Genesis 1:1-31

  • Impamalsa ed tawen tan dalin (1, 2)

  • Anem agew ya imparaan so dalin (3-31)

    • Unonan agew: liwawa; agew tan labi (3-5)

    • Komaduan agew: liwang (6-8)

    • Komatlon agew: amagan dalin tan saray tanaman (9-13)

    • Komapat ya agew: saray silew ed tawen (14-19)

    • Komaliman agew: saray sira tan manok (20-23)

    • Komanem ya agew: saray ayayep ed dalin tan totoo (24-31)

1  Diad gapo et pinalsa na Dios so tawen tan say dalin.+  Say dalin et anggapoy itsura tan agnapanayaman,* tan ambilunget ed tapew na araralem a danum;*+ tan say aktibon puersa na Dios*+ et onliliber-liber ed tapew na danudanum.+  Tan inkuan na Dios: “Onlesay liwawa.” Insan linmesay liwawa.+  Kayari na satan, anengneng na Dios a say liwawa et maabig, tan ginapoan na Dios a panbiigan so liwawa tan say bilunget.  Tinawag na Dios so liwawa ya Agew, balet tinawag ton Labi so bilunget.+ Tan walay labi tan walay kabuasan, saya so unonan agew.  Insan inkuan na Dios: “Onlesay liwang*+ ed baetan na danudanum, tan manbiigan iray danudanum.”+  Insan ginawa na Dios so liwang tan impanbiigan toy danudanum ed leksab na liwang tan say danudanum ed tagey na liwang.+ Tan ontan so agawa.  Tinawag na Dios so liwang a Tawen. Tan walay labi tan kabuasan, saya so komaduan agew.  Insan inkuan na Dios: “Natipon ed sakey a pasen iray danudanum ed silong na tawen, tan ompaway so amagan pasen.”+ Tan ontan so agawa. 10  Tinawag na Dios so amagan pasen a Dalin,+ balet tinawag ton Kadayatan+ so atiptipon a danudanum. Tan anengneng na Dios a maabig iya.+ 11  Insan inkuan na Dios: “Ontubo ed dalin so dika, saray nambukel a tanaman, tan saray manbubungan kiew a walaan na saray bukel unong ed klase ra.” Tan ontan so agawa. 12  Tan ginmapon tinmubo ed dalin so dika, saray nambukel a tanaman,+ tan saray manbubungan kiew a walaan na saray bukel, unong ed klase ra. Insan anengneng na Dios a maabig iya. 13  Tan walay labi tan kabuasan, saya so komatlon agew. 14  Insan inkuan na Dios: “Onlesa iray silew+ diad liwang na tawen pian nibiig so agew tan labi,+ tan onkana irayan tanda parad saray panaon tan parad saray agew tan taotaon.+ 15  Onkana irayan silew diad liwang na tawen pian onsinag ed dalin.” Tan ontan so agawa. 16  Tan ginawa na Dios so duaran angkakabaleg a silew, say babaleg a silew ya onsinag legan na agew+ tan say memelag a silew ya onsinag legan na labi, tan ontan met ed saray bitewen.+ 17  Kanian inyan iratan na Dios diad liwang na tawen pian onsinag ed dalin 18  tan onsinag legan na agew tan legan na labi pian nibiig so liwawa tan bilunget.+ Insan anengneng na Dios a maabig iya. 19  Tan walay labi tan kabuasan, saya so komapat ya agew. 20  Insan inkuan na Dios: “Napanoy dakerakel a mabilay a pinalsa* iray karanuman, tan ontikyab ed liwang na tawen iray ontitikyab a pinalsa.”+ 21  Tan pinalsa na Dios iray angkakabaleg ya ayep ed dayat tan amin a mabilay a pinalsa* ya onggagalaw tan amungkog ed saray karanuman unong ed klase ra tan amin a nampayak tan ontitikyab a pinalsa unong ed klase ra. Tan anengneng na Dios a maabig iya. 22  Diad saman et benendisyonan ira na Dios, ya inkuan to: “Manbunga kayo tan manparakel kayo tan panoen yo iray karanuman na dayat,+ tan ondakel iray ontitikyab a pinalsa diad dalin.” 23  Tan walay labi tan kabuasan, saya so komaliman agew. 24  Insan inkuan na Dios: “Mamawala so dalin na saray mabilay a pinalsa* unong ed klase ra, saray maamon ayayep tan onkukurong ya ayayep* tan atap ya ayayep unong ed klase ra.”+ Tan ontan so agawa. 25  Tan ginawa na Dios iray atap ya ayayep diad dalin unong ed klase ra tan saray maamon ayayep unong ed klase ra tan amin ya onkukurong ya ayayep unong ed klase ra. Tan anengneng na Dios a maabig iya. 26  Insan inkuan na Dios: “Mamalsa ta+ na too unong ed indengan ta,+ a miulibay ed sikata,+ tan uleyan da iray sira ed dayat tan saray ontitikyab a pinalsa ed tawen tan saray maamon ayayep tan say interon dalin tan arum nin onkukurong ya ayayep ed dalin.”+ 27  Tan pinalsa na Dios so too unong ed indengan to, sikatoy pinalsa to unong ed indengan na Dios; pinalsa to ran laki tan bii.+ 28  Ontan met, benendisyonan ira na Dios tan inkuan tod sikara: “Manbunga kayo tan manparakel kayo, pano yoy dalin+ tan uleyan yo,+ tan uleyan yo+ iray sira ed dayat tan saray ontitikyab a pinalsa ed tawen tan amin a mabilay a pinalsa ya onggagalaw diad dalin.” 29  Insan inkuan na Dios: “Inter kod sikayo so amin a tanaman a nambukel a walad interon dalin tan amin a kiew a walaay bungan nambukel. Saraya so kanen yo.+ 30  Tan inter koy amin a birdin tanaman pian kanen na amin ya atap ya ayep ed dalin tan amin ya ontitikyab a pinalsa ed tawen tan amin ya onggagalaw ed dalin a walaay bilay.”*+ Tan ontan so agawa. 31  Kayari na saya et anengneng na Dios so amin a pinalsa to, tan agaylay abig iya.+ Tan walay labi tan kabuasan, saya so komanem ya agew.

Paimanod leksab

Odino “andiay karga.”
Odino “na saray madaluyon a danum.”
Odino “espiritu na Dios.”
Salanti, atmospera.
Odino “kamarerwa.”
Odino “kamarerwa.”
Odino “kamarerwa.”
Odino “onggagalaw ya ayayep,” a mapatnag a pati saray reptilya tan saray klase na ayayep a duma ed saray arum a klase.
Odino “a mabilay a kamarerwa.”