Salmo 102:1-28
Pangamuyo sang isa nga ginapigos kon daw wala na sia sing mahimo* kag ginapabutyag niya kay Jehova ang iya mga kabalaka.+
102 O Jehova, pamatii ang akon pangamuyo;+Pamatii ang akon pagpangayo sing bulig sa imo.+
2 Indi paglipdi ang imo nawong sa akon sa tion sang akon kalisdanan.+
Pamatii ako;*Sabta ako gilayon kon magpanawag ako sa imo.+
3 Kay ang akon kabuhi nagakadula kaangay sang aso,Kag ang akon mga tul-an ginasunog kaangay sang pagsunog sa dalabukan.+
4 Ang akon tagipusuon daw hilamon nga ginhagbas kag nalayong,+Kay nadulaan ako sing gana magkaon.
5 Bangod sang akon matunog nga pag-ugayong,+Daw tul-an na lang ako nga ginaputos sang panit.+
6 Daw pispis ako nga pelikano sa kamingawan;Kaangay ako sang bukaw sa mga kagulub-an.
7 Indi ako makatulog;*Kaangay ako sang pispis nga nagaisahanon sa atop.+
8 Ginapakahuy-an ako sang akon mga kaaway sa bug-os nga adlaw.+
Ang mga nagayaguta sa akon* naggamit sang akon ngalan sa pagpakamalaut.
9 Kay ginkaon ko nga daw tinapay ang abo,+Kag nagsamo ang akon luha sa akon ginainom,+
10 Bangod sang imo kaakig kag kasingkal,Ginhakwat mo ako agod ihaboy lang.
11 Ang akon kabuhi kaangay sang landong nga nagakadula,*+Kag nagakalayong ako kaangay sang hilamon.+
12 Apang ikaw, O Jehova, nagakabuhi sa wala sing katubtuban,+Kag ang imo kadungganan* magapadayon sa tanan nga kaliwatan.+
13 Pat-od gid nga magahulag ka kag kaluy-an ang Sion,+Kay tion na nga ipakita sa iya ang imo kahamuot;+Nag-abot na ang gintalana nga tion.+
14 Kay ang imo mga alagad nalipay sa iya mga bato+Kag may paghigugma bisan sa iya yab-ok.+
15 Ang mga pungsod magakahadlok sa ngalan ni Jehova,Kag ang mga hari sang duta magakahadlok sa imo himaya.+
16 Kay tukuron liwat ni Jehova ang Sion;+Ipakita niya ang iya himaya.+
17 Pamatian niya ang pangamuyo sang mga imol;+Indi niya pagtamayon ang ila pangamuyo.+
18 Ginsulat ini para sa palaabuton nga kaliwatan,+Agod ang katawhan nga magakabuhi sa palaabuton* magadayaw kay Jah.
19 Kay nagatulok sia halin sa iya balaan nga kahitaasan,+Halin sa langit ginatan-aw ni Jehova ang duta,
20 Agod pamatian ang pag-ugayong sang mga bilanggo,+Agod hilwayon ang mga ginpamatbatan sing kamatayon,+
21 Agod ang ngalan ni Jehova mapahayag sa Sion+Kag ang iya kadayawan sa Jerusalem,
22 Kon ang katawhan kag ang mga ginharianMagtipon na sing tingob sa pag-alagad kay Jehova.+
23 Temprano pa niya ako ginpaluya;Ginpalip-ot niya ang akon kabuhi.
24 Nagsiling ako: “O Dios ko,Indi pagkuhaa ang akon kabuhi samtang bataon pa ako,Ikaw nga nagakabuhi sa tanan nga kaliwatan.+
25 Sang una nga panahon ginpasad mo ang mga sadsaran sang duta,Kag ang mga langit binuhatan sang imo mga kamot.+
26 Magataliwan sila, apang ikaw magapabilin;Kaangay sang panapton magadaan sila.
Kaangay sang panapton islan mo sila, kag mapatay sila.
27 Apang ikaw amo man gihapon, kag wala ka sing katapusan.+
28 Ang mga anak sang imo mga alagad magakabuhi sing malig-on,Kag ang ila kaliwatan magapabilin nga may kalig-unan sa imo atubangan.”+
