Genesis 32:1-32
32 Insan intuloy nen Jacob so biahe to, tan nabet to iray anghel na Dios.
2 Sanen anengneng to ra, inkuan nen Jacob: “Saya so kampo na Dios!” Kanian satan a pasen et inngaran ton Mahanaim.*
3 Insan imbaki nen Jacob iray mensahero to ya unona la ran onla ed si Esau ya agi to diad dalin na Seir,+ say teritorya* na Edom,+
4 tan ingganggan to ra: “Oniay ibaga yo ed katawan kon si Esau, ‘Oniay inkuan nen lingkor mon si Jacob: “Abayag ak ya akiayam* ed si Laban.+
5 Tan awalaan ak na saray kalakian a baka, asno, karnero, tan lingkor iran lalaki tan bibii,+ tan impasabik iyan mensahe pian naamtaan na katawan ko, pian nagamoran koy panangabobon mo.”’”
6 Ag-abayag et pinmawil iray mensahero ed si Jacob, ya inkuan da: “Nabet mi agim ya Esau, tan sikatoy wala lad dalan pian abeten to ka, tan walay kaiba ton 400 a lalaki.”+
7 Tan tinmakot a maong tan apagaan si Jacob.+ Kanian inapag to ed duaran kampo iray kakaiba to, ontan met ed saray pulok, baka, tan saray kamelyo.
8 Inkuan to: “No atakien nen Esau so sakey a kampo, makabatik ni imay sakey a kampo.”
9 Kayari na satan et inkuan nen Jacob: “O Dios nen amak ya Abraham tan Dios nen amak ya Isaac, O Jehova, sika a mangibabaga ed siak na, ‘Pawil ka ed dalin mo tan ed saray kakanayon mo, tan bendisyonan ta ka,’+
10 agak manepeg ed matoor a panangaro tan katooran ya impatnag mo ed lingkor mo,+ ta baston labat so awit ko sanen binaliw koy Jordan tan natan et walaan ak lay duaran kampo.+
11 Ipikasik ed sika, iliktar mo ak+ ed si agik ya Esau, lapud natatakot ak ompan sikatoy onsabi tan atakien to ak,+ ontan met ed saray kainaan tan ananak da.
12 Tan inkuan mon: ‘Bendisyonan ta ka, tan gawaen kon singa saray buer ed dayat so ilalak mo,* ya agnabilang ed karakel.’”+
13 Tan sikatoy nansanlabi diman. Insan inala to so arum ed saray kayarian to pian iregalo to ed si Esau ya agi to:+
14 200 a kabatyan a kanding, 20 kalakian a kanding, 200 a kabatyan a karnero, 20 kalakian a karnero,
15 30 kamelyo a kaiba iray papasusoen da, 40 baka, 10 kalakian a baka, 20 kabatyan ya asno tan 10 kalakian ya asno.+
16 Impalima to iratan ed saray lingkor to, a nambibiigan so kada pulok, tan inkuan tod saray lingkor to: “Unona ki lad siak ya ombaliw, tan mangiyan kayo na distansia ed baetan na sakey a pulok tan samay ontutumbok.”
17 Onia ni imbilin to ed samay unona: “No bilang ta abeten tan tepetan ka nen Esau ya agik, ‘Siopay makankayarian ed sika, tan iner so laen mo, tan siopay makankayarian ed sarayay ayayep a walad unaan mo?’
18 ibagam, ‘Si Jacob a lingkor mo. Regalo iya ya impawit to parad katawan kon si Esau,+ tan sikatoy manumtumbok met ed sikami.’”
19 Tan binilin to met imay komadua, samay komatlo, tan amin iramay ontutumbok ed saray pulok: “Ibaga yo irayan salita ed si Esau sano sikatoy naabet yo.
20 Tan ibaga yo met, ‘Manumtumbok ed sikami si Jacob a lingkor mo.’” Ta ninonot ton: ‘No napakepak so sanok to diad pangipawit kon unona na regalo,+ diad ontan et maabig so pangawat tod siak sano sikatoy naabet ko la.’
21 Kanian akauna lan akabaliw so regalo antis to, balet sikatoy nansanlabi ed kampo.
22 Insan diad saman a labi et sikatoy binmangon tan inala toy duaran asawa to+ tan saray duaran lingkor ton bibii+ tan say 11 ya ananak to tan binaliw da so atapew a danum na Jabok.+
23 Kanian inala to ra tan imbaliw to ra ed kulos,* tan inawit to so amin nin kayarian to.
24 Insan atilak a bukor si Jacob. Diad saman et walay sakey a lakin akibalsakan ed sikato anggad palbangon.+
25 Sanen anengneng na laki ya agto nadaeg, diniwit toy tapi nen Jacob; tan akudias so pukel na tapi to legan na pibabalsakan tod sikato.+
26 Kayari na satan et inkuan to: “Ikbanan mo ak, ta palbangon la.” Diad saya et inkuan to: “Agta ka ikbanan anggad agmo ak nabendisyonan.”+
27 Kanian inkuan tod sikato: “Antoy ngaran mo?” a diad satan et inkuan to: “Jacob.”
28 Insan inkuan to: “Aliwa lan Jacob so ngaran mo noagta Israel,*+ ta akilaban ka ed Dios+ tan ed totoo tan analo kan siansia.”
29 Nantepet met si Jacob: “Ipangasim, ibagam ed siak so ngaran mo.” Balet inkuan to: “Akin et tetepeten moy ngaran ko?”+ Diad saman et sikatoy benendisyonan to diman.
30 Kanian inngaran nen Jacob a Peniel*+ iman a pasen, ta inkuan ton, “Arap-arapan ya anengneng ko so Dios, balet aliktar so bilay ko.”*+
31 Tan sikatoy asinagan lay agew sanen sikatoy dinmalan ed Penuel,* balet sikatoy mankitley lapud tapi to.+
32 Kanian anggad sayan agew et ag-apasal iray ananak na Israel a mangan na ula-ulat na ulpo, a walad pukel na tapi, lapud diniwit toy pukel na tapi nen Jacob ed ula-ulat na ulpo.
Paimanod leksab
^ Kabaliksan toy “Duaran Kampo.”
^ Literal, “uma.”
^ Odino “nanayam bilang dayo.”
^ Literal, “binim.”
^ Odino “lawak a walaay kulos.”
^ Kabaliksan toy “Milalaban (Mansusungdo) ed Dios” odino “Milalaban so Dios.”
^ Kabaliksan toy “Lupa na Dios.”
^ Odino “kamarerwak.”
^ Odino “Peniel.”
