Same 55:1-23
Vei koya na dairekita, me salavata na ivakatagi vakawa. Masikili.* Na same i Tevita.
55 Ni rogoca na noqu masu, kemuni na Kalou,+Kua tale ga ni vakawaletaka na noqu kerekere meu lomani.*+
2 Ni kauaitaki au mai, ni rogoci au tale ga.+
Au masa voli ena noqu lomaleqa,+Qai nuiqawaqawa
3 Ena vuku ni ka e tukuna na mecaKei na veivakasosani ni daucaka ca.
Nira binia vei au na leqa,Era cudru qai kubuta voli nodra yalocataki au.+
4 Na lomaqu sa yaluma mai loma,+Qai tuburi au na rerevaka na mate.+
5 Sa yacovi au na rere kei na sautaninini,Au qai sokonu.
6 Au vuki kaya: “Keu vakatabana mada ga me vaka na ruve!
Au na vuka tani qai lai tiko ena vakacegu.
7 Raica! Au na vuka sara vakayawa.+
Au na tiko ena vanua talasiga.+ (Sela)
8 Au na kusa sara ina vanua ni vakaruruE yawa mai na cagi tataba, yawa mai na draki ca.”
9 I Jiova, ni vakasesei ira, ni vakaseva na nodra inaki,*+Niu sa raica na itovo kaukaua kei na veileti ena koro.
10 Ena siga kei na bogi era lako voli ena kena bai,E yaco tu e loma na vakatubuca kei na leqa.+
11 Sa tu ga kina na vakacaca,Na veivakalolomataki kei na lawaki e sega vakadua ni biuta na kena rara.+
12 Ni sega ni meca o koya e vakasewasewani au,+Ke meca, au rawa ni vosota.
E sega ni meca o koya e saqati au tiko,Ke meca, keu a vunitaki au mai vua.
13 Ia o iko, o tamata ga vakataki au,*+O noqu itokani, au kilai iko vinaka.+
14 Daru dau marautaka na nodaru veitokani,Daru dau taubale vata kei ira na ilala levu ina vale ni Kalou.
15 Me toboki ira o rusa!+
Mera siro bulabula ina iBulubulu,*Ni tu ena kedra maliwa na ca, e lomadra tale ga.
16 Ia o yau, au na kaci yani vua na Kalou,Ena qai vakabulai au o Jiova.+
17 Ena yakavi kei na mataka, ena sigalevu tale ga, au lomaleqa voli qai vutugu,*+E qai rogoca o koya na domoqu.+
18 Ena vakabulai* au o koya qai vakacegui au vei ira na valuti au tiko,Nira lako mai e le levu mera saqati au.+
19 Ena rogoca na Kalou qai sauma vei ira,+O koya e dabe toka ena idabedabe vakatui mai na veigauna makawa.+ (Sela)
Era na bese ni veisau,O ira na sega ni rerevaka na Kalou.+
20 E vala kei ira na veiyaloni kei koya,*+E beca na nona veiyalayalati.+
21 Na nona vosa e malumu sara mai na bata,+Ia e tu e lomana na veileti.
Na nona vosa e vinaka sara mai na waiwai,Ia era iseleiwau sa ucuni tu.+
22 Biuta* vei Jiova na nomu icolacola bibi,+Ena tokoni iko o koya.+
Ena sega vakadua ni laiva me bale na yalododonu.*+
23 Ia o kemuni na Kalou, oni na biuti ira sobu ina qara titobu duadua.+
O ira na beitaki ena vakadavedra kei ira na tamata daulawaki ena sega ni veimama na nodra siga ni bula.+
Ia o yau, au na vakararavi vei kemuni.
iVakamacala e ra
^ Raica na iVakamacala ni Vosa.
^ Se “Kua tale ga ni vunitaki kemuni niu masuta na veivuke.”
^ Ipe., “wasea na yamedra.”
^ Se “dua na tamata, keirau tautauvata ga.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Se “au sega ni tiko dei.”
^ Ipe., “voli au lesu.”
^ Qori na nona itokani makawa e cavuti ena tikina e 13 kei na 14.
^ Ipe., “Viritaka.”
^ Se “me tataivatia, taceba.”
