Same 64:1-10
-
Taqomaki mai na vere lo
-
“Kalou ena vanai ira” (7)
-
Vei koya na dairekita. Na sere i Tevita.
64 Kemuni na Kalou, ni rogoca na domoqu niu vakamamasu.+
Ni taqomaka noqu bula vei ira na meca vakadomobula.
2 Taqomaki au mai na nodra bukivere lo na daucaka ca,+Mai vei ira na ilala levu daucaka cala.
3 Era vagata na yamedra me vaka na iseleiwau,Era dodoka nodra vosa tawaloloma me vaka na gasau,
4 Mera vanai koya e sega ni cala mai na vanua era vuni tu kina,Era vanai koya vakasauri nira sega ni rere.
5 Era dei ena nodra inaki ca,*Era veivosakitaka mera vunia vakacava nodra dai.
Era kaya: “O cei ena raici ira?”+
6 Era qara na sala vovou ni cakacala,Era bulia lo na nodra lalawa qaseqase,+E sega ni katumi rawa na nanuma ni lomadra.
7 Ia ena vanai ira na Kalou,+Era na mavoa vakasauri ena gasau.
8 Na yamedra ga ena vakavuna nodra bale,+O ira kece na raica era na kurea na uludra.
9 Ena tuburi ira kece na rere,Era na tukuna tale ga na ka e sa cakava na Kalou,Era na qai kila na nona ivalavala.+
10 Ena marautaki Jiova vakalevu na yalododonu qai vakaruru vua,+Era na reki* o ira kece e dodonu na lomadra.
