Jue Mun 60:1-12
Ɔ ti jue tofuɛ’m be su kpɛn’n i liɛ. “Be wla kpɛnlɛ Lisi.” Miktamun* su. Davidi i jue-ɔ. Ɔ ti like klelɛ liɛ. Kɛ ɔ nin Aramun-Naaraimun nin Aramun-Zoba be kunnin alɛ, mɔ Zoabu sɛli i sin ko kunnin Edɔmunfuɛ akpiakpi blu-nin-nɲɔn (12.000) Njin Kongo’n nun lɔ’n,+ yɛ ɔ kpɛli jue sɔ’n niɔn.
60 Ee Ɲanmiɛn, a yili e blo. A sanngannin enun.+
A fali ya e wun, sanngɛ siɛn’n w’a sɔ e nun ekun!
2 A yoli maan asiɛ’n kejeli. A kpacili nun.
Tannintannin i nun toklo mun, afin ɔ su bubu.
3 A yoli maan sa kekle tɔli ɔ sran’m be su.
A yoli maan e nɔnnin duvɛn kun m’ɔ yo maan e bo tanngan’n.+
4 Kle* be nga be sro wɔ’n be nzɔliɛ kun
naan be wanndi naan ta’n to fuan be. (Sela)
5 Fa ɔ sa fama’n de e yɛ tɛ e su,naan ɔ sran mɔ a klo be’n, be ɲan be ti.+
6 Ɲanmiɛn m’ɔ ti sanwun’n* seli kɛ:
“Ń má dí aklunjɔɛ, ń má fá Sisɛmun ń mán naan ɔ yo aja like,+yɛ ń súnnzun Sukɔtu Kongo’n.+
7 Galaadi ti min liɛ, Manase kusu ti min liɛ,+yɛ Efraimun ti min ti kpongbo kle,*
Zida ti min kpɛn dilɛ kpɔnman.+
8 Moabu ti min wunnzinlɛ kpongbo,+ń má tó min ngbabua’n ń yí i Edɔmun su.+
Ń má kpán kwlalɛ kpanlɛ Filisti su.”+
9 ?Wan yɛ ɔ́ fá min kɔ́ klɔ mɔ sonja’m be bo sin yiɛli i’n* su lɔ-ɔ?
?Wan yɛ ɔ́ fá min kɔ́ lele jú Edɔmun lɔ-ɔ?+
10 ?Ee Ɲanmiɛn, nán wɔ yɛ a yili e blo’n niɔn?
?E Ɲanmiɛn, nán wɔ yɛ a nin e sonja mun fiteman kun’n niɔn?+
11 E ɲrɛnnɛn blɛ’n nun’n uka e,Afin delɛ ng’ɔ fin klɔ sran mun’n ɔ timan like fi.+
12 Ɲanmiɛn yɛ maan é ɲán wunmiɛn-ɔn,+yɛ ɔ́ tíatía e ɲrun tanndanfuɛ’m be su.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Be kwla se ekun kɛ “A kleli.”
^ Be kwla se ekun kɛ “Ɲanmiɛn m’ɔ o lika mɔ ti i liɛ klonglo’n nun lɔ’n.”
^ Ebr., “min ti’n i fiawlɛ.”
^ Be kwla se ekun kɛ “klɔ mɔ be sisili i wun’n.”
