Same 51:1-19
Vei koya na dairekita. Na sere i Tevita, ni veiyacovi oti kei Pacisepa+ o Tevita qai lako mai vua o Necani na parofita.
51 Kemuni na Kalou, ni lomani au me vaka na dei ni nomuni loloma.+
Ni bokoca laivi noqu cala me vaka na nomuni yalololoma levu.+
2 Ni vakasavasavataki au vinaka mai na noqu cala,+Qai vakasavasavataki au mai na noqu valavala ca.+
3 Niu kila vinaka na noqu cala,Qai tu ga e mataqu* na noqu ivalavala ca.+
4 Vei kemuni—vei kemuni duadua ga—au sa valavala ca kina,+Au sa cakava na ka ca e matamuni.+
Oni yalododonu gona ni oni vosa,E dodonu na nomuni lewa.+
5 Raica! Au beitaki ena cala niu sucu mai,Qai kunekunetaki au o tinaqu ena ivalavala ca.*+
6 Raica! Oni marautaka na ka dina e tu e loma ni tamata,+Ni vakavulica i lomaqu* na vuku dina.
7 Ni vakasavasavataki au ena isopi mai na noqu valavala ca, meu savasava kina,+Ni vui au, meu vulavula cake mai na ucacevata.+
8 Ni laiva meu rogoca na rorogo ni reki kei na marau levu,Mera na marau kina na sui oni a qaqia.+
9 Ni vagolea tani* na matamuni mai na noqu ivalavala ca,+
Qai qusia laivi* na noqu cala kece.+
10 Ni bulia na lomaqu me savasava, kemuni na Kalou,+Qai biuta e lomaqu e dua na yalo vou,+ na kena e tudei.
11 Ni kua ni viritaki au laivi mai matamuni,Kua tale ga ni kauta tani vei au na yalomuni tabu.
12 Ni vakalesuya vei au na marau levu ena nomuni veivakabulai,+Ni uqeta na lomaqu meu talairawarawa vei kemuni.*
13 Au na vakavulici ira na dau talaidredre ena nomuni sala,+Mera lesu tale vei kemuni o ira na valavala ca.
14 Ni vakabulai au mai na veibeitaki ni vakadavedra,+ kemuni na Kalou, na noqu Kalou ni veivakabulai,+Me marau na yamequ ni tukuna na nomuni yalododonu.+
15 I Jiova, ni dolava na tebenigusuqu,Me tukuna yani na gusuqu na kemuni lagilagi.+
16 Ni oni sega ni vinakata na isoro—ke sega au na solia,+Oni sega ni marautaka na isoro kama taucoko.+
17 Na isoro e talei vua na Kalou na yalo e ramusu,Na uto e kavoro qai bibivoro, kemuni na Kalou, oni na sega ni cata.*+
18 Ena nomuni yalovinaka ni cakava na ka e vinaka vei Saioni,Ni tara cake na bai kei Jerusalemi.
19 Oni na qai marautaka na isoro ni yalododonu,Na isoro kama kei na isoro taucoko,Ena qai cabori na bulumakau tagane ena nomuni icabocabonisoro.+
iVakamacala e ra
^ Se “e noqu vakasama.”
^ Se “Qai valavala ca mai na gauna e kunekunetaki au kina o tinaqu.”
^ Se “vakavulica na tikiqu vuni.”
^ Se “Ni vunia na matamuni.”
^ Se “Qai bokoca laivi.”
^ Ipe., “Moni tokoni au ena yalorawarawa.”
^ Se “beca.”
