Same 69:1-36
Vei koya na dairekita vakarautaki ina “Lili.” Na same i Tevita.
69 Kemuni na Kalou, ni vakabulai au ni sa ririkotaki noqu bula ena vuku ni wai.+
2 Au sa lutudromu sara ina lolobo, e sega kina na qele kaukaua.+
Au sa yaco mai na wai titobu,Qai kauti au laivi na kui ni wai.+
3 Au sa oca na kaci,+Sa droga mai na noqu itilotilo.
Sa malumalumu na mataqu niu waraka tiko na noqu Kalou.+
4 O ira na cati au ni sega na vuna+E levu mai na iwiliwili ni drauniuluqu.
O ira na via kauti au tani,Na kequ meca dauveivakaisini,* era sa lewe levu mai.
Au vakasaurarataki meu solia na ka au sega ni butakoca.
5 Kemuni na Kalou, oni sa mai kila na noqu lialia,Qai sega ni vunitaki vei kemuni na noqu cala.
6 Mera kua ni vakamadualaki ena vukuqu o ira na vakanuinui vei kemuni,Kemuni na Turaga Cecere Duadua, i Jiova ni lewe vuqa.*
Mera kua ni vakalolovirataki ena vukuqu o ira na vakasaqarai kemuni,Kemuni na Kalou ni Isireli.
7 Au vosataki ena vukumuni,+E madua kina na mataqu.+
8 Au sa mai kaitani vei ratou na taciqu,Au vulagi vei ratou na luvei tinaqu.+
9 Sa kani au na noqu yalogu me baleta na nomuni vale,+Qai tau vei au na nodra vosavakacaca o ira na vosavakacacataki kemuni.+
10 Niu yalomalumalumu meu lolo,*Au vosataki kina.
11 Niu dara na isulutaga,Era beci* au.
12 Au sa ka ni veitalanoa vei ira na dabe voli ena matamatanikoro,Era qai seretaki au na daumateni.
13 Ia me yaco yani vei kemuni na noqu masu,Kemuni Jiova, ena kena gauna donu.+
Ena levu kei na dei ni nomuni loloma, kemuni na Kalou,Ni rogoci au ni dau dina nomuni veivakabulai.+
14 Ni vueti au mai na soso,Kua ni laiva meu dromu kina.
Ni vakabulai au vei ira na cati auMai na wai titobu tale ga.+
15 Ni kua ni laiva me kuitaki au na wai ni waluvu,+Se me tilomi au na wai titobu,Se me sogoti au na gusu ni toevu.*+
16 Ni rogoci au, i Jiova, ni vinaka na dei ni nomuni loloma.+
Ni golevi au mai ni levu na nomuni yalololoma,+
17 Ni kua tale ga ni vunia na matamuni vua na nomuni dauveiqaravi.+
Ni rogoci au vakatotolo, niu sa rui rarawa.+
18 Ni volekati au mai qai vakabulai au,Ni vakabulai au ena vukudra na kequ meca.
19 Oni kila na noqu vosavakacacataki, noqu vakalolovirataki kei na noqu vakamadualaki.+
Oni raici ira kece na kequ meca.
20 Na vosavakacaca e sa voroka na utoqu, qai sega ni mavo rawa na mavoa.*
Au nuitaka tiko meu lomani, ia e sega,+Me so tale ga na dauveivakacegui, ia au sega ni kunea e dua.+
21 Ia era solia vei au na poisoni* me kakana,+Era qai solia vei au na viniqa meu gunuva+ niu karamaca.
22 Me coriti ira na nodra teveli,Me coriti ira na nodra tikovinaka.+
23 Me butobuto mai na matadra mera kua ni rai rawa,Qai vakavuna me dau sautaninini na dibidra.
24 Sovaraka vei ira na nomuni cudru,Me qai tau vei ira na nomuni cudru waqawaqa.+
25 Laiva nodra keba* me laladidi mai,Me kua ni tawani na nodra valelaca.+
26 Nira cemuri koya oni mokuta,Ra qai talanoataka na nodra rarawa o ira oni vakamavoataka.
27 Ni vakalevutaka na nodra cala,Me kua tale ga ni dua na nodra iwasewase ena nomuni yalododonu.
28 Mera bokoci mai na nodra ivola na bula,*+Mera kua tale ga ni volai ena kedra maliwa na yalododonu.+
29 Ia au sa vakaloloma qai vakila na mosi.+
Me taqomaki au na nomuni kaukaua dauveivakabulai, kemuni na Kalou.
30 Au na sere ena vakacaucau ina yaca ni Kalou,Qai vakalagilagi koya ena vakavinavinaka.
31 Ena vakamarautaki Jiova vakalevu qo mai na dua na bulumakau tagane,Mai na dua tale ga na luvenibulumakau tagane e vakaileu qai vakaququ.+
32 Na yalomalua ena raica qai marau vakalevu.
O kemuni na vakasaqara tiko na Kalou, me vakabulabulataki tale na lomamuni.
33 Ni o Jiova e rogoci ira na dravudravua,+Ena sega ni beci ira na nona tamata era vesu tu.+
34 Me vakacaucautaki koya na lomalagi kei na vuravura,+Na wasawasa kei na ka kece era veitosoyaki kina.
35 Ni na vakabulai Saioni na Kalou+Ena qai tara tale na koro kei Juta,Era na tiko kina qai taukena.*
36 Era na taukena na kawa ni nona dauveiqaravi,+Era na tiko tale ga kina o ira na taleitaka na yacana.+
iVakamacala e ra
^ Se “Na kequ meca e sega na vuna mera meca kina.”
^ Qo na mataivalu vakalomalagi.
^ Se rawa ni, “Niu tagi qai lolo.”
^ Ipe., “vosa vakaibalebale.”
^ Se “qara.”
^ Se “au qai tini yalolailai.”
^ Se “na kau gaga.”
^ Se “keba vakabai.”
^ Se “mai na ivola ni bula.”
^ Oya na vanua.
