Genesis 17:1-27

  • Magmaliw ya ama na dakel a nasyon si Abraham (1-8)

    • Asalatan na Abraham so ngaran nen Abram (5)

  • Sipanan nipaakar ed panagsegat (9-14)

  • Asalatan na Sara so ngaran nen Sarai (15-17)

  • Nisipan so kiyanak nen Isaac (18-27)

17  Sanen mantaon na 99 si Abram, nampanengneng si Jehova ed si Abram tan inkuan to ed sikato: “Siak so Dios a Makapanyarin-amin. Manbilay ka unong ed linawak tan nepeg kan magmaliw ya andiay pakabalawan.  Pekderan ko so sipanan kod sika,+ tan parakelen ta kan maomaong.”+  Diad saman et dinmakmomoy Abram, tan inkuan ni na Dios ed sikato:  “Akisipanan ak ed sika,+ tan seguradon magmaliw kan ama na dakel a nasyon.+  Aliwa lan Abram* so ngaran mo noagta Abraham* la, lapud pagmaliwen ta kan ama na dakel a nasyon.  Pambungaen ta ka na dakerakel pian sika so panlapuan na saray nasyon, tan panlapuan ka na saray arari.+  “Tan sumpalen koy sipanan kod sika+ tan ed ilalak mo* ed amin a henerasyon da; sakey iyan andi-anggaan a sipanan, pian siak so magmaliw a Dios mo tan na ilalak mo* ya ontumbok ed sika.  Tan iter kod sika tan ed ilalak mo* so dalin a panaayaman mo bilang sakey a dayo+—say interon dalin na Canaan—bilang permanentin kayarian, tan siak so magmaliw a Dios da.”+  Inkuan ni na Dios ed si Abraham: “Kanian nepeg mon sumpalen so sipanan ko, sika tan saray ilalak mo* ed amin a henerasyon da. 10  Saya so sipanan ko ed sikayo, a nepeg yon sumpalen tan saray ontumbok ya ilalak mo:* Nepeg yon segaten so amin a laki ed sikayo.+ 11  Nepeg yon segaten so inkasikayo, tan onkana iyan tanda na sipanan ko ed sikayo.+ 12  Diad amin a henerasyon yo, kada laki a niyanak ed sikayo et nepeg a nasegat ed komawalon agew,+ siopaman a niyanak ed abung tan siopaman ya aliwan sakey ed saray ilalak mo* tan samay asaliw ed sakey a dayo. 13  Kada laki a niyanak ed abung mo tan kada lakin asaliw mo so nepeg a nasegat,+ tan sayan sipanan ko ed laman yo et onkana bilang sakey a manbayag a sipanan. 14  No agmanpasegat so siopaman, satan a too* et nepeg ya ekalen* ed kabaleyan to. Agto sinumpal so sipanan ko.” 15  Insan inkuan na Dios ed si Abraham: “Nipaakar ed si Sarai* ya asawam,+ sikatoy agmo la tatawagen na Sarai, lapud say ngaran to la et Sara.* 16  Sikatoy bendisyonan ko tan ikdan ta ka na anak a laki ed panamegley to;+ sikatoy bendisyonan ko tan sikatoy panlapuan na saray nasyon; sikatoy panlapuan na saray arari na totoo.” 17  Diad saya et dinmakmomoy Abraham tan inmelek tan inkuan tod sarili to:+ “Kasin manilalak ni so toon mantaon lay 100, tan kasin mananak ni Sara a mantaon lay 90?”+ 18  Kanian inkuan nen Abraham ed tuan Dios: “O komon ta bendisyonan mo si Ismael!”+ 19  Diad saya et inkuan na Dios: “Seguradon mangiyanak ed sika na sakey a laki si Sara ya asawam, tan sikatoy ngaranan mo na Isaac.*+ Tan iletneg koy sipanan kod sikato bilang sakey ya andi-anggaan a sipanan diad saray ontumbok ya ilalak* to.+ 20  Balet nadngel koy kerew mo nipaakar ed si Ismael. Sikatoy bendisyonan ko tan gawaen kon mabunga tan parakelen kon maomaong. Sikatoy mamawala na 12 papangulo, tan pagmaliwen kon baleg a nasyon.+ 21  Balet, iletneg ko so sipanan ko ed si Isaac,+ ya iyanak nen Sara ed sika ed sayan aturon panaon diad ontumbok a taon.”+ 22  Kayarin akitongtong so Dios ed sikato, tinaynan toy Abraham. 23  Insan inala nen Abraham si Ismael ya anak to tan amin a lalakin niyanak ed abung to tan amin ya asaliw to, kada laki diad sankaabungan nen Abraham, tan diad saman a mismon agew et sinegat to ra, unong ya imbaga na Dios ed sikato.+ 24  Si Abraham et mantaon na 99 sanen sikatoy asegat.+ 25  Tan si Ismael ya anak to et mantaon na 13 sanen sikatoy asegat.+ 26  Diad saman a mismon agew et asegat si Abraham, pati si Ismael ya anak to. 27  Kaiba ton asegat so amin a lalaki ed sankaabungan to, siopaman a niyanak ed abung, tan siopaman ya asaliw manlapud sakey a dayo.

Paimanod leksab

Kabaliksan toy “Say Ama et Atagey (Nitandoro).”
Kabaliksan toy “Ama na Ulop na Totoo (Karaklan); Ama na Dakerakel.”
Literal, “binim.”
Literal, “binim.”
Literal, “binim.”
Literal, “binim.”
Literal, “binim.”
Literal, “binim.”
Odino “kamarerwa.”
Odino “pateyen.”
Nayarin mankabaliksay “Makolkol.”
Kabaliksan toy “Prinsesa.”
Kabaliksan toy “Panelek.”
Literal, “bini.”