Jue Mun 48:1-14
Kore i mma’m be jue’m be nun kun-ɔn.+
48 Zoova ti dan, yɛ ɔ fata kɛ be yi i ayɛ kpa
e Ɲanmiɛn’n i klɔ’n nun,i oka m’ɔ ti i liɛklonglo’n su.
2 Siɔn Oka m’ɔ o nglo lɔ lika’n i mmua lɔ’n,ɔ yo ɲɛnmɛn nglo lɔ, ɔ ti asiɛ wunmuan’n i aklunjɔɛ like,+ɔ ti Famiɛn Dan’n i klɔ.+
3 I sua fleiin’m be nun’n,Ɲanmiɛn yoli maan be si kɛ ɔ ti fiawlɛ kpa.+
4 Afin amun nian, famiɛn’m be ti yiali,be ɔli likawlɛ.
5 Kɛ be wunnin i’n, be nuan boli be wun.
Be klun titili be, yɛ srɛ m’ɔ kunnin be dan’n ti’n, be wanndili.
6 Lɛ’n, be boli usulɛ bo,ɲrɛnnɛn tɔli be su kɛ bla wie m’ɔ su wu ba’n sa.
7 A fali aunmuan m’ɔ fin wia afiliɛ lɔ’n fa sacili Taasisi mmeli mun.
8 Ndɛ nga e tili be’n, siɛn’n e bɔbɔ y’a wun be
Zoova m’ɔ ti sonja’m be su kpɛn’n i klɔ’n nun, e Ɲanmiɛn’n i klɔ’n nun.
Ɲanmiɛn wá yó maan klɔ sɔ’n táka kpa tititi.+ (Sela)
9 Ee Ɲanmiɛn, e bu ɔ sran klolɛ dan’n i su akunndan kpa,+ɔ tannin sua’n nun lɔ.
10 Ee Ɲanmiɛn, ɔ manmanlɛ’n
ju asiɛ’n i lika kwlakwla kɛ ɔ dunman’n sa.+
Sa nuan su sɛsɛ yolɛ’n w’a yi ɔ sa fama’n.+
11 Maan Siɔn Oka’n+ di aklunjɔɛ,maan Zida lɔ klɔ’m* be klun jɔ, jɔlɛ mɔ a di be’n ti.+
12 Maan amun nanti bo sin yia Siɔn, maan amun bo sin yiɛ i.
Maan amun kɛ i sua fleiin mun.+
13 Amun fa amun ɲin sie i i talɛ dandan’m be su kpa.+
Maan amun niɛnniɛn i sua fleiin’m be kpa,naan amun kɛn i ndɛ kle be nga bé wá jáso su’n.
14 Afin Ɲanmiɛn nga ti e Ɲanmiɛn tititi.+
Ɔ́ klé e atin tititi.*+
