Genesis 5:1-32
5 Saya so nisulat a salaysay nipaakar ed si Adan. Diad agew na impamalsa na Dios ed si Adan et ginawa ton miulibay ed Dios.+
2 Pinalsa to ran laki tan bii.+ Diad agew na inkapalsa ra+ et benendisyonan to ra tan tinawag to ran Too.*
3 Si Adan et nambilay na 130 taon insan sikatoy nanilalak na sakey a laki a miulibay ed sikato, unong ed indengan to, tan sikatoy inngaran ton Set.+
4 Kayari ton inilalak si Set, si Adan et nambilay ni na 800 a taon. Tan sikatoy nanilalak na lalaki tan bibii.
5 Kanian say impanbilay nen Adan et asabi toy 930 taon, insan sikatoy inatey.+
6 Si Set et nambilay na 105 taon insan inilalak toy Enos.+
7 Kayari ton inilalak si Enos, si Set et nambilay ni na 807 taon. Tan sikatoy nanilalak na lalaki tan bibii.
8 Kanian say impanbilay nen Set et asabi toy 912 taon, insan sikatoy inatey.
9 Si Enos et nambilay na 90 taon insan inilalak toy Kenan.
10 Kayari ton inilalak si Kenan, si Enos et nambilay ni na 815 taon. Tan sikatoy nanilalak na lalaki tan bibii.
11 Kanian say impanbilay nen Enos et asabi toy 905 taon, insan sikatoy inatey.
12 Si Kenan et nambilay na 70 taon insan inilalak toy Mahalalel.+
13 Kayari ton inilalak si Mahalalel, si Kenan et nambilay ni na 840 taon. Tan sikatoy nanilalak na lalaki tan bibii.
14 Kanian say impanbilay nen Kenan et asabi toy 910 taon, insan sikatoy inatey.
15 Si Mahalalel et nambilay na 65 taon insan inilalak toy Jared.+
16 Kayari ton inilalak si Jared, si Mahalalel et nambilay ni na 830 taon. Tan sikatoy nanilalak na lalaki tan bibii.
17 Kanian say impanbilay nen Mahalalel et asabi toy 895 taon, insan sikatoy inatey.
18 Si Jared et nambilay na 162 taon insan inilalak toy Enoc.+
19 Kayari ton inilalak si Enoc, si Jared et nambilay ni na 800 a taon. Tan sikatoy nanilalak na lalaki tan bibii.
20 Kanian say impanbilay nen Jared et asabi toy 962 taon, insan sikatoy inatey.
21 Si Enoc et nambilay na 65 taon insan inilalak toy Matusalem.+
22 Kayari ton inilalak si Matusalem, si Enoc et nanakar a kaiba na tuan Dios* ed loob na 300 a taon. Tan sikatoy nanilalak na lalaki tan bibii.
23 Kanian say impanbilay nen Enoc et asabi toy 365 taon.
24 Si Enoc et nanakar a kaiba na tuan Dios.+ Insan sikatoy naandi, ta sikatoy inala na Dios.+
25 Si Matusalem et nambilay na 187 taon insan inilalak toy Lamec.+
26 Kayari ton inilalak si Lamec, si Matusalem et nambilay ni na 782 taon. Tan sikatoy nanilalak na lalaki tan bibii.
27 Kanian say impanbilay nen Matusalem et asabi toy 969 a taon, insan sikatoy inatey.
28 Si Lamec et nambilay na 182 taon insan sikatoy nanilalak na sakey a laki.
29 Sikatoy inngaran ton Noe,*+ ya inkuan to: “Sikato so mangiter ed sikatayo na ligliwa* manlapud mairap a kimey tan ambelat a pansasagpot na saray lima tayo lapud insamba nen Jehova so dalin.”+
30 Kayari ton inilalak si Noe, si Lamec et nambilay ni na 595 taon. Tan sikatoy nanilalak na lalaki tan bibii.
31 Kanian say impanbilay nen Lamec et asabi toy 777 taon, insan sikatoy inatey.
32 Sanen asabi nen Noe so 500 a taon, inilalak toy Sem,+ Ham,+ tan Jafet.+
Paimanod leksab
^ Odino “Adan; Katooan.”
^ Nayarin kabaliksan toy “Painawa; Ligliwa.”
^ Odino “inawa.”
