Genesis 43:1-34
43 Natan et pinasya so eras ed dalin.+
2 Kanian sanen naupot da lay ilik ya inala rad Ehipto,+ oniay inkuan nen ama ra ed sikara: “Pawil kayo tan mangaliw kayoy daiset a naakan tayo.”
3 Insan inkuan nen Juda ed sikato: “Malinew so pasakbay ed sikami na samay laki, ‘Anggad agyo kaiba so agi yo, agyo ak lan balot nanengneng.’+
4 No abuloyan mon mila ed sikami so agi mi, onla kamin mangaliw na naakan parad sika.
5 Balet no sikatoy agmo abuloyan, agkami onla, ta inkuan na samay laki ed sikami, ‘Anggad agyo kaiba so agi yo, agyo ak lan balot nanengneng.’”+
6 Tan intepet nen Israel:+ “Akin et inikdan yo ak na problema diad impangibaga yod saman a laki a wala ni sakey ya agi yo?”
7 Oniay ebat da: “Nantepet imay laki nipaakar ed sikami tan saray kanayon mi, ya inkuan ton, ‘Mabilay ni so ama yo? Wala ni arum ya agi yo?’ tan imbaga mid sikato so tua.+ Panon min amta ya ibaga ton, ‘Awit yo diay agi yo’?”+
8 Insan kinombinse nen Juda si Israel ya ama to: “Ipilam ed siak so ugaw,+ tan abuloyan mo kamin onla pian manbilay tayo ni tan ag-itayo ompatey+—sikami tan sika tan saray ananak mi.+
9 Ipasegurok ya anggapoy mauges a nagawa ed sikato.*+ Siak so tetel mo no walay nagawad sikato. No sikatoy agko nipawil tan niyarap ed sika, akoen koy kasalanan kod sika legay bilay ko.
10 Balet no agkami komon naabala, amidua kami la komon ya akakar tan akapawil.”
11 Kanian inkuan ed sikara nen Israel ya ama ra: “No ontan sirin, gawa yo iya: Iyan yo ed saray sako* yo iray sankaabigan a bunga na dalin tan awit yo iraya bilang regalo+ ed samay laki: daiset a balsamo,+ daiset a dilo, ladano, mayaket ya ubak na kiew,+ pistasio, tan almendro.
12 Doble yo so kuarta ya awiten yo; tan ipawil yo met imay kuarta a nikarga ed sangab na saray sako yo.+ Nayarin lingo labat iman.
13 Ipila yoy agi yo tan la ki la, pawil kayo ed samay laki.
14 Kasian kayo komon na Makapanyarin-amin a Dios diad arapan na saman a laki, pian ibulos tod sikayo imay sakey ya agi yo tan si Benjamin. Balet siak, no talagan nabalang ko iray ananak ko,+ anggapo lay nagawaan ko!”
15 Kanian inala na lalaki so regalo, tan dinoble ra so kuarta ya awit da tan inawit day Benjamin. Insan la ra linma ed Ehipto tan inmarap ira lamet ed si Jose.+
16 Sanen anengneng nen Jose a kaiba ray Benjamin, tampol ya inkuan to ed laki a mangaasikaso ed abung to: “Awit mod abung irayan lalaki tan mamarti kay ayayep tan mangiparaan kay naakan, ta kaibak a mangugto irayan lalaki.”
17 Ginawan tampol na laki imay imbaga nen Jose,+ tan inawit to ra ed abung nen Jose.
18 Balet tinmakot iramay lalaki sanen inawit ira ed abung nen Jose, tan inkuan da: “Inyakar da tayo dia lapud kuarta a nikarga ed saray sako tayo nen inmuna. Natan et erelen da tayo tan gawaen da itayon aripen tan alaen da iray asno tayo!”+
19 Kanian inasinggeran da so lakin mangaasikaso ed abung nen Jose tan akitongtong ira ed sikato diad puerta na abung.
20 Inkuan da: “Dispensa, katawan ko! Linma kami dia nen inmuna pian mangaliw na naakan.+
21 Balet sanen sinmabi kami ed pampupundoan mi tan nilukasan mi iray sako mi, say kuarta na balang sakey et walad sangab na sako to, ya ag-abawasan.+ Kanian labay mi a sikamin mismo so mangipawil ed saya.
22 Tan inaruman mi ni so kuarta ya awit min isaliw na naakan. Agmi amta no siopay angiyan na kuarta mi ed saray sako mi.”+
23 Insan inkuan to: “Agkayo mapaga. Agkayo natatakot. Say Dios yo tan Dios na ama yo so angiyan na kayamanan ed saray sako yo. Amtak a nambayar kayo.” Kayari na satan et impaway toy Simeon ed sikara.+
24 Insan inyakar ira na laki ed abung nen Jose tan inikdan to ray danum a panuras day sali ra, tan inikdan toy naakan iray asno ra.
25 Tan imparaan day regalo+ parad isabi nen Jose no ugto, ta naamtaan dan diman so pangugtoan da.+
26 Sanen linmoob si Jose ed abung, inyakar da ed sikato iray regalo ra, tan dinmakmomo rad sikato ed dalin.+
27 Kayari na saya, tinepet toy kipapasen da, ya inkuan to: “Kumusta imay masiken lan ama yo ya asalita yod siak? Mabilay ni?”+
28 Diad saya et inkuan da: “Maabig so kipapasen na ama mi a lingkor mo. Sikatoy mabilay ni.” Insan tinmalimukor tan dinmakmomo ira.+
29 Sanen sikatoy tinmangwa tan anengneng toy Benjamin ya agi to, ya anak nen ina to,+ inkuan to: “Saya imay agi yo, say sankayugtanan ya asalita yo ed siak?”+ Inkuan to ni: “Kasian ka komoy Dios, ana’ko.”
30 Lapud adaeg na liknaan to ed agi to, pinmaway a tampol si Jose pian mananap na pasen a panakisan to. Kanian sikatoy linmoob ed sakey a pribadon kuarto tan diman nanakis.+
31 Kayari na satan et sikatoy nandilamos tan pinmaway tan pinokpokan toy liknaan to, tan inkuan to: “Iserbi yo lay panangan.”
32 Sikatoy sinerbian da a biig ed saray agagi to tan ed saray Ehipsio a kaiba tod abung, lapud agmidudungo iray Ehipsio ed saray Hebreo, ta makapadimla itan ed saray Ehipsio.+
33 Akayurong so sanaagi* ed arapan to, say panguloan unong ed kanepegan to bilang panguloan+ tan say sankayugtanan unong ed inkaugaw to, tan mannenengnengan ira ed pankelkelaw da.
34 Tan papaiyakar to ed lamisaan da so arum a naakan a walad lamisaan to, balet say iiter tod si Benjamin et maminlima a karakel nen saramay arum.+ Kanian nantultuloy iran angan tan inminum a kaiba to anggad naksel ira.
Paimanod leksab
^ Odino “Siak so magmaliw a garantiya parad sikato.”
^ Odino “saray panagkargaan.”
^ Literal, “ira.”
