Genesis 25:1-34
25 Angasawa lamet si Abraham, tan say ngaran to et Ketura.
2 Asabi panaon et inyanak tod sikato si Zimran, Joksan, Medan, Midian,+ Isbak, tan Suah.+
3 Si Joksan so ama nen Sheba tan Dedan.
Saray lalakin ananak nen Dedan et si Asurim, Letusim, tan Leumim.
4 Saray lalakin ananak nen Midian et si Efa, Efer, Hanoc, Abida, tan Eldaa.
Amin iraya et lalakin ananak nen Ketura.
5 Diad saginonor et inter nen Abraham ed si Isaac so amin a kayarian to,+
6 balet inikdan nen Abraham na regalo iray ananak tod saray onkokomaduan asawa to. Insan, legan a sikatoy mabilay ni, pinaonla to ra diad dalin ed Bukig, pian iyarawi to ra ed anak ton si Isaac.+
7 Say bilang na taon na impanbilay nen Abraham et 175.
8 Insan nauyos so linawa nen Abraham tan inatey kayari na andukey a bilay, a matatken tan napnek, tan sikatoy nitipon ed saray totoo to.*
9 Sikatoy imponpon di Isaac tan Ismael ya ananak to, diad ungib ed Macpela ed uma nen Efron ya anak nen Zohar a Heteo, a walad arap na Mamre,+
10 say uma a sinaliw nen Abraham ed saray ananak nen Het. Ditan niponpon si Abraham, pati si Sara ya asawa to.+
11 Kayari na impatey nen Abraham, intultuloy a benendisyonan na Dios si Isaac ya anak to,+ tan asingger ed Beer-lahai-roi+ so panaayaman nen Isaac.
12 Saya so salaysay nipaakar ed anak nen Abraham a si Ismael,+ a niyanak ed si Abraham ed kinen Hagar+ ya Ehipsio, say lingkor nen Sara.
13 Niraya so kangaranan na ananak nen Ismael, unong ed ngaran da, unong ed kapolian da: Say panguloan ya anak nen Ismael a si Nebaiot,+ a tinumbokan nen Kedar,+ Adbeel, Mibsam,+
14 Misma, Duma, Masa,
15 Hadad, Tema, Jetus, Nafis, tan Kedema.
16 Saraya so lalakin ananak nen Ismael, tan saraya so kangaranan da unong ed saray panaayaman da tan saray kampo* ra: 12 pangulo unong ed tribu ra.+
17 Tan nambilay si Ismael na 137 taon. Insan nauyos so linawa to tan inatey tan nitipon ed saray totoo to.*
18 Tan sikaray nanayam manlapud Havila+ ed abay na Sur,+ ya asingger ed Ehipto, ya anggad Asirya. Say nanayaman to et asingger ed amin ya agagi to.*+
19 Tan saya so salaysay nipaakar ed si Isaac ya anak nen Abraham.+
Si Abraham so ama nen Isaac.
20 Mantaon na 40 si Isaac sanen inasawa toy Rebeca ya agi nen Laban ya Arameo, say anak nen Betuel+ ya Arameo ed Padan-aram.
21 Tan mikakasin naynay si Isaac ed si Jehova nisengeg ed asawa to, ta sikatoy agmakaanak; kanian inebatan nen Jehova so kerew to, tan nanlukon si Rebeca ya asawa to.
22 Tan nanlaban so ananak ed eges nen Rebeca,+ kanian inkuan to: “No onia lanlamang so panirap ko, akin et manbilay ak ni?” Kanian sikatoy tinmupleg ed si Jehova.
23 Tan imbaga nen Jehova ed sikato: “Duaran nasyon so walad eges mo+ tan duaran grupo na totoo so ompaway ed sika;+ tan magmaliw a mas mabiskeg so sakey a nasyon nen samay sakey,+ tan panlingkoran na panguloan imay yugtan.”+
24 Kasabi agew na pananak to, lason so walad eges to.
25 Sanen pinmaway so unona, balangaan so interon laman to tan singa kawes a gawad bago,+ kanian sikatoy inngaran ya Esau.*+
26 Kayari na satan et pinmaway so agi to tan sankaegnaan toy mukor nen Esau,+ kanian sikatoy inngaran to na Jacob.*+ Mantaon na 60 si Isaac sanen inyanak ira nen Rebeca.
27 Legan ya ombabaleg iray ugugaw, si Esau et nagmaliw a marunong a manag-erel na ayayep,+ too ed uma, balet si Jacob et toon andiay pakabalawan, a manaayam ed saray tolda.+
28 Tan inad-aro nen Isaac si Esau, ta sikatoy mangiiter na karnen naakan to, balet inad-aro nen Rebeca si Jacob.+
29 Aminsan, manlalambong si Jacob na naakan sanen sinmabi si Esau a naknaksawan manlapud uma.
30 Kanian inkuan nen Esau ed si Jacob: “Ipangasim, apuram, ikdan mo ak na daiset ed satay ambalangan ilalambong mo,* ta naknaksawan* ak!” Satan so rason no akin a say ngaran to et Edom.*+
31 Diad saya et inkuan nen Jacob: “Ilakom nid siak so kanepegan mo bilang panguloan!”+
32 Tan intuloy nen Esau: “Ngalngali ak la ompatey! Antoy kana ed siak na inkapanguloan ko?”
33 Tan inyarum nen Jacob: “Mansamba ka nin unona ed siak!” Kanian sikatoy nansamba tan inlako tod si Jacob so kanepegan to bilang panguloan.+
34 Insan inikdan nen Jacob si Esau na tinapay tan inlambong a lentehas, tan sikatoy angan tan inminum, tan sikatoy inmalagey tan tinmaynan la. Kanian nileglemew nen Esau so inkapanguloan.
Paimanod leksab
^ Sakey iyan maanlong a balikas parad ipapatey.
^ Odino “saray apadiran a kampo.”
^ Sakey iyan maanlong a balikas parad ipapatey.
^ Odino posiblin, “Sikatoy nambilay a walaay pambusol ed amin ya agagi to.”
^ Kabaliksan toy “Mabago.”
^ Kabaliksan toy “Samay Akabemben ed Mukor; Managsamsam.”
^ Literal, “say ambalanga, saya say ambalanga.”
^ Odino “narnarasan.”
^ Kabaliksan toy “Ambalanga.”
