Genesis 16:1-16
-
Si Hagar tan Ismael (1-16)
16 Natan et anggapoy anak nen Abram ed si Sarai ya asawa to,+ balet walay lingkor nen Sarai ya Ehipsion manngaray Hagar.+
2 Kanian inkuan nen Sarai ed si Abram: “Ipangasim, dengel mo ak natan! Agto ak inabuloyan nen Jehova a mananak. Ipangasim, miakdol kad lingkor ko. Agla pigan nawalaan ak na ananak ed panamegley to.”+ Kanian dinengel nen Abram so imbaga nen Sarai.
3 Kayari na samploy taon ya impanayam nen Abram ed dalin na Canaan, inala nen Sarai ya asawa nen Abram si Hagar a lingkor ton Ehipsio tan inter to bilang asawa ed si Abram a masiken to.
4 Kanian inakdolan toy Hagar, tan sikatoy nanlukon. Sanen naamtaan ton sikatoy malukon, minudmora to so amo ton bii.
5 Diad saman et inkuan nen Sarai ed si Abram: “Sikay natetel ed pakakasakitan ko. Siak so angiter ed sika* na lingkor kon bii, balet sanen naamtaan ton sikatoy malukon et minudmora to ak. Mangukom komon si Jehova ed baetan ta’n dua.”
6 Kanian inkuan nen Abram ed si Sarai: “Say lingkor mo et walad pakauley mo. Gawam ed sikato so antokaman ya iisipen mon sankaabigan.” Diad saman et pinabpabaingan nen Sarai so aripen to, kanian sikatoy tinmaynan.
7 Agnambayag et sikatoy aromog na anghel nen Jehova diad abay na subol na danum ed kalawakan, say subol a walad dalan a paarap ed Sur.+
8 Tan inkuan to: “Hagar, lingkor nen Sarai, iner so nanlapuan mo tan iner so laen mo?” Sikatoy inmebat: “Ibabatikan koy Sarai, say amok a bii.”
9 Inkuan na anghel nen Jehova ed sikato: “Pawil kad amom a bii tan manpaabeba kad arapan to.”
10 Insan inkuan na anghel nen Jehova: “Parakelen kon maong so ilalak mo,* tan ag-ira nabilang lapud karakel da.”+
11 Inyarum ni na anghel nen Jehova: “Malukon ka, tan mangiyanak kay sakey ya ugaw a laki, tan sikatoy ingaran mon Ismael,* ta nadngel nen Jehova so paniirap mo.
12 Sikatoy magmaliw a laki a mipadpara ed atap ya asno.* Amin et sumpaen to, tan sikatoy sumpaen na amin, tan say panayaman to et asingger ed amin ya agagi to.”*
13 Insan sikatoy tinmawag ed ngaran nen Jehova, a mitotongtong ed sikato: “Sakey kan Dios a makakanengneng,”+ ta imbaga to: “Talagan anengneng ko dia imay makakanengneng ed siak.”
14 Lapud satan et atawag so bobon a Beer-lahai-roi.* (Walad pegley na Kades tan Bered.)
15 Kanian inyanak nen Hagar so sakey a laki ed si Abram, tan inngaran nen Abram ya Ismael so anak to ed si Hagar.+
16 Si Abram et mantaon na 86 sanen inyanak nen Hagar si Ismael.
Paimanod leksab
^ Literal, “ed pagew mo.”
^ Literal, “binim.”
^ Kabaliksan toy “Narerengel na Dios.”
^ Odino sakey a klase na atap ya asno a diad Ingles et onager, anggaman iisipen na arum a manutukoy iya ed sakey a zebra. Mapatnag a tutukoyen na saya so independentin awawey.
^ Odino posiblin, “tan sikatoy manbilay a walaay pambusol ed amin ya agagi to.”
^ Kabaliksan toy “Bobon na Samay Mabilay a Makakanengneng ed Siak.”
