Jue Mun 88:1-18
Kore i mma’m be jue-ɔ.+ Ɔ ti jue tofuɛ’m be su kpɛn’n i liɛ. Maan be nian Maalati* su. Kɛ wie’m bé tó’n, nn wie’m bé sɔ́ su. Eman+ m’ɔ ti Ezrafuɛ’n i Maskili’n* su.
88 Ee Zoova, Ɲanmiɛn m’ɔ ti min defuɛ’n,+wia nun’n, n kpan n flɛ wɔ,yɛ kɔnguɛ’n, n ba ɔ ɲrun.+
2 Maan min srɛlɛ’n to wɔ lɔ.+
Fa ɔ su sie i min kpanlɛmɔ n kpan n kunndɛ ukalɛ’n i bo.*+
3 Afin min su ɲrɛnnɛn’n timan aɔwi,+yɛ min nguan’n wo Ndia’n* i nuan.+
4 Be ka min be wla be nga be jra kunman’n* nun lɔ’n be nun.+
M’an kaci sran m’ɔ leman ukafuɛ-ɔ.*+
5 M’an ka be nga be wuli’n be afiɛn.
N ti kɛ be nga be kunnin be mɔ be lala ndia kun nun’n be sa.
Ɔ wla kpɛnman be su kun,yɛ a nianman be lika kun.*
6 A fali min yili kunman mɔ i bo ti kploun kpa’n nun.
A fali min yili lika kun m’ɔ lu tuun’n nun, kunman dan kpa kun nun.
7 Ɔ ya dan’n tin min su dan ngboko.+
W’a fa ɔ nzue m’ɔ bo kpa’n w’a fa kata min su kplu. (Sela)
8 A fuannin min sifuɛ mun ɔli min wun mmua.+
A yoli maan m’an kaci like kain be ɲrun.
M’an tɔ aya nun, yɛ n kwlá finman nun n fiteman.
9 Min wla mɔ w’a bo min wun dan’n ti’n, min ɲinma’n w’a fɛ.+
Ee Zoova, n kpan n flɛ wɔ aliɛ ba kwlaa nun.+
N man min sa’m be su ɔ ɲrun.
10 ?Á wá yó abonuan sa mun mán be nga be wuli’n?
?Be nga be wuli mɔ be kwlá yoman like fi kun’n, be kwla jaso be manman wɔ?+ (Sela)
11 ?Ndia’n nun lɔ’n, be kwla kan ɔ sran klolɛ dan’n i ndɛ?
?Like sacilɛ lika’n* nun lɔ’n, be kwla kan nanwlɛfuɛ mɔ a ti’n i ndɛ?
12 ?Aosin tuun’n nun lɔ’n, be kwla si ɔ abonuan sa mun?
?Awlafiɛ mɛn’n nun lɔ’n, be kwla si ɔ sa nuan su sɛsɛ yolɛ’n?+
13 Sanngɛ Zoova, n kpan flɛ wɔ titi kɛ a uka min.+
Nglɛmun kwlaa’n, min srɛlɛ’n wo ɔ ɲrun.+
14 ?Ee Zoova, ngue ti yɛ a yi min blo-ɔ?+
?Ngue ti yɛ a fa ɔ ɲrun’n fia min wun-ɔn?+
15 Kɛ ɔ fɛ i min kaan nun’n,n wun ɲrɛnnɛn, yɛ n wo wie’n i wun koko.+
Sa kekleekle nga a kplin su mɔ be tɔ min su’n be ti’n, min akunndan’n w’a sanngan.
16 Ɔ ya m’ɔ jue kɛ sin sa’n w’a kata min su.+
Ɔ sa sroesroe’m be su kun min.
17 Be bo sin yia min kɛ nzue sa aliɛ ba kwlaa nun.
Be kata min su buekwlaa su.*
18 Min janvuɛ mun nin be nga e nin be e san nun’n, a fuannin be ɔli min wun mmua.+
Aosin’n w’a kaci min janvuɛ.
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Nian Ndɛ’m be bo tulɛ lika’n nun lɔ.
^ Annzɛ “Klu naan tie.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Annzɛ “kɛ sran wie m’ɔ leman wunmiɛn’n sa.”
^ Annzɛ “ndia’n.”
^ Ebr., “ɔ sa nunman be su kun.”
^ Annzɛ “Abadɔn’n.”
^ Be kwla se ekun kɛ “Be kwlaa be kata min su kpɛ kunngba.”
