Jue Mun 71:1-24
71 Ee Zoova, ɔ sin yɛ n fia-ɔ.
Nán maan n wun ɲannzuɛn le.+
2 Ɔ sa nuan su sɛsɛ yolɛ’n ti’n, de min, yɛ yo maan n ɲan min ti.
Sie ɔ su min nuan bo* yɛ de min.+
3 Kaci min yɔbuɛ mɔ n kwla fia nun’n,mɔ n kwla kɔ lɔ titi’n.
Se kɛ be de min,afin a ti min yɔbuɛ yɛ a ti min fiawlɛ kpa.+
4 Ee, min Ɲanmiɛn, de min klunwifuɛ’n i sa nun,+de min yalɛ klefuɛ m’ɔ yoman sa i nuan su’n i sa nun.
5 Ee Zoova, min Min m’ɔ Sie Like Kwlakwla’n, ɔ su yɛ n fa min wla n gua-ɔ.
Kɛ ɔ fɛ i min kaan nun lele’n, ɔ su yɛ n fa min wla n gua-ɔ.+
6 Kɛ be wuli min lele’n, ɔ su yɛ n kisa-ɔ.
Wɔ yɛ a fali min min nin i ku sɛ’n nun lɔ fiteli-ɔ.+
Ń mánmán wɔ titi.
7 M’an kaci kɛ abonuan like wie sa sran kpanngban ɲrun.
Sanngɛ a ti min fiawlɛ kpa.
8 Ɔ manmanlɛ’n w’a yi min nuan’n piɛ.+
Aliɛ ba kwlaa nun’n, n kan ɔ aɲrunɲan’n i ndɛ.
9 Min kpɛnngbɛn blɛ nun’n, nán yi min blo.+
Kɛ min wunmiɛn’n wie’n, nán yi min ase.+
10 Min kpɔfuɛ’m be kan min wun ndɛ,yɛ be nga be kunndɛ kɛ bé kún min’n, be bo yo kun be cici min wun ndɛ.+
11 Be se kɛ: “Ɲanmiɛn w’a yi i ase.
Amun fuɛn i naan amun trɛ i, afin sran fi nunman lɛ naan w’a de i.”+
12 Ee Ɲanmiɛn, nán ka mmua lɔ.
Ee min Ɲanmiɛn, uka min ndɛndɛ.+
13 Maan be nga be tanndan min ɲrun’n,be wun ɲannzuɛn, yɛ be nunnun.+
Maan be nga be kunndɛ kɛ sa ɲan min’n,be wun ɲannzuɛn, yɛ be ɲin gua ase.+
14 Sanngɛ min liɛ’n, ń mínndɛ titi.
Ń úka ɔ manmanlɛ’n su.
15 Min nuan’n kán ɔ sa nuan su sɛsɛ yolɛ’n i ndɛ,+aliɛ ba kwlaa nun’n, ń kán sa nga a yo be fa de sran’n i ndɛ,kannzɛ bɔbɔ be sɔnnin dan naan n kwlá wunman be wlɛ’n,* ń kán be ndɛ.+
16 Ń bá kpɛkun ń kán sa dandan nga a yo be’nbe ndɛ.
Ee, min Min Zoova, wɔ mɔ a Sie Like Kwlakwla’n,ń kán ɔ sa nuan su sɛsɛ yolɛ’n i ndɛ, ɔ liɛ’n i kunngba cɛ i ndɛ yɛ ń kán-ɔn.
17 Ee Ɲanmiɛn, kɛ ɔ fɛ i min kaan nun’n, a kleli min like,+yɛ lele nin andɛ’n, n te kan ɔ abonuan sa’m be ndɛ.+
18 Ee Ɲanmiɛn, kannzɛ bɔbɔ m’an yo kpɛnngbɛn naan min ti w’a bo je’n, nán yi min ase.+
Maan n kan ɔ kwlalɛ’n* i ndɛ n kle be nga bé wá jáso su’n,Maan n kan ɔ tinmin’n i ndɛ n kle be kwlaa nga bé wá wú be’n.+
19 Ee Ɲanmiɛn, ɔ sa nuan su sɛsɛ yolɛ’n ju nglommua lɔ.+
A yoli sa dandan mun.
?Ee Ɲanmiɛn, wan cɛ yɛ ɔ ti kɛ wɔ sa-ɔ?+
20 Kannzɛ bɔbɔ a yoli maan n wunnin afɛ nin ɲrɛnnɛn kpanngban’n,+man min wunmiɛn ekun.
Fa min asiɛ’n* i bo mmua kpa lɔ fite.+
21 Yo maan n ɲan ɲrun tra laa’n,sasa min, yɛ fɔnvɔ min.
22 Ee min Ɲanmiɛn, ɔ nanwlɛ dilɛ’n ti’n,+ń fá miziki bolɛ ninnge nga be le ɲanman’n ń mánmán wɔ.
Ee Izraɛli Ɲanmiɛn, wɔ mɔ a ti Sanwun’n,ń fá jru ń tó jue* ń mánmán wɔ.
23 Kɛ ń tó jue ń mánmán wɔ’n, min nuan bui’m bé kpán aklunjɔɛ kpanlɛ,+afin a deli min.+
24 Min taaman’n kán ɔ sa nuan su sɛsɛ yolɛ’n i ndɛ aliɛ ba kwlaa nun,+afin be nga be kunndɛ kɛ bé kún min’n, bé wún ɲannzuɛn yɛ be ɲingúa ase.+
Ja ngua lɔ ndɛ mun
^ Annzɛ “Klu naan tie.”
^ Annzɛ “kaman be’n.”
^ Ebr., “ɔ sa’n.”
^ Annzɛ “nzue mɔ i bo ti kploun’n.”
^ Annzɛ “ń bó miziki.”
