Salmo 64:1-10
-
Pangamlig sa mga pagsalakay
-
“Panaon sila sang Dios” (7)
-
Para sa pangulo sang musika. Salmo ni David.
64 O Dios ko, pamatii ang akon pangabay.+
Amligi ako sa makahaladlok nga mga pagsalakay sang akon kaaway.
2 Amligi ako sa likom nga mga plano sang mga malauton,+Batok sa grupo sang mga makasasala.
3 Ginabaid nila ang ila dila kaangay sang espada;Ginapuntariya nila ang ila masakit nga mga pulong kaangay sang mga baslay,
4 Agod panaon halin sa ila ginapanaguan ang isa nga wala sing sala;Ginapana nila sia sing hinali nga wala sing kahadlok.
5 Determinado sila sa ila malain nga tuyo;*Ginaplanuhan nila kon paano ibutang ang ila mga tugalbong.
Nagasiling sila: “Wala gid sing makakita sini.”+
6 Nagapangita sila sing bag-o nga mga paagi sa paghimo sing kalautan;Mahinalungon nila nga ginaplano ang ila tuso nga buko;+Ang panghunahuna sa tagsa ka tagipusuon sang tawo indi matungkad.
7 Apang panaon sila sang Dios;+Hinali lang nga mapilasan sila sang baslay.
8 Ang ila mismo dila ang mangin kabangdanan sang ila pagkapukan;+Ang tanan nga makakita sa ila magalungolungo.
9 Dayon ang tanan nga tawo mahadlok,Kag ipahayag nila ang ginhimo sang Dios,Kag mahangpan nila ang iya mga hinimuan.+
10 Ang matarong magakalipay kay Jehova kag magadangop sa iya;+Ang tanan nga may matarong nga tagipusuon magapabugal tuhoy sa Dios.
Footnote
^ Ukon “Ginapalig-on nila ang kada isa sa paghimo sang kalautan.”
