Genesis 28:1-22
28 Kanian tinawag nen Isaac si Jacob tan sikatoy benendisyonan to tan binilin to, ya inkuan to: “Agka mangaasawa ed saray bibiin ananak na Canaan.+
2 La kad Padan-aram diad abung nen Betuel, ya ama nen inam, tan mangasawa ka diman ed saray bibiin anak nen Laban,+ ya agi nen inam.
3 Bendisyonan ka na Makapanyarin-amin a Dios tan pagmaliwen to kan mabunga tan parakelen to ka, tan magmaliw kan sakey a kongregasyon na saray totoo.+
4 Tan iter tod sika so bendisyon ya insipan tod si Abraham,+ diad sika tan ed ilalak mo,* pian kayarianen mo so dalin a nanayaman mo bilang dayo, ya inter na Dios ed si Abraham.”+
5 Kanian imbaki nen Isaac si Jacob, tan sikatoy amaarap ed Padan-aram,+ ed kinen Laban ya anak nen Betuel ya Arameo, ya agi nen Rebeca,+ ya ina nen Jacob tan Esau.
6 Anengneng nen Esau a benendisyonan nen Isaac si Jacob tan sikatoy imbaki to ed Padan-aram pian diman mangasawa, tan sanen sikatoy benendisyonan to et imbilin ton, “Agka mangaasawa ed saray bibiin ananak na Canaan,”+
7 tan inunor nen Jacob so ama tan ina to tan sikatoy amaarap ed Padan-aram.+
8 Atalosan nen Esau ya aglabay nen Isaac ya ama to iray bibiin ananak na Canaan,+
9 kanian linmay Esau ed si Ismael tan inasawa toy Mahalat ya anak nen Ismael ya anak nen Abraham, say agin bii nen Nebaiot, bilang kaaruman ed saray arum nin asawa to.+
10 Tinaynan nen Jacob so Beer-sheba tan amaarap ed Haran.+
11 Agnambayag et sikatoy akasabi ed sakey a pasen tan namparaan a mansanlabi diman lapud sinmelek lay agew. Kanian sikatoy angala na sakey a bato ed satan a pasen tan inlira to pian danganan to, tan dinmukol ditan.+
12 Insan akugip to a walay takayan ya akaletneg ed dalin tan say toktok to et akasabi ed tawen; tan wala ray anghel na Dios ya onsesegep tan onlalasur ditan.+
13 Tan si Jehova et wadman ed tagey na satan, tan inkuan to:
“Siak si Jehova a Dios nen Abraham ya amam tan Dios nen Isaac.+ Say dalin a pandukdukolan mo et iter kod sika tan ed ilalak mo.*+
14 Tan say ilalak mo* et magmaliw a singa karakel na dabok ed dalin,+ tan onkayat kad nanduruman pasen ed sagur tan ed bukig tan ed amianen tan ed abalaten, tan diad panamegley mo tan panamegley na ilalak mo,* amin a pamilya ed dalin et nabendisyonan.*+
15 Wala ak ed sika, tan salimbengan ta ka ed inerman a laen mo, tan ipawil ta kad sayan dalin.+ Agta ka taynan ya anggad nasumpal ko so insipan kod sika.”+
16 Insan aliing si Jacob tan inkuan to: “Tuan si Jehova et wadiad sayan pasen, tan agko iya amta.”
17 Tan sikatoy tinmakot tan inkuan to ni: “Agaylan makapadinayew iyan pasen! Seguradon abung iya na Dios,+ tan saya so puerta na katawenan.”+
18 Kanian kabkabuasan a binmangon si Jacob tan inala toy bato a nandanganan to tan impaalagey to itan pian magmaliw a baton pakanodnonotan tan kinalboan to itan na larak.+
19 Kanian inngaran ton Bethel* itan a pasen, balet say datin ngaran na syudad et Luz.+
20 Insan oniay insipan nen Jacob: “No say Dios et mansiansia ed siak tan salimbengan to ak ed pambiahek tan ikdan to ak na kanen kon tinapay tan isulong kon kawes
21 tan maligen ak a makapawil ed abung nen amak, diad satan et nipatnag nen Jehova a sikato so Dios ko.
22 Tan sayan bato ya impaalagey ko bilang baton pakanodnonotan et magmaliw ya abung na Dios,+ tan seguradon iter kod sika so kakaplo na amin ya iter mod siak.”
Paimanod leksab
^ Literal, “binim.”
^ Literal, “binim.”
^ Literal, “binim.”
^ Literal, “binim.”
^ Odino “et onggamor na bendisyon.”
^ Kabaliksan toy “Abung na Dios.”
