Genesis 44:1-34
44 Diad saginonor et ingganggan to imay laki a mangaasikaso ed abung to: “Panom na naakan iray sako na sarayan lalaki ya anggad nasarag dan awiten, tan iyan mo so kuarta na balang sakey ed sangab na sako to.+
2 Balet ikargam so kopak, samay pilak a kopa, ed sangab na sako na samay sankayugtanan, pati say kuartan bayar ed ilik to.” Kanian ginawa toy ingganggan nen Jose.
3 Kaimbuasan to, sanen maliwawa la, pinasipot to iramay lalaki, a kaiba iray asno ra.
4 Agni ra akaarawi ed syudad et oniay inkuan nen Jose ed samay mangaasikaso ed abung to: “La ka! Usilan mo iramay lalaki! Sano naabotan mo ra, ibagam ed sikara, ‘Akin et mauges so imbales yo ed kamaongan?
5 Agta saman imay paniinuman na katawan ko tan uusaren to pian nabasa ton malinew iray tanda? Mauges so ginawa yo.’”
6 Kanian nabotan to ra tan imbaga to iratan ed sikara.
7 Balet inkuan dad sikato: “Akin et ontay ibabaga na katawan ko? Ag-itan balot nagawaan na saray lingkor mo.
8 Say kuartan aromog mi ed sangab na saray sako mi et impawil mi ed sika manlapu ni ed dalin na Canaan.+ Kanian panon min nagawaan so panakew na pilak odino balitok ed abung na katawan mo?
9 No naromog itan ed sakey ed saray aripen mo, sikatoy nepeg ya ompatey, tan say arum ed sikami et magmaliw met ya ariripen na katawan ko.”
10 Kanian inkuan to: “Nagawa so unong ed imbaga yo. Balet saman labat so pakaromogan ed satan so magmaliw ya aripen ko, tan anggapoy kasalanan na arum ed sikayo.”
11 Diad saman et inleksab a tampol na balang sakey so sako to tan nilukasan da iratan.
12 Sinukimat ton maong so kada sako, ya inggapo tod sankapanguloanan ya anggad sankayugtanan. Diad kaunoran et aromog to so kopa ed sako nen Benjamin.+
13 Insan pinilat da iray kawes da, tan inlugan da lamet ed asno ra iray awit da tan pinmawil ira ed syudad.
14 Sanen linmoob si Juda+ tan saray agagi to ed abung nen Jose, wadman ni si Jose; tan dinmakmomo ra ed arapan to.+
15 Inkuan nen Jose ed sikara: “Anto iyay ginawa yo? Agyo ta amta a say lakin singa siak et eksperton makabasa na saray tanda?”+
16 Diad saya et inyebat nen Juda: “Anto ni ibaga mi ed katawan ko? Panon min nipaliwawa? Tan panon min napaneknekan a matunong kami? Say tuan Dios so angiparungtal ed kasalanan na saray aripen mo.+ Aripen kami la natan na katawan ko, sikami tan samay akaromogan ed kopa!”
17 Balet inkuan to: “Agkon balot itan nagawaan! Samay toon akaromogan ed kopa so magmaliw ya aripen ko.+ Balet say arum ed sikayo, la kayo lad ama yo a walaay kareenan.”
18 Inmasingger natan si Juda ed sikato tan inkuan to: “Mikasi ak ed sika, katawan ko, ipangasim ya abuloyan mo ak a mansalita ed sika, tan agka komon onsasanok ed aripen mo, ta singa ka say Faraon a mismo.+
19 Intepet na katawan ko ed saray aripen to, ‘Wala ta ni ama yo odino agi yo?’
20 Kanian inkuan mi ed katawan ko, ‘Wala ni ama mi a masiken la tan sakey ya anak ed inkamasiken to, samay sankayugtanan.+ Balet inatey lay agi to+ kanian bukbukor to lay atilak ya anak nen ina to,+ tan sikatoy inad-aro nen ama to.’
21 Kayari na satan et inkuan mo ed saray aripen mo, ‘Sikatoy iyakar yod siak pian nanengneng ko.’+
22 Balet inkuan mi ed katawan ko, ‘Agnayarin taynanan na ugaw so ama to. Ta seguradon ipatey na ama to no taynanan to.’+
23 Insan inkuan mod saray aripen mo, ‘No agyo iyakar dia so sankayugtanan ya agi yo, agyo ak lan balot nanengneng.’+
24 “Kanian linma kamid ama mi ya aripen mo tan imbaga mid sikato iray salita na katawan ko.
25 Diad saginonor et inkuan na ama mi, ‘Pawil kayo tan mangaliw kayoy daiset a naakan tayo.’+
26 Balet inkuan mi, ‘Agkami nayarin onla. No kaiba so sankayugtanan ya agi mi insan kami onla, ta agmi la nanengneng iman a laki no agmi kaiba so sankayugtanan ya agi mi.’+
27 Insan inkuan ed sikami na ama mi ya aripen mo, ‘Amta yo a duaran lalaki labat so inyanak ed siak na asawak.+
28 Balet naandi ed siak imay sakey tan inkuan ko: “Sikatoy seguradon abingbingkas!”+ tan sikatoy agko la anengneng manlapu lad saman.
29 No alaen yo met ed siak iyan sakey tan walay mauges a nagawa ed sikato, seguradon ilasur yod Lubok*+ iray uban ko tekep na kaermenan.’+
30 “Tan natan, no ompawil ak ed ama min aripen mo ya agmi kaiba so ugaw, anta kasuldongan na bilay* to so bilay* na sayan ugaw,
31 sikatoy ompatey sano nanengneng ton anggapo diman iyan ugaw, tan ilasur na saray aripen mo ed Lubok* iray uban na ama mi ya aripen mo tekep na kaermenan.
32 Impaseguro na aripen mo ed ama to ya anggapoy nagawan mauges ed ugaw, ya inkuan ton, ‘No sikatoy agko nipawil ed sika, akoen kod andi-anggaan so kasalanan kod amak.’+
33 Kanian natan, ipangasim, abuloyan mon siak so natilak bilang aripen na katawan ko imbes a say ugaw, pian makapawil so ugaw a kaiba na saray agagi to.
34 Ta panoy ipawil ko ed amak no agko kaiba so ugaw? Agko nayarian a nengnengen so panirap nen amak!”
