Jue Mun 66:1-20
Ɔ ti jue tofuɛ’m be su kpɛn’n i liɛ. Jue kun-ɔn.
66 Asiɛ’n sufuɛ mun, maan amun kwlaa amun kpan kwlalɛ kpanlɛ Ɲanmiɛn ɲrun.+
2 Amun to jue* be mɛnmɛn i dunman m’ɔ ti dan’n.
Amun yo maan i manmanlɛ’n yo dan.+
3 Amun se Ɲanmiɛn kɛ: “Ninnge nga a yo be’n be ti abonuan dan!+
Ɔ tinmin dan’n ti’n,ɔ kpɔfuɛ’m bé úsu ɔ ɲrun.+
4 Asiɛ’n sufuɛ’m be kwlaa bé kóto ɔ bo.+
Bé tó jue bé mánmán wɔ.
Bé tó jue bé mánmán ɔ dunman’n.”+ (Sela)
5 An bla be wa nian ninnge nga Ɲanmiɛn yo be’n.
Ninnge ng’ɔ yo be man klɔ sran mun’n, be ti abonuan.+
6 Ɔ yoli maan jenvie’n kacili asiɛ kee.+
Be nantili be ja be kpɛli nzue’n.+
E dili aklunjɔɛ lɛ i dunman nun.+
7 Ɔ́ dí famiɛn tititi,+ i kwlalɛ’n ti.
I ɲinma’m be nian nvlenvle’m be su titi.+
Ɔ fataman kɛ be nga be ɲin su ti kekle’n be tu be wun.+ (Sela)
8 Sran mun, maan amun manman e Ɲanmiɛn’n,+yɛ maan be ti i manmanlɛ’n i ngan.
9 Ɔ yo maan e ka nguan nun.+
Ɔ su kplinman su kɛ e ja kpla.*+
10 Afin Ɲanmiɛn, a nianniannin e.+
A yili e nun fiɛn’n kɛ be fa yi sika’n i nun fiɛn’n sa.
11 A yoli maan e tɔli tɛ nga be fa di koniɛn’n i nun.
A fali trɔ kun m’ɔ yo nɔnnin kpa’n fa jinnin e ti su.
12 A mannin klɔ sran’m be atin kɛ be tiatia e su.*
E sinnin sin nun nin nzue nun.
Kpɛkun a fa e ɔli wunmiɛn lolɛ lika kun nun.
13 Ń wlú ɔ sua’n nun ń kó yí tɛ nga kɛ bé yí’n be yra nnɛn’n i kɔlikɔli’n.+
Ń yía nda nga n tali wɔ’n be nuan,+
14 nda nga min nuan’n tali’n,+i nun mɔ n wo ɲrɛnnɛn nun’n, ndɛ ng’ɔ fin min nuan fiteli’n, ń yíɛ i nuan.
15 Ń fá nnɛn nga b’a lo kpa’n ń yí tɛ nga kɛ bé yí’n be yra nnɛn’n i kɔlikɔli’n ń mán wɔ,ń yrá bua ɲin mun naan be wunsrɛn’n fite.
Ń fá nannin tola mun nin boli yasua mun ń mán wɔ. (Sela)
16 Amun kwlaa mɔ amun sro Ɲanmiɛn’n, amun bla be wa tie,ń má kán like ng’ɔ yo mannin min’n i ndɛ ń klé amun.+
17 N fali min nuan’n n flɛli i,yɛ n fali min taaman’n n yili i ayɛ.
18 Sɛ ɔ ti kɛ n buli sa tɛ wie i akunndan min awlɛn’n nun lɔ’n,nn Zoova w’a siemɛn i su min nuan bo.+
19 Sanngɛ Ɲanmiɛn tili,+ɔ fɛli i ɲin sieli i minsrɛlɛ’n su.+
20 Maan manmanlɛ’n yo Ɲanmiɛn liɛ! W’a kpaloman min srɛlɛ’n,yɛ w’a seman kɛ ɔ yimɛn i sran klolɛ dan’n i nglo min lika.
