Salmo 59:1-17
Para sa pangulo sang musika; sa tono sang “Indi Paglaglaga.” Salmo ni David. Miktam.* Sang ginsugo ni Saul ang iya mga tinawo nga panilagan ang balay ni David agod patyon sia.+
59 O Dios ko, luwasa ako sa akon mga kaaway;+Amligi ako sa mga nagasumpong sa akon.+
2 Luwasa ako sa mga nagapanghalit,Kag sa mapintas* nga mga tawo.
3 Nagabantay sila agod patyon ako;*+Ginasalakay ako sang gamhanan nga mga tawoApang indi bangod sa akon pagrebelde ukon sala,+ O Jehova.
4 Bisan pa wala ako sing sala, nagahanda sila sa pagsalakay.
Magbugtaw ka kon magpanawag ako kag tan-awa kon ano ang nagakatabo sa akon.
5 Kay ikaw ang Dios sang Israel,+ O Jehova nga Dios sang mga kasuldadusan.
Magmata ka kag usisaa ang tanan nga pungsod.
Indi pagkaluy-i ang malaut nga mga maluibon.+ (Selah)
6 Nagabalik sila kada gab-i;+Nagangurob* sila nga daw mga ido+ kag nagalibot sa siudad.+
7 Tan-awa ang nagagua sa ila baba;Daw espada ang ila mga bibig,+Kay nagasiling sila: “Sin-o bala ang nagapamati?”+
8 Apang kadlawan mo sila, O Jehova;+Yagutaon mo ang tanan nga pungsod.+
9 O akon Kusog, magahulat ako sa imo;+Kay ang Dios ang akon malig-on nga dalangpan.*+
10 Ang Dios nga nagapakita sing mainunungon nga gugma magabulig sa akon;+Ipatan-aw sang Dios sa akon ang pagkalutos sang akon kaaway.+
11 Indi sila anay pagpatya, agod indi malipat ang akon katawhan.
Paagi sa imo gahom, paalaplaaga sila;Laglaga sila, O Jehova nga amon taming.+
12 Kay nagapakasala sila sa ila ginahambal,Kabay pa nga madakop sila sa ila pagkabugalon,+Bangod nagahambal sila sing pagpakamalaut kag pagpanglimbong.
13 Papasa sila sa imo kasingkal;+Papasa sila agod madula na sila;Ipakilala sa ila nga ang Dios nagagahom kay Jacob kag sa bug-os nga duta.+ (Selah)
14 Pabay-i nga magbalik sila kon gab-i;Pabay-i nga magngurob* sila nga daw ido kag maglibot sa siudad.+
15 Pabay-i nga magdalangdalang sila sa pagpangita sing pagkaon;+Indi pagtuguti nga mabusog sila ukon may mapaligaran sang gab-i.
16 Apang magaamba ako tuhoy sa imo gahom;+Sa aga isugid ko sing malipayon ang tuhoy sa imo mainunungon nga gugma.
Kay ikaw ang akon malig-on nga dalangpan+Kag ang lugar nga akon madangpan sa tion sang akon kalisdanan.+
17 O Dios ko nga akon Kusog, magaamba ako sing mga pagdayaw* sa imo,+Kay ang Dios amo ang akon malig-on nga dalangpan, ang Dios nga nagapakita sing mainunungon nga gugma sa akon.+
Footnote
^ Ukon “uhaw sa dugo.”
^ Ukon “ang akon kalag.”
^ Ukon “Nagataghol.”
^ Ukon “malig-on nga kahitaasan.”
^ Ukon “magtaghol.”
^ Ukon “magalanton ako.”
