Genesis 34:1-31
34 Natan, si Dina ya anak nen Jacob ed si Lea,+ et mabetbet ya ompapaway pian milimog* ed saray kalangweran a bibii ed dalin.+
2 Sanen sikatoy anengneng nen Siquem, ya anak nen Hamor a Heveo,+ say pangulo na dalin, sikatoy inala to tan pinasoot ton inakdolan.
3 Tan agustoan ton maong si Dina ya anak nen Jacob, tan inaro to iyan kalangweran a bii tan kinombinse to.*
4 Insan inkuan nen Siquem ed si Hamor+ ya ama to: “Alam pa iyan kalangweran a bii pian magmaliw ya asawak.”
5 Sanen nadngelan nen Jacob a pinabanday toy anak ton si Dina, saray ananak to et walad uma a kaiba iray pulok to. Kanian nampareen ni Jacob anggad insempet da.
6 Diad saginonor, si Hamor ya ama nen Siquem et linma pian mitongtong ed si Jacob.
7 Balet nadngelan itan na saray ananak nen Jacob tan pinmawil iran tampol manlapud uma. Asakitan ira tan sinmanok iran maong lapud pinabanday toy Israel sanen pinasoot ton inakdolan so anak nen Jacob,+ sakey a bengatlan agnepeg a gawaen.+
8 Oniay inkuan nen Hamor ed sikara: “Si Siquem ya ana’ko et pirpirawat toy marikit yo. Ipangasi yon iter ed sikato bilang asawa to,
9 tan mikasakey kayo ed sikami ed panamegley na panangasawa.* Iter yod sikami iray ananak yon bibii, tan ala yo iray ananak min bibii.+
10 Nayarian yoy miayam ed sikami, tan akatarya so dalin parad sikayo. Manayam kayo ditan tan mannegosyo kayo tan manpirmi kayo.”
11 Insan inkuan nen Siquem ed ama tan agagi nen Dina: “Nagamoran ko komoy panangabobon yo, tan iter ko so antokaman a kerewen yo ed siak.
12 Nayarian yoy onkerew ed siak na balbaleg a dasel tan regalo.+ Mabulos kon iter so antokaman a kerewen yo ed siak, daput no iter yo ed siak so kalangweran a bii bilang asawak.”
13 Tan mapalikdon inmebat iray ananak nen Jacob ed si Siquem tan si Hamor ya ama to lapud pinabanday da si Dina ya agi ra.
14 Inkuan dad sikara: “Agmi nayarian itan a gawaen, ya iter mi so agi mi ed sakey a lakin ag-asegat,*+ lapud kababaingan itan ed sikami.
15 Onabuloy kami labat ed sayan kondisyon: magmaliw kayon singa sikami tan segat yoy amin a lalaki ed sikayo.+
16 Insan iter mid sikayo iray ananak min bibii, tan alaen mi iray ananak yon bibii, tan miayam kami ed sikayo tan magmaliw itayon saksakey a totoo.
17 Balet no agyo kami dengelen tan agkayo manpasegat, alaen mi so agi mi tan onla kami la.”
18 Agustoan nen Hamor+ tan si Siquem ya anak nen Hamor+ so imbaga ra.
19 Agla nampaleen so kalangweran a laki ed impanggawa tod samay kekerewen da,+ lapud labalabay toy anak nen Jacob, tan sikato so manunan kagalgalang ed interon sankaabungan nen ama to.
20 Kanian linmay Hamor tan si Siquem ya anak to diad puerta na syudad tan oniay imbaga ra ed saray lalaki ed syudad da:+
21 “Labay na sarayan totoo so mikareenan ed sikatayo. Abuloyan tayo ran manayam tan mannegosyo ed sayan dalin, ta maawa-awang so dalin a panayaman da. Nayarian tayon alaen bilang asawa iray ananak dan bibii, tan nayarian tayon iter ed sikara iray ananak tayon bibii.+
22 Onabuloy labat irayan totoo a miayam ed sikatayo pian magmaliw itayon saksakey a totoo diad sayan sakey a kondisyon: amin a lalaki ed sikatayo et nepeg a nasegat a singa ed inkasegat da.+
23 Diad satan et agta magmaliw a kien tayo so amin a kayarian da, saray kayamanan da, tan amin a kokomponien dan ayayep? Kanian miabobon tayo la ed sikara pian miayam ira ed sikatayo.”
24 Dinmengel ed si Hamor tan ed si Siquem ya anak to so amin ya ompapaway ed puerta na syudad to, tan nampasegat so amin a lalaki, amin iramay ompapaway ed puerta na syudad.
25 Balet, diad komatlon agew, sanen manpapaotot ni ra, saray duaran ananak nen Jacob a si Simeon tan Levi, ya agagi nen Dina,+ et inala ray espada ra tan linma ra ed syudad ya anggapoy makaamta ed getma ra tan pinatey da so amin a lalaki.+
26 Pinatey da ed espada si Hamor tan si Siquem ya anak to insan da inalay Dina ed abung nen Siquem tan tinmaynan la ra.
27 Linma iray arum ya ananak nen Jacob ed saray pinatey a lalaki tan sinamsaman day syudad lapud pinabanday na saraya so agi ra.+
28 Inala da iray karnero ra, baka ra, asno ra, tan antokaman a walad syudad tan ed uma.
29 Inaala ra met so amin a kayarian da, ineerel da so amin ya angkekelag ya ananak da tan saray kaasawaan da, tan sinamsam day amin a walad kaabungan.
30 Diad saya et inkuan nen Jacob ed si Simeon tan si Levi:+ “Inyakar yo ed siak so baleg a gulo* lapud ginawa yo ak a kabusol na saray manaayam ed sayan dalin, ed saray Canaanita tan Perizeo. Dagdaiset itayo, tan seguradon mankakasakey ira ya onataki ed siak tan naupot ak, siak tan say sankaabungan ko.”
31 Balet inkuan da: “Manepeg kasin ipasen ya imoral a bii so agi mi?”
Paimanod leksab
^ Odino “minengneng.”
^ Literal, “nansalita ed puso na kalangweran a bii.”
^ Odino “tan mangasawa odino miasawa kayod sikami.”
^ Literal, “walaay katat.”
^ Odino “Inyakar yo ed siak so sumpa.”
