Genesis 45:1-28
45 Diad saman et agla napokpokan nen Jose so liknaan to ed arapan na amin a lingkor to.+ Kanian inkelyaw to: “Papaway yo so amin a wadia!” Anggapo lay atilak a kaiba to sanen impakabat toy inkasikato ed saray agagi to.+
2 Insan sikatoy inmurangal, kanian nadngel iya na saray Ehipsio ontan met ed sankaabungan na Faraon.
3 Diad kaunoran et inkuan nen Jose ed saray agagi to: “Siak si Jose. Mabilay ni amak?” Balet agmakaebat iray agagi to, lapud abigbigla ra ed sikato.
4 Kanian inkuan nen Jose ed saray agagi to: “Singger kayod siak, ipangasi yo.” Diad saman et sinmingger ira ed sikato.
Insan inkuan to: “Siak si Jose ya agi yo, ya inlako yo ed Ehipto.+
5 Balet natan et agkayo oneermen tan agkayo mantetetelan lapud inlako yo ak dia; ta imbaki ak la na Dios antis yo pian niliktar so bilay yo.+
6 Saya so komaduan taon na eras ed dalin,+ tan wala ni limaran taon ya anggapoy panagdalus odino panag-ani.
7 Balet imbaki ak la na Dios antis yo pian walay nakerad sikayo+ diad dalin tan mansiansia kayon mabilay diad panamegley na baleg a kililiktar.
8 Kanian aliwan sikayo so angibaki ed siak dia, noagta say tuan Dios, pian turoen to ak bilang manunan mananimbawa* na Faraon tan katawan ed interon sankaabungan to tan manuley ed interon dalin na Ehipto.+
9 “Pawil kayon tampol ed amak, tan ibaga yo ed sikato, ‘Saya so inkuan nen Jose ya anak mo: “Tinuro ak na Dios bilang katawan ed interon Ehipto.+ La ka dia ed siak. Agka manpapaleen.+
10 Manayam ka ed dalin na Gosen,+ pian asingger ka ed siak—sika, saray ananak mo, saray apom, saray karnerom, saray bakam, tan amin a walad sika.
11 Ikdan ta kay abastom a naakan, ta wala ni limaran taon na eras.+ Ta no andi, manirap ka tan say sankaabungan mo tan amin a walad sika.”’
12 Sankanengneng yo natan, sikayo tan si Benjamin ya agik, a talagan siak so mansasalita ed sikayo.+
13 Kanian ibaga yod si amak so amin a gloriak ed Ehipto tan amin ya anengneng yo. Apura yo tan awit yo diay amak.”
14 Insan nilakap toy* Benjamin ya agi to tan sikatoy nanakis, tan linmakap met ed sikato si Benjamin tan nanakis.+
15 Tan inangoban toy amin ya agagi to tan nanakis lapud sikara, tan kayari na satan et akitongtong ed sikato iray agagi to.
16 Akasabi ed sankaabungan na Faraon so balita: “Sinmabi iray agagi nen Jose!” Maabig iya ed pakanengneng na Faraon tan saray lingkor to.
17 Kanian inkuan na Faraon ed si Jose: “Ibagam ed saray agagim, ‘Gawa yo ’ya: Kargaan yo iray ayayep yon panagkimey tan la kayo ed dalin na Canaan,
18 tan awit yoy ama yo tan saray sankaabungan yo tan la kayo dia ed siak. Iter kod sikayo so maabig iran bengatla ed dalin na Ehipto, tan kanen* yo so manlapud sankamabungaan* a parte na dalin.’+
19 Tan iganggan ta kan mangibaga ed sikara:+ ‘Gawa yo ’ya: Mangala kayo na saray kariton+ ed dalin na Ehipto parad saray ananak tan kaasawaan yo, tan ilugan yo ditan so ama yo tan la kayo dia.+
20 Agkayo mapaga ed saray kayarian yo,+ ta kien yo so sankaabigan ed interon dalin na Ehipto.’”
21 Tan ontan so ginawa na saray ananak nen Israel, tan inikdan ira nen Jose na saray kariton unong ed ganggan na Faraon, tan inikdan to ray abasto ed pambiahe ra.
22 Inikdan to so kada sakey ed sikara na kawes a pampalesan, balet inikdan toy Benjamin na 300 a piraso na pilak tan limaran kawes a pampalesan.+
23 Tan saraya so impawit tod ama to: samploran asno ya angiluganan ed maabig iran bengatla ed Ehipto tan samploran kabatyan ya asno ya angiluganan ed ilik tan tinapay tan abasto parad pambiahe nen ama to.
24 Kanian pinasipot to ray agagi to, tan sanen ombuat la ra et inkuan tod sikara: “Agkayo mankokolkol diad dalan.”+
25 Insan pinmaway ira ed Ehipto tan akasabi ra ed dalin na Canaan diad kawalaan nen Jacob ya ama ra.
26 Insan imbalita rad sikato: “Mabilay ni Jose, tan sikato so manuuley ed interon dalin na Ehipto!”+ Balet agto inimano so imbaga ra, ta agto ra sisiaen.+
27 Sanen intuloy dan imbaga ed si Jacob ya ama ra so amin a sinalita nen Jose ed sikara tan anengneng to iray kariton ya impawit nen Jose a panluganan to, kinmasil so espiritu to.
28 Inkelyaw nen Israel: “Manisia ak la! Mabilay ni Jose ya ana’ko! Kaukolan koy onla pian sikatoy nanengneng ko antis ak ya ompatey!”+
Paimanod leksab
^ Literal, “bilang ama.”
^ Literal, “sikatoy sinmubsob ed beklew nen.”
^ Odino “pambilay.”
^ Odino “mataba.”
