Genesis 35:1-29

  • Inekal nen Jacob iray sananey a dirios (1-4)

  • Pinmawil ed Bethel si Jacob (5-15)

  • Inkiyanak nen Benjamin; impatey nen Raquel (16-20)

  • Labinduan lalakin ananak nen Israel (21-26)

  • Impatey nen Isaac (27-29)

35  Kayari na satan et oniay inkuan na Dios ed si Jacob: “Alagey ka, tatdang ka ed Bethel+ tan manayam ka diman, tan manggawa kay altar diman parad tuan Dios a nampanengneng ed sika sanen ibabatikan moy Esau ya agim.”+  Insan inkuan nen Jacob ed sankaabungan to tan ed amin a kaiba to: “Ekal yo iray sananey a dirios a walad pegley yo,+ tan linisan yoy inkasikayo tan salatan yo iray kawes yo,  tan onalagey tayo tan ontatdang tayod Bethel. Manggawa ak diman na altar parad tuan Dios a dinmengel ed saray kerew ko diad agew na gonigon ko tan naynay a walad siak ed inerman* a nilak.”+  Kanian inter dan amin ed si Jacob iray sananey a dirios a walad sikara tan saray ikaw a walad layag da, tan inkotkot* iratan nen Jacob diad silong na baleg a kiew ya asingger ed Siquem.  Sanen nambiahe la ra, tinmakot a maong ed Dios iray syudad a walad kaliberliber da, kanian agda inusilan iray ananak nen Jacob.  Agnambayag et akasabi si Jacob ed Luz,+ salanti, diad Bethel, ed dalin na Canaan, sikato tan amin a totoon kaiba to.  Sikatoy nanggaway altar diman tan tinawag to itan a pasen ya El-bethel,* ta ditan nampanengneng so tuan Dios ed sikato sanen ibabatikan toy agi to.+  Diad saginonor et inatey si Debora+ a nankomis ed si Rebeca, tan niponpon ed leksab na Bethel diad silong na kiew a roble.* Kanian inngaran to itan ya Alon-bakut.*  Nampanengneng lamet so Dios ed si Jacob sanen sikatoy ompapawil manlapud Padan-aram tan sikatoy benendisyonan to. 10  Inkuan na Dios ed sikato: “Say ngaran mo et Jacob.+ Balet natan et aliwa lan Jacob so ngaran mo, noagta Israel lay ngaran mo.” Tan sikatoy tinawag ton Israel.+ 11  Inkuan ni na Dios ed sikato: “Siak so Dios a Makapanyarin-amin.+ Manbunga ka tan manparakel ka. Sika so panlapuan na saray nasyon tan sakey a baleg a grupo na totoo,+ tan saray arari et manlapud sika.*+ 12  Nipaakar ed dalin ya inter kod si Abraham tan Isaac, iter ko itan ed sika, tan iter ko so dalin ed ilalak mo* ya ontumbok ed sika.”+ 13  Insan sikatoy tinaynan lay Dios diad samay pasen ya akitongtongan tod sikato. 14  Kanian angipaalagey si Jacob na sakey a pakanodnonotan diad pasen ya akitongtongan tod sikato, sakey a baton pakanodnonotan, tan kinalboan to itan na apay ya iinumen tan larak.+ 15  Tan intultuloy nen Jacob a tinawag a Bethel+ so pasen ya akitongtongan na Dios ed sikato. 16  Insan tinmaynan ira ed Bethel. Tan legan ya arawi ni rad Efrata et sinmabi so pananak nen Raquel, tan sikatoy nairapan a maong ed impanpasakit to. 17  Balet legan a sikatoy nanairapan a mangiyanak ed ugaw, oniay inkuan ed sikato na manamianak: “Agka natatakot, ta niyanak mo met iyan ugaw a laki.”+ 18  Sanen ngalngali la nauyos so bilay* to (ta ompapatey la) et sikatoy inngaran ton Ben-oni,* balet Benjamin*+ so impanawag nen ama tod sikato. 19  Kanian inatey si Raquel tan niponpon ed dalan a paarap ed Efrata, salanti, diad Betlehem.+ 20  Angipaalagey si Jacob na sakey a lusek ed tapew na lubok to; satan so lusek na lubok nen Raquel anggad sayan agew. 21  Kayari na satan et tinmaynan si Israel tan impaalagey toy tolda to ed labas na tori na Eder. 22  Aminsan, legan a manaayam si Israel ed saman a dalin, nila nen Ruben ya inakdolan si Bilha ya onkokomaduan asawa nen ama to, tan nadngelan itan nen Israel.+ Si Jacob et awalaay 12 ananak a lalaki. 23  Saray ananak nen Jacob ed si Lea et si Ruben a panguloan,+ insan si Simeon, Levi, Juda, Isacar, tan Zebulon. 24  Saray ananak tod si Raquel et si Jose tan Benjamin. 25  Tan saray ananak tod si Bilha a lingkor nen Raquel et si Dan tan Neftali. 26  Tan saray ananak tod si Zilpa a lingkor nen Lea et si Gad tan Aser. Saraya so ananak nen Jacob a niyanak ed sikato diad Padan-aram. 27  Diad kaunoran et akasabi si Jacob ed kawalaan nen Isaac ya ama to diad Mamre,+ diad Kiriat-arba, salanti, diad Hebron, a nanayaman di Abraham tan Isaac bilang dayo.+ 28  Nambilay si Isaac na 180 taon.+ 29  Insan nauyos so linawa nen Isaac tan inatey tan nitipon ed saray totoo to,* kayari na andukey tan makapnek a bilay;* tan sikatoy imponpon nen Esau tan Jacob ya ananak to.+

Paimanod leksab

Odino “diad dalan.”
Odino “inyamot.”
Kabaliksan toy “Dios na Bethel.”
Sakey iyan klase na angkabaleg a kiew. Diad Ingles et oak.
Kabaliksan toy “Roble na Pannangis.”
Literal, “ompaway ed saray tapim.”
Literal, “binim.”
Diad Hebreo, nephesh. Nengnengen so Glosaryo, “Kamarerwa.”
Kabaliksan toy “Anak na Paneermen Ko.”
Kabaliksan toy “Anak na Kawanan a Lima.”
Sakey iyan maanlong a balikas parad ipapatey.
Literal, “a matatken tan nakda na saray agew.”