Baana-bahulu, baokameli ba mupotoloho, ofisi ya mutai, ni Sitopa Sesietelela hañata balufanga ketelelo yelutusa kusebeleza hande Jehova. Kono fokuñwi lwakona kupalelwa kuutwisisa libaka halufilwe ketelelo yeñwi. Lwakona kukakanya ka za haiba ketelelo yeo yakona kulutusa. Mane lwakona kukala kuisa hahulu pilu kwa bufokoli bwa mizwale baba lufile ketelelo yeo. Haluzamaya ka tumelo, lukasepa kuli Jehova ki yena yaetelela kopano yahae ni kuli waziba miinelo yelukopana ni yona. Kabakaleo, lukalatelela kapili ketelelo yelufiwa ni kuba ni mubonelo oswanela. (Maheb. 13:17) Lwaziba kuli haiba lulatelela ketelelo, lukatahisa kuli mwa puteho kube ni swalisano. (Maef. 4:​2, 3) Nihaike kuli mizwale baba luetelela habasika petahala, lunani sepo ya kuli Jehova uka lufuyaula haiba luipeya kuutwa. (1 Sam. 15:22) Ka nako yeswanela, uka lukisa lika kaufela zetokwa kulukiswa. w25.03 23-24 ¶13-14

Lupila mwa linako zetabisa luli! Zazi ni zazi luiponela bupolofita bwa mwa Bibele habunze butalelezwa. Ka mutala, lwaiponela “mulena wa kwa mutulo” ni “mulena wa kwa mboela” habanze balwanisana kuli babe ni maata a kubusa lifasi. (Dan. 11:​40, litaluso ze kwatasi) Lwaiponela taba yende ya Mubuso wa Mulimu inze ikutazwa hahulu kufita kwamulaho, mi batu babañata basweli baamuhela taba yeo. (Isa. 60:22; Mat. 24:14) Mi lusweli kufiwa lico za kwa moya zeñata “ka nako yeswanela.” (Mat. 24:​45-47) Jehova uzwelapili kulutusa kuutwisisa hande likezahalo za butokwa zetuha liezahala. (Liprov. 4:18) Lwakona kukolwa kuli pili ñalelwa yetuna isika kalisa kale, lukaziba lika kaufela zelutokwa kuziba kuli luzwelepili kuitiisa ka busepahali ni kuzwelapili kuswalisana ka nako yetaata yeo. Nihakulicwalo, luswanela kuhupula kuli kunani lika zeñwi zelusa zibi ka za lika zekaezahala kwapili. w24.05 8 ¶1-2

Muñoli wa samu ye, ubulela ka kunonga ka za kusawana mutu yomuñwi. Kusawana mutu kutalusañi? Hañata kutalusa kubulela litaba za buhata zekona kusinya libizo la mutu yomuñwi. Liñolo la Samu 15:​3, hape liluhupulisa kuli baenyi ba Jehova habaezangi maswe batu babañwi mi habasinyangi balikani babona libizo. (Samu 15:1) Lukona kusinya cwañi babañwi libizo? Ka kusalela, lwakona kusinya mutu yomuñwi libizo ka kubulela litaba zemaswe ka za hae. Halunyakisiseñi mitala yelatelela: (1) kaizeli yomuñwi utuhela kuba mwa sebelezo ya nako kaufela, (2) muzwale ni musalaa hae batuhela kusebeleza fa Betele, kamba (3) muzwale yomuñwi haasa sebeza sina muuna-muhulu kamba sikombwa sa puteho. Kana kwaswanela kubulelela babañwi litaba zesina hande bupaki ka za libaka hakubile ni licinceho zeo? Kukona kuba ni mabaka amañata elusa zibi atahisize kuli kube ni licinceho zeo. Kutuha fo, muenyi mwa tende ya Jehova “haaezi maswe mutu yomuñwi, mi haasinyi balikani bahae libizo.” w24.06 11 ¶11-13

Kuli lusabe hahulu Jehova, luswanela kunahana ka za moluka mutabiseza mwa likatulo kaufela zelueza. Hamubala taba yeñwi ya mwa Bibele, muipuze kuli, ‘Kambe nenili mwa muinelo wo, ki katulo mañi yene nikaeza?’ Ka mutala, muunge kuli musweli kuteeleza kwa manduna ba Isilaele baalishumi habanze bafa piho yabona yemaswe hamulaho wa kutwela naha ili yeo Jehova naasepisize kufa Maisilaele. Kana nemuka lumela piho yabona ni kukenelwa ki sabo ya kusaba batu, kamba kana lilato lamina ku Jehova ni takazo yamina ya kumutabisa nelika tahisa kuli muhane piho yeo? Lusika lwani kaufela lwa Maisilaele nelupalezwi kulemuha kuli Joshua ni Kalebu nebabulela niti. Kabakaleo, Jehova naasika lumeleza Maisilaele bao kukena mwa Naha ya Sepiso.—Num. 14:​10, 22, 23. w24.07 10 ¶7

Gomere, yena musalaa mupolofita Hosea, asiya Hosea ni kukala kupila ni muuna usili. Kana naasakoni kucinca? Jehova, yena yaziba ze mwa lipilu, naabulelezi Hosea kuli: “Zamaya hape, uyo lata musali yalatwa ki muuna usili ili yaeza bubuki, uyo mulata sina Jehova mwalatela sicaba sa Isilaele bona niha basikuluhela kwa milimu isili.” (Hos. 3:1; Liprov. 16:2) Mulemuhe kuli musalaa Hosea naasaeza sibi sesituna. Kono Jehova naabulelezi Hosea kuli amuswalele ni kupila ni yena hape sina musalaa hae. Ka kuitusisa mutala wo, Jehova naabata kutusa batu bahae kuziba mwanaaikutwela ka za bona. Nihaike kuli nebasa eza libi zetuna, naasa balata mi naazwezipili kubatusa kuli babake ni kucinca mupilelo wabona. Mutala wo ubonisa kuli Jehova, “yena yatatuba lipilu,” ukatusa mutu yasaeza sibi sesituna kuli abake. w24.08 10 ¶7

Majuda bane babile Bakreste nebakopani ni butata bobutuna. Ka nako yeñwi, Majuda nebabanga sicaba sa Jehova sesiketilwe. Jerusalema neli ona muleneñi mone babuseza malena bane bayemela Jehova, mi tempele neli sona sibaka sesituna sene balapelelanga ku sona Jehova ka nzila yelukile. Majuda babasepahala kaufela nebamamela Mulao wa Mushe ni milao yene balutiwa ki baeteleli ba bulapeli bwabona. Milao yeo neiama lico zene baswanela kuca, mubonelo wabona ka za mupato, ni mone baswanela kuswalisanela ni batu bane basi Majuda. Kono hamulaho wa lifu la Jesu, Jehova naatuhezi kuamuhela matabelo ane bafanga Majuda. Kacwalo, nesi nto yebunolo kuli Majuda bane babile Bakreste bacince mone balapelelanga. (Maheb. 10:​1, 4, 10) Nihaiba Bakreste babahulile kwa moya babacwale ka muapositola Pitrosi, neku babezi taata kuamuhela zeñwi za licinceho zeo. (Lik. 10:​9-14; Magal. 2:​11-14) Bakreste bao nebanyandisizwe hahulu ki baeteleli ba bulapeli bwa Sijuda, kabakala tumelo yabona yenca. w24.09 9 ¶4

Nako kaufela Jehova hafa batu bahae musebezi omuñwi, ubatanga kuli baupete ka nzila yeonga-ongilwe hande. (1 Makor. 14:33) Ka mutala, Mulimu ubata kuli taba yende ikutazwe mwa lifasi kaufela. (Mat. 24:14) Jehova uketile Jesu kuli aetelele musebezi wo. Jesu uboni teñi kuli musebezi wo waeziwa ka nzila yeonga-ongilwe hande. Mwa linako za baapositola, hane kutomilwe liputeho mwa libaka zeshutana-shutana, baana-bahulu nebaketilwe kuli bafe litaelo ni kuetelela mwa liputeho. (Lik. 14:23) Mwa Jerusalema nekunani sikwata sa baana-bahulu mone kufumaneha ni baapositola, mi nebaezanga likatulo zeñwi zenetokwa kulatelelwa ki liputeho kaufela. (Lik. 15:2; 16:4) Bakeñisa kuli mizwale ni likaizeli nebamamezi litaelo zene bafilwe, “liputeho zazwelapili kutiiswa mwa tumelo mi palo ya balumeli yazwelapili kuekezeha.”—Lik. 16:5. w24.04 8 ¶1

La Nisani 16, isali kakusasana luli, basali basikai babasepahala baya kwa sibaka kwa naabulukilwe Jesu. (Luka 24:​1, 10) Halunyakisiseñi zeneezahezi ku yomuñwi wa basali bao, yena Maria Magdalena. Maria haafita kwa libita, afumana kuli situpu sa Jesu hasiyo mwateñi. Akuta kuyo taluseza Pitrosi ni Joani mi kihona abalatelela hane banze bamatela kwa libita. Hase baikolwisize kuli libita nelili mukungulu, baana bao bakutela mwa muleneñi. Kono Maria asiyala. Azwelapili kuyema kwa libita inzaa lila. Jesu naamubona nihaike kuli Maria naasika lemuha taba yeo. Naalemuhile miyoko ya musali yasepahala yo mi naabata kumuomba-omba. Kacwalo, abonahala ku Maria mi kihona aeza nto yeñwi yene mususuelize hahulu. Aambola ni yena mi amufa musebezi wa butokwa, ili wa kuyo taluseza banyani bahae ka za zuho yahae.—Joa. 20:​17, 18. w24.10 13 ¶7

Mushe naali mupolofita, muatuli, mueteleli wa mpi, ni muñoli. Naaetelezi sicaba sa Isilaele kuzwa mwa butanga kwa Egepita mi naaiponezi limakazo za Jehova zeñata. Jehova naaitusisize yena kuñola libuka zapili zeketalizoho mwa Bibele, Samu 90, mi kubonahala kuli ni Samu 91. Mi hape kubonahala kuli ki yena yanaañozi ni buka ya Jobo. Mushe hanaanani lilimo ze 120, ili nakonyana pili asika shwa kale, naakopanyize Maisilaele kaufela ni kubahupulisa lika zene baiponezi ni zanaa baezelize Jehova. Nebaiponezi lisupo zeñata ni limakazo zanaaezize Jehova ni mwanaafezi koto kwa Maegepita. (Exo. 7:4) Nebazamaile fa mubu oomile Jehova hanaakauhanyize mezi a Liwate Lelifubelu mi nebaiponezi mpi ya Faro haiyundiswa. (Exo. 14:​29-31) Hane bali mwa lihalaupa, Jehova naabasilelelize ni kubababalela. (Deut. 8:​3, 4) Kacwalo, Maisilaele hane batuha bakena mwa Naha ya Sepiso, Mushe naaitusisize kolo yeo kubasusueza. w24.11 8-9 ¶3-4

Zanaabulelezi baapositola bahae Jesu ka nako ya Mulalelo wa Mulena lishutanela kwahule ni zanaabulelezi batu babañata mwa Galilea, ili litaba zene lisaami feela kwa sikwata silisiñwi. Jesu hanaali mwa Galilea ka 32 C.E., naaambola sihulu kwa Majuda bane babata kuli abafe sinkwa. Nihakulicwalo, naahohezi mamelelo yabona kwa nto yeneli ya butokwa hahulu kufita sico sa luli. Naabatusize kuutwisisa zenekona kubatusa kufumana bupilo bobusa feli. Mane Jesu naabulezi kuli babashwile bakazusiwa fa lizazi la mafelelezo ni kupila kuya kuile. Naasaami kwa batu basikai feela babaketilwe, kamba kwa palonyana ya batu, sina mwanaaezelize hasamulaho ka nako ya Mulalelo wa Mulena. Kono mwa Galilea naabulezi za mbuyoti yene bakona kufumana batu kaufela. w24.12 11 ¶10-11

Jehova utoile mutu kaufela yalata lindwa. (Samu 11:5) Jehova uikutwanga hahulu bumaswe sihulu haiba muuna anyandisa musalaa hae. (Mala. 2:16) Haiba muuna anyandisa musalaa hae, silikani sahae ni Mulimu sikasinyeha. Mane Jehova wakona kutuhela kuutwa litapelo zahae. (1 Pit. 3:7) Baana babañwi baambolanga ni basali babona ka buhali mi baitusisanga lipulelo zeutwisa butuku. Kono Jehova utoile “buhali, mabifi, kutatauka, ni lipulelo zemaswe.” (Maef. 4:​31, 32) Muuna yaambolanga ni musalaa hae ka buhali, usinya linyalo lahae mane ni silikani sahae ni Mulimu. (Jak. 1:26) Ki nto yeswana ni muuna yanani mukwa wa kubuha maswaniso a mapunu. Ni yena usinya silikani sahae ni Jehova. Hape ushwaula musalaa hae. Jehova ubata kuli baana bazwelepili kusepahala kwa basali babona ka lika zebaeza ni zebanahana. Jesu naabulezi kuli muuna yatalima musali ka kumulakaza seabukile kale ni yena “mwa pilu yahae.”—Mat. 5:​28, 29. w25.01 9 ¶6-8

Kubeiwa babalukile kutalusa kuli libi zaluna liswalezwi mi halutokwi kulilifela. Nihaike kuli Jehova waezanga cwalo, usazwelapili kukumalela kwa likuka zahae ka za katulo yelukile. Haalubeyi babalukile kabakala buikatazo bwaluna; mi haatuheleli libi zaluna. Kono Jehova wakona kuswalela libi zaluna kabakala tumelo yaluna mwa tukiso ya kukwahela libi ni tiululo yenelifilwe. (Maro. 3:24) Kubeiwa babalukile ki Jehova kulutusa cwañi? Babaketilwe kuli bayo busa ni Jesu kwa lihalimu babeilwe kale kuba babalukile sina bana ba Mulimu. (Tite 3:7; 1 Joa. 3:1) Libi zabona liswalezwi. Kuswana feela inge kuli nebasika eza sibi, mi baswanela luli kuyo busa mwa Mubuso. (Maro. 8:​1, 2, 30) Babanani sepo ya kuto pila fa lifasi babeilwe babalukile sina balikani ba Mulimu, mi libi zabona liswalezwi.—Jak. 2:21-23. w25.02 5 ¶17-18

Halunyakisiseñi muinelo ulimuñwi, ili fo muapositola Pitrosi naapalezwi kunahana sina mwanahanela Jehova. Jesu naataluselize balutiwa bahae kuli naaswanela kuya kwa Jerusalema, kuyo fiwa mwa mazoho a baeteleli ba bulapeli, kunyandiswa ni kubulaiwa. (Mat. 16:21) Pitrosi naaziba kuli Jesu neli yena Mesia yanaasepisizwe, ili yanaaka pilisa batu ba Mulimu; kacwalo, neku mubezi taata kuutwisisa kuli Jehova naakatuhelela Jesu kubulaiwa. (Mat. 16:16) Kacwalo, Pitrosi aisa Jesu kwatuko ni kumubulelela kuli: “Mulena, hakuikutwele butuku; taba yeo haina kuezahala ku wena.” (Mat. 16:22) Jesu ni Pitrosi nebasika lumelelana mwa taba ye, kakuli Pitrosi naasanahani sina mwanaanahanela Jehova. Kubonahala kuli Pitrosi naanani milelo yeminde, kono Jesu naahanile kelezo yahae. Lwakona kuituta tuto ya butokwa kwa taba yeo. Tato ya Jehova neli kuli Jesu anyandiswe ni kubulaiwa. Mwa muinelo wo, Pitrosi naaitutile tuto ya butokwa ka za kunahana sina mwanahanela Mulimu. w25.03 9 ¶5-6

Kana mulobehile pilu kabakala kusaezwa hande kamba kabakala kubetekiwa ki mutu yene musepile? Kusina taba ni mwamiezelize mutu yomuñwi, Ndataa mina wa kwa lihalimu wamilata. Haiba mutu yomuñwi ulubetekile, lwakona kuomba-ombiwa ki manzwi a Davida a mwa liñolo la zazi la kacenu. Hatiso yeñwi neibulezi kuli pulelo yeli, “babaswabile,” ikona kuama kwa “batu babafelezwi ki sepo.” Jehova utusanga cwañi batu babaikutwa cwalo kabakala kuezwa maswe? Ka kuswana ni mushemi yalilato, ili yaswalanga mwanaa hae yaziyelehile mwa mazoho ni kumuomba-omba, Jehova “ufakaufi” ni luna; kamita walubonisanga mukekecima mi uitukiselize kulutusa haluswabile kabakala kubetekiwa kamba kuyubekiwa. Uitukiselize kuluomba-omba halulobehile pilu ni haluikutwa kuli halu ba butokwa. Mi ulufile sepo yende ya za kwapili yelutusa kutiyela miliko yelukopana ni yona ka nako ya cwale.—Isa. 65:17. w24.12 23 ¶13-14

Baana-bahulu kacenu bakona kukolwa kuli Jehova wabonanga misebezi yabona yeminde mi waitebuha yona. Kwandaa kueza musebezi wa bulisana, kuluta, ni kukutaza, baana-bahulu babañata batusanga mwa misebezi ya buyahi ni kutusa babatahezwi ki likozi. Babañwi ba mwa Likwata za Kupotela Bakuli kamba mwa Tutengo Totuswalisanisa Lipaki ni ba Sipatela. Baana-bahulu babaifananga kueza misebezi yeo baanga puteho kuli ki ya Jehova. Baeza misebezi yabona ka moyo wabona kaufela mi banani buikolwiso bobutezi bwa kuli Mulimu uka bafa mupuzo kabakala lika kaufela zebaeza (Makolo. 3:​23, 24) Haki batu kaufela babakona kuba baana-bahulu. Kono kaufelaa luna kunani nto yeñwi yelukona kufa Jehova. Mulimu waluna waitebuhanga halu musebeleza ka molukonela kaufela. Walemuhanga linubu zelufanga kwa musebezi wa mwa lifasi kaufela, nihaikaba kuli ki zenyinyani. Mi watabanga halutuhelela baba lufoselize ni kubaswalela. Mukolwe kuli waitebuha zemukona kueza. Wamilata kabakala lika zemueza mi uka mifa mupuzo.—Luka 21:​1-4. w24.06 23 ¶12-13

Likande la Salumoni libonisa zekona kuezahala ku mutangaa Jehova kaufela. Wakona kueza sibi sesituna mi hasamulaho ukona kuikutwa kuli lika neliezahalile kapili-pili. Kamba ukona kubulela kuli, “Niezize sibi ka kusalela.” Kono haiba aitekula habuniti, wakona kulemuha kuli kunani likatulo zeñwi zemaswe zanaaezize zenetahisize kuli aeze sibi. Likatulo zeo likona kuba kuswalisana ni batu babamaswe, kuitabisa ka lika zemaswe, kucindanelanga kwa libaka zemaswe, kamba kupotelanga mawebusaiti amaswe. Mwendi hape naatuhezi kulapelanga, kubala Bibele, kufumaneha kwa mikopano, kamba kuya mwa bukombwa. Sina mutangana yabulezwi kwa Liproverbia, kukona kuba kuli kunani likatulo zeñwi zemaswe zanaaezize zenetahisize kuli aeze sibi. Luitutañi? Haluswaneli kueza sibi kamba lika zekona kutahisa kuli lueze sibi. Salumoni naakoñomekile taba yeo hamulaho wa kubulela.—Mat. 5:​29, 30. w24.07 16 ¶10-11

Bufumu bo ki nto mañi? Ki musebezi otusa batu kufumana bupilo, ona wa kukutaza lushango lwa Mubuso. (2 Makor. 4:1) Lipiza za lizupa liyemelañi? Liyemela batanga ba Mulimu babakutazanga taba yende ku babañwi. Mwa mazazi a Paulusi, balekisi nebaitusisanga lipiza za lizupa kuli balwale lika za butokwa zecwale ka lico, waine, ni masheleñi. Ka mukwa oswana, Jehova ulufile musebezi wa butokwa hahulu, ona wa kukutaza taba yende. Ka tuso ya Jehova, lwakona kuba ni maata elutokwa kuli luzwelepili kukutaza. Ka linako zeñwi, lwakona kukenelwa ki sabo ya kusaba batu kamba kuikalelwa kuli mwendi habana kuteeleza kwa lushango lwaluna. Lukona kufelisa cwañi butata bo? Halunyakisiseñi zene babulezi baapositola mwa tapelo hane balaezwi kuli batuhele kukutaza. Kufita kukenelwa ki sabo, nebakupile Jehova kuli abatuse kuzwelapili kubulela ka bundume Jehova naaalabile tapelo yabona honafo feela. (Lik. 4:​18, 29, 31) Haiba mukenelwa ki sabo ka linako zeñwi, mukupe Jehova kuli amituse kulata hahulu batu, ilikuli mufelise sabo ya kusaba batu. w24.04 16 ¶8-9

Lilato laluna ku Jehova lilususuezanga kukenisa libizo lahae. Lubata kuabana mwa musebezi wa kukenisa libizo la Mulimu, ili kutaluseza batu kuli litaba zabulezi Satani ka za Jehova ki za buhata. (Gen. 3:​1-5; Jobo 2:4; Joa. 8:44) Haluli mwa bukombwa, lunyolelwanga hahulu kubonisa kuli lu kwa lineku la Mulimu, ka kutaluseza batu kaufela babatabela kuteeleza niti ka za hae. Lubata kuli batu kaufela bazibe kuli kalemeno kahae kakatuna ka kufitisisa ki lilato, kuli nzila yabusa ka yona ki yende mi ilukile, ni kuli hona cwale-cwale fa, Mubuso wahae ukafelisa manyando kaufela ni kutusa batu kuba mwa kozo ni kuba ni tabo. (Samu 37:​10, 11, 29; 1 Joa. 4:8) Haiba lutaluseza batu mwa bukombwa litaba zeo ka za Jehova, lukenisa libizo lahae. Hape lunani tabo kakuli lwaziba kuli lueza zeluswanela kueza ka kuba Lipaki za Jehova. w24.05 18 ¶12

Mizwale, mubonisa kuli munani “moya wa kuamuhela baenyi” hamuezeza babañwi lika zende, kukopanyeleza cwalo ni babasi balikani bamina babatuna. (1 Pit. 4:9) Dikishinari yeñwi ya Bibele neibulezi kuli mutu yanani moya wa kuamuhela baenyi ubonisanga sishemo nihaiba kwa batu basazibi mi wabamemelanga kwa ndu yahae. Muipuze kuli, ‘Kana nizibahala ka kuba mutu yalata kuamuhela baenyi?’ (Maheb. 13:​2, 16) Mutu yanani moya wa kuamuhela baenyi waikabelanga zanani zona ni baenyi, kukopanyeleza cwalo ni batu bamayemo a kwatasi ni batanga ba Jehova babasebeza ka taata babacwale ka baokameli ba mupotoloho ni babuleli babapoti.—Gen. 18:​2-8; Liprov. 3:27; Lik. 16:15; Maro. 12:13. w24.11 21 ¶6

Mwa nguli ya basizana, Jesu naabulezi za basizana baalishumi bane baile kuli bayo katanyeza munyali. (Mat. 25:​1-4) Kaufelaa bona nebabata kusindeketa munyali kwa mukiti wa linyalo. Jesu naatalusize kuli baketalizoho ku bona nebanani “kutwisiso” mi babañwi baketalizoho neli “likuba.” Basizana babanani kutwisiso nebaitukiselize mi nebazwezipili kulibelela munyali, mane niha naakataha fahalaa busihu. Kacwalo, nebalwezi lilambi za mafula kuli lituse kwa liseli ka nako ya busihu. Mane nebalwezi mafula amañwi kuli bakone kuitusisa ona haiba munyali aliyeha. Kacwalo, nebaitukiselize kuli lilambi zabona lizwelepili kutuka. (Mat. 25:​6-10) Munyali hapunya, basizana babanani kutwisiso baya ni yena kwa mukiti wa linyalo. Ka nzila yeswana, Bakreste babatozizwe bababonisa kuli baitukiselize ka kuzwelapili kutona ni kusepahala kufitela Kreste ataha, bakaatulwa kuli baswanela kuba ni munyali, yena Jesu, mwa Mubuso wahae kwa lihalimu.—Sin. 7:​1-3. w24.09 21 ¶6

Halunahanisisa mo musebezi wa kukutaza usweli kutuseza batu babañata kacenu, lususuezwa kuzwelapili kukutaza ka tukufalelo. Silimo ni silimo, batu babañata bafumanehanga kwa Kupuzo ni kuituta Bibele ni luna. Hape batu babañata bakolobezwanga ni kuswalisana ni luna mwa musebezi wa kukutaza. Haluzibi kuli ki batu babakai babasa kona kuamuhela taba yende, kono lwaziba kuli Jehova usweli kukubukanya buñata bobutuna bwa batu, ili babaka punyuha ñalelwa yetuna. (Sin. 7:​9, 14) Jehova ki yena Muñaa kutulo mi unani buikolwiso bwa kuli batu babañata bakaamuhela taba yende; kacwalo, lukazwelapili kukutaza. (Luka 10:2) Balutiwa ba Jesu ba niti bazwezipili kukutaza taba yende ka tukufalelo. Batu hane baboni baapositola inze babulela patalaza, “balemuha kuli nebabanga ni Jesu.” (Lik. 4:13) Ni luna luswanela kukutaza ka bundume ni ka tukufalelo, ilikuli batu baba lubona balemuhe kuli lulikanyisa Jesu. w25.03 18 ¶15; 19 ¶17-18

Mwa Bibele, luituta kuli Jehova walemuhanga batu babaangiwa ki batu babañwi kuli haki ba butokwa. Ka mutala, Jehova naalumile mupolofita Samuele kwa ndu ya Jese kuli ayo toza yomuñwi wa bana bahae babashimani kuli kwapili abe mulena wa Isilaele. Jese naanani bana babashimani ba 8, kono naabizize feela fa 7 kuli bato kopana ni Samuele, mi naasika biza Davida yanaali mwanana ku bona. Niteñi, Davida ki yena yanaaketilwe ki Jehova. (1 Sam. 16:​6, 7, 10-12) Jehova naaziba hande Davida mi naalemuhile kuli neli mutangana yanaaitebuha hahulu lika za kwa moya. Munahanisise mwamiboniselize Jehova kuli wamiisa pilu. Umifanga kelezo yemutokwa luli. (Samu 32:8) Taba yeo ibonisa kuli wamiziba hande. (Samu 139:1) Haiba musebelisa kelezo yamifa Jehova ni kubona moi mituseza, mukakolwa kuli Jehova wamiisa pilu. (1 Makol. 28:9; Lik. 17:​26, 27) Jehova walemuhanga buikatazo bomueza. Hape walemuhanga tulemeno twamina totunde mi ubata kuba mulikanaa mina.—Jer. 17:10. w24.10 25-26 ¶7-9

Kusina kukakanya, mwalata Jehova mi mubata kusebeleza babañwi. Ki lika mañi zekona kumitusa kuba ni takazo yetuna ya kusebeleza babañwi? Munahane ka za tabo yetuna yemukaba ni yona haiba musebeleza mizwale ni likaizeli bamina. Jesu naabulezi kuli: “Kunani tabo yetuna mwa kufana yefita ye mwa kufiwa.” (Lik. 20:35) Mi Jesu naapilile ka kulumelelana ni manzwi ao. Naabile ni tabo yetuna kabakala kusebeleza babañwi. Halunyakisiseñi mutala okwa liñolo la Mareka 6:​31-34. Ka nako ye, Jesu ni baapositola bahae nebakatezi hahulu. Nebaya kwa sibaka kone kusina batu kuli bayo pumula hanyinyani. Kono balakiwa ki batu babañata bane babata kulutiwa ki Jesu. Naakona kuhana. Kakuli mane yena ni balikani bahae “nebasina nako ya kuishumusa kuli bace sico.” Jesu hape naakona kufundula sicaba hamulaho wa kubataluseza litaba lisikai feela za mwa Mañolo. Kono kabakala kususuezwa ki lilato, “akala kubaluta” kufitela ‘nako ifela.’—Mare. 6:35. w24.11 16 ¶9-10

Bashemi, mutuse mwanaa mina kufumana linzila zakona kutaluseza ka zona babañwi ka za Bibele. (Maro. 10:10) Mwakona kubapanya kuambola ni babañwi ka za Bibele kwa kuituta mwa kulizeza siliziso sesiñwi. Kwa makalelo, muituti ukalanga kuituta kuliza lipina zebunolo. Nako hainze iya, kuka mubela hahulu bunolo kuliza lipina. Ka nzila yeswana, Mukreste yasali yomunca wakona kukala kukutaza ka nzila yebunolo. Ka mutala, wakona kubuza yakena ni yena sikolo kuli: “Kana waziba kuli ba sayansi hañata balikanyisanga lika zebupilwe habapanga lika? Kashe nikubuhise vidio yetabisa ye.” Hamulaho wa kubuhisa yeñwi ya mavidio a mwatasaa taba yeli, Kana ki Nto Yenebupilwe?, wakona kumubuza kuli: “Haiba wa sayansi yalikanyisize nto yeñwi walumbiwa, kana musimululi wa nto yelikanyisizwe yeo yena haswaneli kufiwa tumbo?” Kukutaza ka nzila yebunolo yeo kwakona kutusa mutu yasali yomunca kuba ni takazo ya kubata kuituta zeñata. w24.12 19 ¶17-18

Kuli Jehova alulukulule kwa sibi ni lifu, naalukisize kuli Jesu afane bupilo bwahae sina tiululo. Kono sitabelo sa mutu alimuñwi yapetahalile sikona kuliulula cwañi batu babañata-ñata? Muapositola Paulusi utalusa kuli: “Sina babañata hababile baezalibi kabakala kusautwa kwa mutu alimuñwi [yena Adama], ka mukwa oswana babañata bakaba babalukile kabakala kuutwa kwa mutu alimuñwi hape [yena Jesu].” (Maro. 5:19; 1 Tim. 2:6) Ka mubulelelo omuñwi, kabakala kusautwa kwa mutu alimuñwi yanaapetahalile, nelubile batanga ba sibi ni lifu. Kacwalo, nekutokwahala mutu yomuñwi yapetahalile kuli alulukulule. Kana Jehova naasakoni kuatula feela kuli bana ba Adama ba lipilu zende bapile kuya kuile? Ka kuba batu babasika petahala, lukona kunahana kuli yeo neikaba nzila yende ya kutatulula ka yona butata. Kono kueza cwalo nekusike kwalumelelana ni katulo ya Jehova yelukile. Bakeñisa kuli Jehova ulukile, naasike atuhelela feela kusautwa kwa Adama. w25.01 21 ¶3-4

Nako yeñwi, muapositola Paulusi naaziba kuli naatuha abulaiwa, kono naanani tabo mwa bupilo. Naabulezi kuli: “Nimatile mwa siyano kuyo fita kwa mafelelezo, nibulukile tumelo.” (2 Tim. 4:​6-8) Paulusi naaezize katulo yende ya kusebeleza Jehova, mi naanani buikolwiso bwa kuli naamutabisize. Ni luna lubata kueza likatulo zende ni kutabisa Mulimu. Lukona kueza cwañi cwalo? Paulusi naabulezi ka za hae ni Bakreste babañwi babasepahala kuli: “Luzamaya ka tumelo, isiñi ka kubona.” Mwa Bibele linzwi la ‘kuzamaya’ fokuñwi liitusiswanga kuama kwa mupilelo wa mutu. Mutu hazamaya ka tumelo, uezanga likatulo zebonisa kuli usepile Jehova Mulimu. Likezo zahae libonisa kuli ukozwi kuli Mulimu uka mufa mupuzo, ni kuli ukatusiwa hahulu haiba asebelisa kelezo ya Jehova ye mwa Linzwi lahae.—Samu 119:66; Maheb. 11:6. w25.03 20 ¶1-2

Ka kutusiwa ki moya wa Mulimu, batu babañata bane bali ba mifilifili, bane banani buhali, kamba bane basasepahali bakonile kueza licinceho zetuna mwa bupilo bwabona. (Isa. 65:25) Basebelize ka taata kuli batuhele mikwa yemaswe yene banani yona. (Maef. 4:​22-24) Kono niti kikuli, batu ba Mulimu habasika petahala; kacwalo, lukazwelapili kueza mafosisa. Nihakulicwalo, Jehova uswalisanisize “batu ba mufuta kaufela,” mi ubatusize kulatana hahulu ni kupilisana ka kozo. (Tite 2:11) Yeo ki makazo luli, mi Mulimu Yamaata Kaufela ki yena feela yakona kueza cwalo! Manzwi ahae atalelezwanga kamita. (Isa. 55:​10, 11) Paradaisi ya kwa moya iteñi ka nako ya cwale. Jehova utahisize kuli kube ni lubasi lwa kwa moya loluipitezi. Kabakala kuli lu mwa lubasi lo, lunani kozo yetuna ka nako ya cwale mi luikutwa kusilelezwa mwa lifasi lelitezi mifilifili le. (Samu 72:7) Kabakaleo, lubata kutusa batu babañata hahulu kuli bato swalisana ni lubasi lwaluna lwa kwa moya. Lukona kueza cwalo ka kuisa pilu kwa musebezi wa kuluta batu kuba balutiwa.—Mat. 28:​19, 20. w24.04 23 ¶13, 15

Jesu naalatile Jehova ka munahano wahae kaufela. Jesu naaziba zanaabata Mulimu kuli aeze, mi naaikatulezi kueza tato ya Ndatahe nihaike kuli kueza cwalo nekuka tahisa kuli anyande. Bakeñisa kuli Jesu naaisize hahulu pilu kwa kutabisa Ndatahe, naasika lumeleza nto ifi kamba ifi kuba ya butokwa hahulu mwa bupilo bwahae. Pitrosi ni baapositola babañwi nebabile ni tohonolo yetuna ya kupila ni Jesu ni kuituta mwanahanela. Pitrosi hanaañola liñolo lahae lapili, naasusuelize Bakreste kuitukiseza kuba ni muhupulo oswana ni wa Kreste. (1 Pit. 4:1) Pitrosi naaitusisize pulelo yeitusiswanga ki masole hanaañozi kuli: “Muitukiseze.” Kacwalo, haiba Bakreste balikanyisa muhupulo wa Jesu kamba kunahana sina yena, bakaba ni silwaniso sesimaata sesika batusa kutula litakazo za kubata kueza sibi mi bakatula lifasi le lelibusiwa ki Satani.—2 Makor. 10:​3-5; Maef. 6:12. w25.03 8-9 ¶1-3

Ki lika mañi zemuswanela kuziba ka za mutu yemuli ni yena mwa libato? Pili musika tabela hahulu luli mutu yo, muswanela kunyakisisa litaba za butokwa, zecwale ka likonkwani zahae. Mukona kuziba cwañi mwainezi luli mutu yemuli ni yena mwa libato? Yeñwi ya linzila zende hahulu zemukona kueza cwalo ka zona, ki kuambola ka kulukuluha ni kubulela litaba za niti, kubuza lipuzo ni kuteeleza ka tokomelo. (Jak. 1:19) Kacwalo, muswanela kueza lika zekatahisa kuli muambolisane, zecwale ka kuca hamoho, kutambala hamoho mwa libaka za nyangela, ni kukutaza hamoho. Hape mukazibana hande haiba mutanda nako ni balikani ni ba lubasi. Kutuha fo, mueze lika zeñwi zeka mitusa kuziba mwakona kuezeza mutu yo mwa miinelo yeshutana-shutana ni haali ni batu babashutana-shutana. w24.05 27-28 ¶6-7

Kwapili lukakopana ni miinelo yetaata yekatokwa kuli luitinge hahulu ku Jehova. Litaba za mwa Bibele ni litaba zebonisa zeezahezi mwa bupilo bwa batanga ba Jehova ba mwa linako zaluna lika lutusa kulemuha mo Mulimu aboniselize tulemeno totuswanisezwa kwa licwe kuli atuse batanga bahae. Munahanisise hahulu ka za litaba zeo. Kueza cwalo kuka mitusa kuunga Jehova kuba Licwe lamina. Hape lukatiisa hahulu mizwale ni likaizeli baluna mwa puteho. Ka mutala, Jesu naafile Simoni libizo la Kefasi (lelitolokilwe kuli “Pitrosi”), ili lelitalusa “Licwe.” (Joa. 1:42) Taba yeo neibonisa kuli naaka omba-omba babañwi mwa puteho ni kutiisa tumelo yabona. Baana-bahulu mwa puteho bataluswa kuli ki “muluti wa licwe lelituna.” Taba yeo italusa kuli basilelezanga mizwale ni likaizeli babona mwa puteho. (Isa. 32:2) Kono niti kikuli, puteho yatusiwanga haiba mizwale ni likaizeli kaufela balikanyisa tulemeno twa Jehova totuswanisezwa kwa licwe. w24.06 28 ¶10-11

Malena ba Isilaele banaaanga Jehova kuli nebasepahala, nebakumalezi kwa bulapeli bwa niti. Jehova naaatuzi buñata bwa malena kuli nebasa sepahali kakuli nebatuhezi kumamela Milao yahae ni kukala kulapela milimu ya buhata. (1 Mal. 21:​25, 26; 2 Makol. 12:1) Ki kabakalañi taba ya bulapeli hane ili ya butokwa ku Jehova? Libaka leliñwi kikuli, malena nebanani buikalabelo bwa kutusa batu ba Mulimu kumulapela ka nzila yelukile. Hape kulapela milimu ya buhata nekukona kutahisa kuli baeze libi zeñwi zetuna ni kusaatula ka kuluka. (Hos. 4:​1, 2) Kuzwa fo, malena ni sicaba kaufela sa Isilaele nebaneezwi ku Jehova. Kacwalo, Bibele ibapanya kulapela milimu ya buhata kwa kueza bubuki. (Jer. 3:​8, 9) Mutu yaeza bubuki ufoseza hahulu mutu yanyalani ni yena. Ka kuswana, mutangaa Jehova yaineezi ku yena halapela milimu ya buhata, ufoseza hahulu Jehova.—Deut. 4:23. w24.07 22-23 ¶12-15