oniay ibagam, ‘O kapalandeyan na Israel, dengel yoy salita na Soberanon Katawan a Jehova: Oniay inkuan na Soberanon Katawan a Jehova ed saray kapalandeyan, saray pukdol, saray kulos, tan saray lawak: “Iyakar kod sikayo so sakey ya espada, tan deralen ko ray atagey a pasen yo.
4 Nabuyak iray altar yo, naderal iray panagpoolan yoy insenso,+ tan ibantak ko iray pinatey ed sikayo diad arapan na saray makapadimlan idolo* yo.+
5 Ibantak ko iray bangkay na totoo na Israel diad arapan na saray makapadimlan idolo ra, tan itaytayak ko ray pukel yo ed kaliberliber na saray altar yo.+
6 Diad amin a panaayaman yo et naderal iray syudad+ tan nageba iray atagey a pasen tan nataynanan iratan.+ Nabuyak tan natemek iray altar yo, naandi iray makapadimlan idolo yo, naputerputer iray panagpoolan yoy insenso, tan naandi iray kimey na saray lima yo.
7 Tan saramay napatey et natumba diad pegley yo,+ tan naamtaan yo a siak si Jehova.+
8 “‘“Balet abuloyan kon walay nakera, ta arum ed sikayo et makaliktar ed espada diad saray nasyon sano nitaytayak kayod saray dalin.+
9 Tan saramay makaliktar et nanonotan da ak diad saray nasyon ya akaaripenan da.+ Naamtaan da a naermenan ak a maong lapud agmatoor* a puso ra a sinmian ed siak,+ tan saray mata ra a manpipilalek* ya ontumbok ed saray makapadimlan idolo ra.+ Ombaing ira tan busolen day amin a mauges tan makapadimlan ginawa ra.+
10 Naamtaan da a siak si Jehova tan aliwa labat a panaktakot iray pasakbay kon idapo so kadederal ed sikara.”’+
11 “Oniay inkuan na Soberanon Katawan a Jehova: ‘Tipak ka tan idepak moy salim tan panermenan mo so amin a mauges tan makapadimlan ginawa na sankaabungan na Israel, ta ompatey irad espada, eras, tan salot.+
12 Samay walad arawi et ompatey ed salot, samay walad asingger et ompatey ed espada, tan siopaman a makatakas ed saraya tan nakeraan et ompatey ed eras; tan iyupot koy sanok kod sikara.+
13 Tan naamtaan yo a siak si Jehova,+ sano saray napatey ed sikara et nitaytayak ed kawalaan na saray makapadimlan idolo ra, diad kaliberliber na saray altar da,+ diad saray atagey a pukdol, diad toktok na amin a kapalandeyan, diad kada silong na masalompapak a kiew, tan diad silong na saray sanga na angkakabaleg a kiew, a ditan da inyapay iray ambalingit ya bagat* pian napaliket day amin a makapadimlan idolo ra.+
14 Iyunat koy limak sumpad sikara tan say dalin da et gawaen kon agla napanayaman, a mas alodloor ni so kipapasen na amin a panaayaman da nen say kalawakan ya asingger ed Dibla. Tan naamtaan da a siak si Jehova.’”
