Same 89:1-52
Na Masikili* nei Icani+ na kai Sira.
89 Au na seretaka na dei ni loloma i Jiova me tawamudu.
Na gusuqu ena vakatakila na nomuni yalodina ina itabatamata kece.
2 Niu sa kaya: “Na loloma e dei ena tu ga me tawamudu,+Oni sa vakataudeitaka tale ga e lomalagi na nomuni yalodina.”
3 “Au sa cakava e dua na veiyalayalati kei koya na noqu digitaki,+Au sa bubului vei Tevita na noqu dauveiqaravi:+
4 ‘Au na vakataudeitaka na nomu kawa+ me tawamudu,Au na qai vakatubura na nomu idabedabe vakaturaga ena itabatamata kece ga.’”+ (Sela)
5 Na lomalagi e vakacaucautaka nomuni cakacaka totoka, i Jiova,Io, na nomuni yalodina ena ivavakoso ni yalosavasava.
6 O cei e lomalagi e rawa ni vakatauvatani kei Jiova?+
O cei vei ira na luve ni Kalou+ e vakataki Jiova?
7 Sa qoroi na Kalou ena isoqosoqo ni yalosavasava,+E cecere qai vakatubuqoroqoro vei ira kece na wavokiti koya.+
8 I Jiova na Kalou ni lewe vuqa,*O cei e qaqa vakataki kemuni, i Ja?+Na nomuni yalodina e wavokiti kemuni.+
9 Oni lewa na wasawasa voravora,+Ni tubu na kena biau, oni vakamaravutaka.+
10 Oni qaqi Reapi+ vaka e dua e vakamatei.+
Oni vakavuna mera veiseyaki na kemuni meca ena ligamuni kaukaua.+
11 Na lomalagi e nomuni, na vuravura tale ga e nomuni,+Na vanua bulabula kei na veika e tu kina+—oni tauyavutaka.
12 Na vualiku kei na ceva—oni bulia,O Tepori+ kei Erimoni+ ena vakacaucautaka na yacamuni ena marau levu.
13 E qaqa na ligamuni,+E kaukaua na ligamuni,+E vakacerecerei na ligamuni imatau.+
14 Na yalododonu kei na lewadodonu e yavu ni nomuni idabedabe vakaturaga,+Na loloma e dei kei na yalodina e tu e matamuni.+
15 Era marau na tamata era kila na kaila ni marau.+
Kemuni Jiova, era lako voli ena rarama ni matamuni.
16 Era marau vakalevu ena siga taucoko ena vuku ni yacamuni,Era vakacerecerei tale ga ena nomuni yalododonu.
17 Ni o kemuni na lagilagi ni nodra kaukaua,+Sa vakacerecerei tale ga na neimami kaukaua* ena nomuni veivakadonui.+
18 Ni nei Jiova na noda isasabai,Na noda tui e nei koya na Yalosavasava ni Isireli.+
19 Ena gauna oya oni vosa ena raivotu vei ira na nomuni yalodina qai kaya:
“Au sa solia na kaukaua vei koya na qaqa,+Au sa vakacerecerea e dua na digitaki mai na kedra maliwa na tamata.+
20 Au sa kunei Tevita na noqu dauveiqaravi,+Au lumuti koya ena noqu waiwai tabu.+
21 Na ligaqu ena tokoni koya,+Na ligaqu tale ga ena vakaukauataki koya.
22 Ena sega ni vakaukauataki koya na meca me solia na ka e lavaki,Qai sega ni vakasaurarataki koya e dua na tamata tawayalododonu.+
23 Au na vurumemeataka mai matana na kena meca+Qai mokuti ira na cati koya.+
24 E tiko kei koya na noqu yalodina kei na loloma e dei,+Qai vakacerecerei na nona kaukaua ena yacaqu.
25 Au na biuta na ligana* e dela ni wasawasaKei na ligana imatau ena dela ni uciwai.+
26 Ena kaci yani vei au o koya: ‘O kemuni na Tamaqu,Noqu Kalou kei na Uluvatu e vakabulai au.’+
27 Au na biuti koya tale ga me ulumatua,+Me cecere duadua vei ira na tui kei vuravura.+
28 Au na saga me dei tiko vua na noqu loloma me tawamudu,+Na noqu veiyalayalati tale ga kei koya ena sega vakadua ni guce.+
29 Au na vakataudeitaka na nona kawa me tawamuduQai cakava na nona idabedabe vakaturaga me tudei me vaka na lomalagi.+
30 Ke ra biuta noqu lawa na luvenaQai sega ni muria noqu ivakaro,*
31 Ke ra beca na noqu lawaQai sega ni muria na noqu ivakaro,
32 Au na qai totogitaka ena kau na nodra talaidredre*+Kei na nodra cala ena kuita.
33 Ia au na sega vakadua ni biuta na dei ni noqu loloma vua+Se meu lasu ena noqu yalayala.*
34 Au na sega ni vakacacana noqu veiyalayalati+Se veisautaka na ka sa cavuta na tebenigusuqu.+
35 Au sa bubului ga vakadua ena noqu savasava,Au na sega ni vosa lasu vei Tevita.+
36 Na nona kawa ena tu ga me tawamudu,+Na nona idabedabe vakaturaga ena tu ga me vaka na matanisiga e mataqu.+
37 Ena vakataudeitaki me tawamudu me vaka na vula,Me vaka na ivakadinadina yalodina e macawa.” (Sela)
38 Ia o kemuni sara ga, oni sa viritaki koya laivi qai cati koya,+Sa waqa na nomuni cudru vua na nomuni lumuti.
39 Oni sa cata na nomuni veiyalayalati kei na nomuni dauveiqaravi,Oni sa vakacacana na nona isala vakatui ni oni viritaka ina qele.
40 Oni sa basuraka sobu na nona baivatu kece,*Oni sa vakarusa na nona bainivalu me irusarusa.
41 O ira kece na tavali era butakoci koya,Era beci koya na wekana.+
42 Oni sa cakava mera qaqa na kena meca,*+Oni sa vakavuna mera marau vakalevu na kena meca kece.
43 Oni sa cemuria lesu na nona iseleiwau,Oni qai vakavuna me sega ni qaqa ena ivalu.
44 Oni sa mai vakaotia na kena totokaQai kolotaka na nona idabedabe vakaturaga ina qele.
45 Oni sa vakalekalekataka na nona gauna ni cauravou,Oni sa vakaisulutaki koya ena madua. (Sela)
46 Kemuni Jiova ena vakacava na dede ni nomuni vunitaki kemuni tiko? Ena tawamudu?+
Ena waqa tiko ga na nomuni cudru me vaka na bukawaqa?
47 Ni nanuma ni lekaleka na noqu bula!+
Vakacava, e sega ni vakainaki na nomuni bulia na tamata kece?
48 O cei na tamata e rawa ni bula qai sega vakadua ni raica na mate?+
Ena rawa ni vakabulai koya ga mai na kaukaua ni iBulubulu?* (Sela)
49 I Jiova, i vei na dei ni nomuni loloma e liu,Oni a bubuluitaka vei Tevita ena nomuni yalodina?+
50 Ni nanuma, i Jiova, na veivakanini e tau vei ira na nomuni dauveiqaravi,Na noqu vosota voli* na nodra dau veivakanini na matatamata kece,
51 Nodra tauca na kemuni meca na vosa ni veibeci, i Jiova,Na nodra beca na weniyavana kece na nomuni lumuti.
52 Me vakacaucautaki mada ga o Jiova me tawamudu. Emeni, Emeni.+
iVakamacala e ra
^ Raica na iVakamacala ni Vosa.
^ Qo na mataivalu vakalomalagi.
^ Ipe., “neimami ileu.”
^ Se “lewa.”
^ Se “lewa.”
^ Se “veivorati.”
^ Ipe., “Se veivakaisini noqu yalodina.”
^ Se “nona ivakaruru vatu.”
^ Ipe., “mera laveta cake na ligadra imatau na kena meca.”
^ Ipe., “na liga i Seoli.” oya na ibulubulu ni kawatamata. Raica na iVakamacala ni Vosa.
^ Ipe., “noqu roqota e lomaserequ.”
