Jue Mun 106:1-48
106 An manman Ya!*
Amun la Zoova i ase, afin ɔ ti kpa.+
I sran klolɛ dan’nwieman le.+
2 ?Wan yɛ ɔ kwla kan sa dandan nga Zoova yo be’n be ndɛ guɛ i ti nin i bo-ɔ?
?Sa ng’ɔ yo be’n, mɔ be ti’n ɔ nin manmanlɛ fata’n, wan yɛ ɔ kwla kan be kwlaa be ndɛ-ɔ?+
3 Be nga be yo sa i nuan su sɛsɛ’n,mɔ be yo sa kpa blɛ kwlaa nun’n, be liɛ su ti ye.+
4 Ee Zoova, kɛ á yó ɔ sran’m be ye’n,* maan ɔ wla kpɛn min su.+
Fa sa nga a yo fa de sran’n fa nian min lika.
5 I liɛ’n, ye nga a yo ɔ sran mɔ a kpali be’n ń ɲán wie,+yɛ e nin ɔ nvle’n nunfuɛ mun é dí aklunjɔɛ likawlɛ,kpɛkun e nin ɔ aja like’n é mánmán wɔ kpa liɛ su.*
6 E yoli sa tɛ kɛ e nannanmun sa,+e fɔnnin, e yoli klunwi sa.+
7 Ezipti lɔ’n, e nannan’m b’a siman abonuan sa nga a yo mannin be’n be su ye.*
Be wla w’a kpɛnman ɔ sran klolɛ dan’n su,sanngɛ be yoli ɲin kekle jenvie’n i nuan lɔ, Jenvie Ɔkwlɛ’n i nuan lɔ.+
8 Sanngɛ i dunman’n ti’n, ɔ deli be,+naan be wun kɛ ɔ le tinmin.+
9 Ɔ ijɔli Jenvie Ɔkwlɛ’n, kpɛkun ɔ wieli nun.
Ɔ fali be sinnin jenvie’n i bo lɔ aunɲan’n su kɛ aawlɛ flɛnnɛn wie nun sa.+
10 Ɔ deli be be kpɔfuɛ’m besa nun,+yɛ ɔ kpɔli be ti be kpɔfuɛ’m be sa nun.+
11 Nzue’n katali be kpɔfuɛ’m be su.
Be nun wie fi w’a kaman nguan nun.*+
12 Kɛ ɔ yoli sɔ’n, be lafili nda ng’ɔ tali’n su.+
Be toli jue be mɛnmɛnnin i.+
13 Sanngɛ be wla fili like ng’ɔ yoli’n su ndɛndɛ.+
B’a minndɛman kɛ ɔ kle be ajalɛ.
14 Aawlɛ flɛnnɛn’n nun lɔ’n, like nga be konvi sɔ i’n yɛ be yoli-ɔ.+
Be sali Ɲanmiɛn aawlɛ flɛnnɛn’n nun lɔ niannin.+
15 Ɔ mannin be like nga be srɛli i’n,sanngɛ ɔ fali tukpacɛ kun yili be su, ɔ maan be yoli kokloo.+
16 Nanmue’n nun lɔ’n, be fali be ɲin cili Moizi
nin Aarɔn+ m’ɔ ti Zoova liɛ klonglo’n.+
17 Kɛ ɔ yoli sɔ’n, asiɛ’n nun kpacili, kpɛkun ɔ mɛnnin Datan,yɛ ɔ katali be nga be yiali Abiramun i wun lɛ’nbe su.+
18 Sin jueli be afiɛn.
Sin taaman kun kunnin klunwifuɛ mun.+
19 Be yoli nannin ba kun Orɛbu lɔ,yɛ be kotoli amuin kun mɔ be kloli like be yoli’n i bo.+
20 Be fali min aɲrunɲan’n
be mannin nannin m’ɔ di ijre’n i nzɔliɛ’n.+
21 Be wla fili Ɲanmiɛn+ m’ɔ ti be Defuɛ’n,m’ɔ yoli sa dandan mun Ezipti lɔ’n i su.+
22 Ɔ yoli abonuan sa mun Kamun mɛn’n nun lɔ,+ɔ yoli sa sroesroe mun Jenvie Ɔkwlɛ’n i nuan lɔ.+
23 I waan ɔ́ sé kɛ be nunnun be,sanngɛ Moizi m’ɔ kpɛli i’n, ɔ kpatali be ti
naan ɔ guɛ i ya’n i ase naan w’a nunnunman be.+
24 I sin’n, be wa kpɔli mɛn ng’ɔ ti klanman’n.+
B’a lafiman nda ng’ɔtali’n su.+
25 B’a yaciman be konviabo ijɔlɛ be tannin sua’mbe nun.+
B’a tieman Zoova i aniɛn’n.+
26 Ɔ maan be dunman nun’n, ɔ mɛnnin i sa’n su tali nda
kɛ ɔ́ wá yó naan be tɔ aawlɛ flɛnnɛn’n nun lɔ,+
27 ɔ́ wá yó naan be mma’m be tɔ nvlenvle’m be nun,yɛ ɔ́ wá yó naan be bo sanndi mɛnmɛn’mbe nun.+
28 I sin’n, be sɔli Baali ng’ɔ o Peɔɔ’n wie,+yɛ be dili nnɛn nga be fa yi tɛ be man be nga be wuli’n.*
29 Be yoli sa wie mun fa klɔklɔli i,+kpɛkun ɲrɛnnɛn kun tɔlibe su.+
30 Sanngɛ Fineasi jasoli, yɛ ɔ yoli like kun,kpɛkun ɲrɛnnɛn’n wieli.+
31 I sɔ’n ti’n, Ɲanmiɛn buli i sran kpa
be osuosu’m be kwlaa be nun.+
32 Be klɔklɔli i Meriba* lɔ nzue’m be wun lɔ,yɛ be dunman nun ti’n, sa ɲannin Moizi.+
33 Be beli i awlɛn.
Ɔ maan ɔ́ íjɔ-ɔ, w’a bumɛni sin.+
34 B’a nunnunman nvlenvle mun+
kusu nn Zoova seli be kɛ be yo sɔ.+
35 Be fali be wun wlali nvle kun nga’m be nunfuɛ’mbe nun,+kpɛkun be niannin be ayeliɛ’n su.+
36 Be sɔli be amuin mun titi,+yɛ amuin sɔ’m be kacili kɛ aya sa be bo.+
37 Be fali be mma yasua mun
nin be mma bla mun be yili tɛ be mannin mmusu mun.+
38 Be guali sran mɔ b’a yoman sa’n be mmoja’n i ase,+be guali be mma yasua mun nin be mma bla’m be mmoja’n i ase,be fa be yili tɛ mannin Kanaan amuin mun.+
Mmoja nga be guɛli i ase’n ti’n, mɛn’n yoli fiɛn.
39 Be ayeliɛ’n ti’n, be yoli fiɛn.
Like nga be yoli’n ti’n, be sɔli amuin.*+
40 Ɔ maan Zoova i ya’n jueli i nvlefuɛ’m be su,kpɛkun ɔ wa kpɔli i aja like’n.
41 Ɔ yili be mannin nvlenvle mun kpɛ sunman,+naan be kpɔfuɛ’m besie be.+
42 Be kpɔfuɛ’m be kleli be yalɛ,yɛ be tinnin be su.
43 Ɔ deli be kpɛ sunman,+sanngɛ be yoli ɲin kekle, be ɲin w’a yimɛn i,+yɛ be fɔnlɛ’n ti’n, be ɲin guali ase.+
44 Sanngɛ ɔ wunnin ɲrɛnnɛn ng’ɔ o be su’n,+yɛ ɔ tili kpanlɛ nga be kpan kunndɛ ukalɛ’n.+
45 Be dunman nun ti’n, i wla kpɛnnin i aenguɛ’n su,yɛ be yoli i annvɔ,* i sran klolɛ dan’n ti.+
46 Ɔ yoli maan be nga be trali be ɔli’n,be kwlaa be sili be aunnvɔɛ.+
47 Ee, e Ɲanmiɛn Zoova, de e,+yi e nvlenvle’m be nun fite naan e ti yia.+
I liɛ’n, é kwlá mánmán ɔ dunman m’ɔ ti sanwun’n,yɛ é mánmán wɔaklunjɔɛ su.+
48 Maan be manman Zoova m’ɔ ti Izraɛli Ɲanmiɛn’n,maan be mɛnmɛn i tititi.+
Maan nvlefuɛ’m be kwlaa be tɛ su kɛ: “Maanɔ yo sɔ!”
An manman Ya!*
Ja ngua lɔ ndɛ mun
^ Annzɛ “Aleluya.” “Ya” ti Zoova i dunman’n i flɛlɛ kpeʼn.
^ Annzɛ “kɛ á yí ɔ klun ufue’n i nglo’n.”
^ Annzɛ “é fá wɔ é dí e nuan.”
^ Annzɛ “b’a wunman be wlɛ.”
^ Annzɛ “w’a kaman lɛ.”
^ Yɛle kɛ, tɛ nga be yi be man be nga be wuli’n, annzɛ amuin mun’n.
^ I bo’n yɛ: “Utre Kunndɛlɛ.”
^ Annzɛ “be nin amuin mun boli tekle.”
^ Annzɛ “ɔ yoli i nsisɔ.”
^ Annzɛ “Aleluya.” “Ya” ti Zoova i dunman’n i flɛlɛ kpeʼn.
