Jue Mun 9:1-20
Ɔ ti jue tofuɛ’m be su kpɛn’n i liɛ. Muti-labɛnin* su. Davidi i jue’mbe nun kun-ɔn.
א [Alɛfu]
9 Ee Zoova, ń tú min klun ń mánmán wɔ.
Ń kán ɔ abonuan sa’m be ndɛ.+
2 Ɔ dunman nun ti’n, min klun jɔ́, yɛ min wun kpája min.
Wɔ mɔ a o Like Kwlaa Ti Su’n, ń tó jue* ń mánmán ɔ dunman’n.+
ב [Bɛti]
3 Kɛ min kpɔfuɛ’m bé káci be sin bé kɔ́’n,+be ja kplá, yɛ bé wú ɔ ɲrun lɛ.
4 Afin a kan min ti ndɛ, yɛ a bu min ndɛ’n klanman.
A tran ɔ famiɛn bia’n su, yɛ a di jɔlɛ mun nanwlɛ su.+
ג [Gimɛli]
5 A tuli nvlenvle’m be fɔ,+ yɛ a kunnin klunwifuɛ mun.
A nunnunnin be dunman’n mlɔnmlɔnmlɔn.
6 Ɔ kpɔfuɛ’m b’a nunnun mlɔnmlɔnmlɔn,a tuli be klɔ’m be bo,yɛ be su boman be su be diman jɔlɛ kun.+
ה [E]
7 Sanngɛ Zoova o i famiɛn bia’n su tititi.+
W’a tɛkɛ i famiɛn bia’n i kpa naan ɔ́ dí jɔlɛ munnanwlɛ su.+
8 Ɔ́ dí asiɛ’n* sufuɛ’m be jɔlɛ nanwlɛ su,+ɔ́ dí nvlenvle’m be jɔlɛ mun nanwlɛ su.+
ו [Vavu]
9 Zoova káci be nga be kle be yalɛ’n be fiawlɛ kpa kun,+ɔ́ yó fiawlɛ kpa kun ɲrɛnnɛn blɛ’n nun.+
10 Be nga be si ɔ dunman’n, bé fá be wla gúa ɔ su.+
Ee Zoova, be nga be kunndɛ wɔ’n, a su yiman bease le.+
ז [Zayin]
11 Amun to jue be manman Zoova m’ɔ tran Siɔn’n.
Amun kan ninnge ng’ɔ yoli be’n be ndɛ nvlefuɛ’m be afiɛn.+
12 Afin Sran ng’ɔ tu ɲrɛnnɛnfuɛ’m be klunngbɔ,* i wla kpɛnbe su.+
I wla su fiman kpanlɛ nga be kpan’n su.+
ח [Ɛti]
13 Ee Zoova, si min aunnvɔɛ, nian ɲrɛnnɛn nga min kpɔfuɛ’m be kle min’n,wɔ mɔ a man min su wie’n i anuan’m be nun’n,+
14 naan n kan ɔ sa dandan nga a yoli be’n be ndɛ Siɔn i wa bla’n i anuan’m be nun,+naan min klun jɔ, delɛ mɔ a deli min’n ti.+
ט [Teti]
15 Nvlenvle’m b’a tɔ kunman nga be fuli’n nun.
Aya* nga be fa fiali’n w’a tra be bɔbɔ be ja’n.+
16 Jɔlɛ nga Zoova di be’n yɛ be fa si i-ɔ.+
Like nga klunwifuɛ’n yoli’n w’a kaci kɛ aya sa w’a trɛ i bɔbɔ.+
Igayɔn* su. (Sela)
י [Yɔdu]
17 Klunwifuɛ’m bé cúɛn be wun bé kɔ́ Ndia’n* i wun lɔ,lɔ yɛ nvlenvle kwlaa nga be wla fi Ɲanmiɛn’n bé kɔ́-ɔ.
18 Sanngɛ Ɲanmiɛn i wla su fiman yalɛfuɛ’n su.+
Yɛ like nga wɛtɛɛfuɛ’n i wla o su kɛ ɔ́ ɲɛ́n i’n, ɔ su mlinman le.+
כ [Kafu]
19 Ee Zoova, jaso! Nán yaci klɔ sran’n i lɛ maan ɔ kwla.
Di nvlenvle’m be jɔlɛ.+
20 Ee Zoova, yo maan srɛkun be.+
Yo maan nvlenvle’m be wun i wlɛ kɛ klɔ sran ngbɛn yɛle be. (Sela)
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Annzɛ “ń bó miziki.”
^ Annzɛ “asiɛ m’ɔ yo like ye’n.”
^ Ebr., “tu be mmoja’n i klunngbɔ’n.”
^ Ebr., “Tɛ.”
^ Nian Ndɛ’m be bo tulɛ lika’n nun lɔ.
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
