Jue Mun 69:1-36
Ɔ ti jue tofuɛ’m be su kpɛn’n i liɛ. “Lisi su.” Davidi i jue-ɔ.
69 Ee Ɲanmiɛn, de min, afin nzue’n su wa di min.+
2 M’an mlɔn nnɔtiɛ mɔ i bo ti kploun’n nun, kan asiɛ kee nunman lɛ’n.+
M’an tɔ nzue mɔ i bo ti kploun’n nun.
Nzue m’ɔ sonji ndɛndɛ’n w’a fa min w’a wɔ.+
3 M’an kpan m’an flɛ Ɲanmiɛn lele m’an fɛ,+min alowa’n yo min ya,m’an minndɛ Ɲanmiɛn lele min ɲinma’m b’a fɛ.+
4 Be nga be kpɔ min sa ngbɛn’n,+b’a sɔn kpanngban kpa b’a tra min timuɛn’n.
Be nga be kunndɛ kɛ bé kún min’n,mɔ be ti min kpɔfuɛ tɛ kpa’n* b’a sɔn kpa.
Be miannin min kɛ n yi like mɔ m’an wuaman’n n fa man.
5 Ee Ɲanmiɛn, a si sinnzin nga n dili’n,yɛ sa tɛ nga n yoli’n ɔ timan fiawa ɔ ɲrun.
6 Min Min, wɔ mɔ a Sie Like Kwlakwla’n, Zoova, wɔ mɔ a ti sonja’m be su kpɛn’n,nán maan be nga be fa be wla gua ɔ su’n be wun ɲannzuɛn min dunman nun.
Ee Izraɛli Ɲanmiɛn,nán maan be nga be kunndɛ wɔ’n be wun ɲannzuɛn min dunman nun.
7 Ɔ dunman nun’n be yo min finfin,+min ɲin gua ase.+
8 M’an kaci aofuɛ min niaan’m be ɲrun,m’an kaci aofuɛ min nin’n i mma’m be ɲrun.+
9 Ɔ sua’n i klolɛ’n yrayra min klun lɔ kɛ sin sa.+
Nzowa nga be nga be yo ɔ finfin’n be kpɛ wɔ’n, ɔ tɔli min su wa.+
10 Kɛ n cili nglɛmun n fa yoli min wun aunnvɔɛfuɛ’n,*
be kpɛli min nzowa.
11 Kɛ n wlali bajɛ tralɛ’n,be yoli min finfin.*
12 Be nga be tran klɔ’n i anuan’n nun’n, min ndɛ yɛ be kan-ɔn,yɛ nzanbɔɛfuɛ’m be fa min kpɛ jue.
13 Sanngɛ Zoova, blɛ ng’ɔ nin i fata’n nun’n,maan min srɛlɛ’n to wɔ lɔ.+
Ɔ sran klolɛ dan’n ti’n,yo sa nga a yo fa de sran titi’n fa tɛ min su.+
14 Yi min nnɔtiɛ’n nun fite,nán yaci min lɛ naan n mlɔn.
De min be nga be kpɔ min’n be sa nun,yi min nzue mɔ i bo ti kploun’n nun fite.+
15 Nán yaci min lɛ naan nzue dan m’ɔ sonji ndɛndɛ’n fa min wɔ.+
Nán yaci min lɛ naan nzue bunman’n* mɛn min.
Yɛ nán yaci min lɛ naan gbo’n i nuan’n muanmin su.+
16 Ee Zoova, tɛ min su, afin ɔ sran klolɛ dan’n ti kpa.+
Ɔ sran aunnvɔɛ silɛ dan’n ti’n, kpɛ ɔ ɲin min su wa,+
17 yɛ nán fa ɔ ɲrun’n fia ɔ sufuɛ’n i wun.+
Tɛ min su ndɛndɛ, afin n wo ɲrɛnnɛn nun.+
18 Wunnge min wun wa naan de min.
Kpɔ min ti, min kpɔfuɛ’m be ti.
19 A si kɛ be kpɛ min nzowa, n wun ɲannzuɛn yɛ min ɲin gua ase.+
A wun min kpɔfuɛ’m be kwlaa.
20 Nzowa’n ti’n min awlɛn’n w’a kpɔtɔ, yɛ kannin’n kwlá wieman.*
N kunndɛ kɛ be si min aunnvɔɛ, sanngɛ sran fi nianman min lɔ.+
N kunndɛ fɔnvɔfuɛ, sanngɛ n ɲanman sran.+
21 Kɛ ɔ yo naan be man min aliɛ’n, like ng’ɔ kun’n* yɛ be fa mannin min-ɔn.+
Yɛ kɛ nzuewe kunnin min’n, be mannin min vinɛgli kɛ n nɔn.+
22 Maan be tabli’n kaci kɛ aya sa naan ɔ tra be.
Maan be aɲanbeun’n kaci kɛ lala sa.+
23 Maan be ɲin su lu be naan b’a wunman ase.
Yo maan be afiɛn’n usu titi.
24 Yi ɔ ya dan’n i nglo be lika.
Yɛ maan ɔ ya m’ɔ jue kɛ sin sa’n ɔ di be mlɔnmlɔn.+
25 Maan be nanmue’m* be tɔ srolo.
Nán maan sran tran be tannin sua’m be nun kun.+
26 Afin be wanndi fuan sran nga a finnin i like’n,yɛ be yaciman be nga a yoli be like yaya’n be su afɛ’n i ndɛ kanlɛ.
27 Yo maan be akunndan’n bu be fɔ tra laa’n,yɛ nán bu be sran kpa.
28 Maan be nunnun be dunman’n be nga be o nguan nun’n be fluwa’n nun.*+
Yɛ nán maan be klɛ be dunman sran kpa’m be nun.+
29 Sanngɛ min wla w’a bo min wun yɛ n wo afɛ nun.+
Ee Ɲanmiɛn, maan delɛ mɔ a de sran’n ɔ sasa min.
30 Ń tó jue ń mánmán Ɲanmiɛn i dunman’n,yɛ ń lɛ́ i ase ń fá yí i ayɛ.
31 I sɔ’n jɔ́ Zoova i klun trá nannin tola mɔ be famɛn i’n.
Ɔ́ jɔ́ i klun trá nannin gbanflɛn m’ɔ le wɛ nin ja bui mɔ be fa mɛn i’n.+
32 Wun ase kanfuɛ’m bé wún i sɔ’n yɛ be klun jɔ́.
Amun mɔ amun kunndɛ Ɲanmiɛn’n, maan amun wla gua ase.
33 Afin Zoova fɛ i su sie i yalɛfuɛ’m be nuan bo,+yɛ i ɲin su kpaman i sran mɔ be trali be ɔli’n be su.+
34 Maan ɲanmiɛn’n nin asiɛ’n be mɛnmɛn i,+maan jenvie’n ɔ nin i nun ninnge’m be kwlaa be mɛnmɛn i.
35 Afin Ɲanmiɛn wá dé Siɔn,+yɛ ɔ́ kplán Zida klɔ’m be uflɛ,kpɛkun i nvle’n nunfuɛ’m bé trán lɛ, yɛ ɔ́* káci be liɛ.
36 Ɔ́ káci i sufuɛ’m be mma’m be aja like,+yɛ be nga be klo i dunman’n+ bé trán su.
Ja ngua lɔ ndɛ mun
^ Annzɛ “be nga be kpɔ min ngbɛn’n.”
^ Be kwla se ekun kɛ “Kɛ n sunnin mɔ n cili nglɛmun’n.”
^ Ebr., “be fa min kpɛli flɛn.”
^ Annzɛ “kunman’n.”
^ Annzɛ “min wla w’a wie bo.”
^ Annzɛ “nɲa m’ɔ kwla kun sran’n.”
^ Annzɛ “nanmue mɔ be wun ti siwa’n.”
^ Annzɛ “nguan fluwa’n nun.”
^ Yɛle kɛ, asiɛ’n.
