Jue Mun 80:1-19
Ɔ ti jue tofuɛ’m be su kpɛn’n i liɛ. “Lisi su.” Ɔ ti be wla kpɛnlɛ like.Azafu i jue-ɔ.+
80 Ee, wɔ mɔ a nian Izraɛli i lika kɛ bua sunianfuɛ’n fa niɛn i bua’m be lika’n sa’n, tie.
Wɔ mɔ a kle Zozɛfu i atin kɛ be fa kle bua fa kun i atin sa’n, tie.+
Wɔ mɔ a ti famiɛn bia’n su seribɛn’m be su nglo’n,*+
kpaja.*
2 Yi ɔ tinmin’n i nglo+
Efraimun nin Bɛnzamɛn, ɔ nin Manase be ɲrun.
Bla wa de e.+
3 Ee Ɲanmiɛn, yo maan e sin e osu’n nun ekun.+
Maan ɔ ɲrun’n kpaja e su naan e fite nun.+
4 ?Ɲanmiɛn Zoova, wɔ mɔ a ti sonja’m be su kpɛn’n, cɛn benin ko naan ɔ nvlefuɛ’m be srɛlɛ’n w’a yoman ɔ tɛ kun?+
5 A fa be ɲinmuɛn nzue’n man be naan be di i kɛ kpanwun sa.
Yɛ a yo maan be nɔn be ɲinmuɛn nzue kpanngban kpa.
6 A yaci e mantanfuɛ’m be lɛ maan be kan ndɛnngan e dunman nun.
E kpɔfuɛ’m be yo e finfin kɛ be fa klo’n sa.+
7 Ee Ɲanmiɛn, wɔ mɔ a ti sonja’m be su kpɛn’n, yo maan e sin e osu’n nun ekun.
Maan ɔ ɲrun’n kpaja e su naan e fite nun.+
8 A fali viɲin kun+ Ezipti lɔ fiteli,a fuannin nvlenvle mun yɛ a tali.+
9 A yoli lika kun weiin mɛnnin i,kpɛkun ɔ trali ndin yɛ ɔ yili asiɛ’n.+
10 I fɔnvɔ’n katali oka’m be su,yɛ i sama’m be katali Ɲanmiɛn i sɛdri waka’m be su.
11 I sama’m be ɔli lele be juli jenvie’n su lɔ,yɛ i ng’ɔ fɛfɛli i wun’n, ɔ ɔli lele juli Nzue ba’n* su lɔ.+
12 ?Ngue ti yɛ a bubuli viɲin’n i wun yɔbuɛ talɛ’n+
naan be kwlaa nga be sin i wun lɛ’n be titi i su mma’n niɔn?+
13 Blo kɔkɔti’m be saci i,yɛ blo nnɛn’m be di.+
14 Ee Ɲanmiɛn, wɔ mɔ a ti sonja’m be su kpɛn’n, yaci, sa ɔ sin.
Kɛ a o ɲanmiɛn su lɔ’n, kpɛ ɔ ɲin asiɛ’n su wa naan nian!
Nian viɲin sɔ’n i lika.+
15 Nian waka* mɔ a fali ɔ sa fama’n tali’n i lika.+
Yɛ nian ba yasua* nga a mɛnnin i wunmiɛn naan ɔ yo ɔ liɛ’n.+
16 Be wɔli nun,+ be kpɛli i bo.
Kɛ a kpannin’n, be nunnunnin.
17 Maan ɔ sa’n suan sran m’ɔ o ɔ sa fama su’n i bo,maan ɔ suan sran mɔ a mɛnnin i wunmiɛn naan ɔ yo ɔ liɛ’n i bo.+
18 I liɛ’n, e su kaciman e sin e siman wɔ.
Yaci e nguan nun maan e bo wɔ dunman’n.
19 Ee Ɲanmiɛn Zoova, wɔ mɔ a ti sonja’m be su kpɛn’n, yo maan e sin e osu’n nun ekun,Maan ɔ ɲrun’n kpaja e su naan e fite nun.+
