Jue Mun 18:1-50
Ɔ ti jue tofuɛ’m be su kpɛn’n i liɛ. Zoova i sufuɛ Davidi yɛ ɔ toli-ɔ. I nun mɔ Zoova deli i i kpɔfuɛ’m be kwlaa ɔ nin Saili be sa nun’n, yɛ ɔ toli jue sɔ’n manmannin Zoova-ɔ. Ɔ seli kɛ:+
18 Ee Zoova, n klo wɔ, wɔ yɛ a man min wunmiɛn-ɔn.+
2 Zoova ti min yɔbuɛ, ɔ ti min fiawlɛ, yɛ ɔ ti min defuɛ.+
Min Ɲanmiɛn’n ti min yɔbuɛ,+ i nun yɛ n fia-ɔ,ɔ ti min ɲrɛn, nin min wɛ* ng’ɔ de min’n,* nin min fiawlɛ kpa.+
3 N bo flɛ Zoova m’ɔ nin manmanlɛ fata’n,yɛ ɔ́ dé min min kpɔfuɛ’m be sa nun.+
4 Wie’n i ɲanman mun b’a to b’a bla min.+
Finfinfuɛ wie mɔ be sɔnnin kpa kɛ nzue dan wie sa’n, be kunnin min srɛ dan.+
5 Ndia’n* i ɲanman’m be toto blali min,wie’n w’a sua min wun aya.+
6 Kɛ ń wún ɲrɛnnɛn’n, n kpan flɛli Zoova,m’an yaciman min Ɲanmiɛn’n i flɛlɛ kɛ ɔuka min.
I kusu, kɛ ɔ o i sua’n nun lɔ’n, ɔ tili min nɛn’n,+kpanlɛ nga n kpan flɛli i kɛ ɔ uka min’n, ɔ guɛli i su nun.+
7 Asiɛ’n kejeli dan kpa,+oka’m be takatakawlɛ’m be kejeli,be keje kɔ wa, be keje kɔ wa, ya dan mɔ Ɲanmiɛn fali’n ti.+
8 Sin wunsrɛn’n fin i bue’n nun fiteli,sin m’ɔ yra like kɔlikɔli’n fin i nuan’n nun fiteli.+
Sɛnmlɛn ɲannglaan fin i wun lɔ fiteli.
9 Kɛ ɔ́ jrá’n, ɔ kannin ɲanmiɛn m’ɔ la nglo lɔ plaii’n i ase.+
Like wie kɛ ɲanmiɛn ble tritritri kpa sa’n woi ja bo.+
10 Ɔ fuli seribɛn kun su, ɔ tu bali.+
Ɔ o aolia nun sran kun* i ndɛwa’m be su, yɛ ɔ jra ndɛndɛ.+
11 Ɔ fali aosin’n fa kɛtɛli i wun,+ɔ fali nzue mɔ w’a mlan tritritri’n, ɔ nin ɲanmiɛn ble tuun’n
fa kɛtɛli i wun kɛ tannin sua wie sa.+
12 I ɲrun lɛ lika m’ɔ kpaja wauun’n nun’n,nzraama mɔ kɛ nzue tɔ́’n be gua’n, nin sɛnmlɛn ɲannglaan, be fin ɲanmiɛn ble’n i afiɛn fite.
13 I sin’n, Zoova kpannin kplannankplannan ɲanmiɛn su lɔ.+
Kɛ Ɲanmiɛn m’ɔ o Like Kwlaa Ti Su’n yoli maan be tili i nɛn’n,+nzraama mɔ kɛ nzue tɔ́’n be gua’n, nin sɛnmlɛn ɲannglaan be guali.
14 Ɔ toli i ta mma mun, kpɛkun be bo sanndili.+
Ɔ yoli maan ɲanmiɛn’n kpali sin, yɛ ɔ sanngannin be nun.+
15 Be wunnin nzue ba’m* be bo lɔ’n.+
Ee Zoova, fɔ mɔ a tuli be kekle’n ti’n, aunmuan ng’ɔ fin ɔ bue’n nun fiteli’n ti’n,asiɛ’n i takawlɛ’m be fiteli su weiin.+
16 Kɛ ɔ o nglo lɔ’n, ɔ toli i sa’n.
Ɔ trali min naan w’a yi min nzue bunman’n nun w’a fite.+
17 Ɔ deli min min kpɔfuɛ m’ɔ le wunmiɛn’n i sa nun,+ɔ deli min be nga be kpɔ min mɔ be wunmiɛn’n tra min liɛ’n, be sa nun.+
18 Kɛ ɲrɛnnɛn tɔli min su’n, be bali min su,+sanngɛ Zoova suannin min bo.
19 Ɔ fali min ɔli lika kun mɔ sa fi su ɲanman min lɔ’n* nun.
Ɔ klo min sa ti yɛ ɔ deli min-ɔn.+
20 Sa nuan su sɛsɛ mɔ n yo’n i nuan like yɛ Zoova fa man min-ɔn.+
Sa tɛ mɔ n yoman’n i nuan like yɛ ɔ fa man min-ɔn.+
21 Afin n nantili Zoova i atin’n su titi,yɛ m’an kpɔciman Ɲanmiɛn, afin i sɔ’n ti klunwi ayeliɛ.
22 I mmla’m be kwlaa be o min klun.
N su kpalomɛn i mmla mun.
23 N su yoman sa tɛ kaan sa i ɲrun,+ń nían min wun su naan m’an fɔnman.+
24 Maan Zoova nian sa nuan su sɛsɛ mɔ n yo’n su ɔ tua min kalɛ,+maan ɔ nian sa tɛ mɔ n yomɛn i ɲrun’n su ɔ tua min kalɛ.+
25 Sran ng’ɔ nin wɔ be nanti klanman’n, a nin i be nanti klanman.+
Sran ng’ɔ nanti seiin’n, ɔ kusu a kle kɛ a nanti seiin.+
26 Sran ng’ɔ ti sanwun’n, a kle i kɛ a ti sanwun,+sanngɛ sran ng’ɔ ti gblɛfuɛ’n, a kle i kɛ a si ngwlɛlɛ.+
27 Afin a de be nga be leman ɲrun’n,*+
sanngɛ a kan wun tufuɛ’m be ase.+
28 Afin Zoova, wɔ yɛ a sɔ min kannin’n i nuan-ɔn.
Min Ɲanmiɛn, a yo maan aosin tritri nga n wo nun’n, ɔ kpaja.+
29 Ɔ fanngan nun’n, n kwla fuan awiefuɛ mun.+
Ɲanmiɛn i fanngan nun’n, n kwla fu klɔ’n i wun talɛ’n su n jra lɔ.+
30 Ɲanmiɛn Kpli i atin’n ti kpa lelele.+
Ndɛ nga Zoova kan’n, fiɛn kaan sa nunmɛn i sin.+
Be kwlaa nga be fiɛ i sin’n, ɔ sasa be kɛ ɲrɛn sa.+
31 ?Sɛ nán Zoova kunngba cɛ’n, wan yɛ ɔ ti Ɲanmiɛn ekun-ɔn?+
?Sɛ w’a yoman kɛ e Ɲanmiɛn’n sa’n, yɔbuɛ uflɛ o lɛ?+
32 Ɲanmiɛn Kpli yɛ ɔ man min wunmiɛn-ɔn.+
Ɔ́ yó maan min ɲrun atin’n yó seiin.+
33 Ɔ yo maan min ja nun bli kɛ flete sa.
Ɔ fa min jran lika nga be ti nglonglo kpa’n be su.+
34 Ɔ kle min alɛ kunlɛ,n kwla cuɛn ta nga be fali aaba be yoli’n nun.
35 A fa ɔ ɲrɛn’n man min naan ɔ sasa min,+ɔ sa fama’n suan min bo,ɔ wun ase mɔ a kan’n ti’n, n ɲan ɲrun.+
36 A trɛli atin’n nun mannin min,ɔ maan min ja’m be su seliman.+
37 Ń fúan min kpɔfuɛ mun lele ń kwlá be.
Sɛ be nin-a nunnunman sekeseke’n, nn n nin-a saman min sin.
38 Ń núnkun be, ɔ maan be su kwlá jasoman kun,+ń tíatía be su.
39 Á mán min wunmiɛn naan m’an kwla kun alɛ,á yó maan min ɲrun tanndanfuɛ’m bé tɔ́ min bo lɛ.+
40 Á yó maan min kpɔfuɛ’m bé wánndi min bo.*
Yɛ ń núnnún be nga be kpɔ min’n.*+
41 Be kpan kunndɛ ukalɛ, sanngɛ sran fi nunman lɛ naan w’a de be.
I kpa bɔbɔ’n be kpan flɛ Zoova, sanngɛ ɔ tɛman be su.
42 Ń núnkun be, bé yó kɛ ndutre mɔ aunmuan’n fɛ i kɔ’n sa.
Ń gúa be blo kɛ nnɔtiɛ mɔ be guɛ i blo akpɔ su’n sa.
43 Á dé min nvle’n nunfuɛ mɔ be kan min wun ndɛ’n be sa nun.+
Á fá min síe nvlenvle’m be su kpɛn,+nvle nga n simɛn i laa bɔbɔ’n, i nunfuɛ’m bésú min.+
44 Ndɛ ngbɛn mɔ bé tí i sa’n ti’n, be ɲin yí min.
Aofuɛ’m bé bá bé wá kóto min bo.+
45 Aofuɛ’m be sa sin búbú be.*
Kɛ bé fín be fiawlɛ’m be nun bé fíte’n, bé úsu sa tututu.
46 Zoova lafiman! Maan be yi min Yɔbuɛ’n i ayɛ!+
Maan manmanlɛ’n yo Ɲanmiɛn m’ɔ de min’n i liɛ.+
47 Ɲanmiɛn Kpli yɛ ɔ tu min klunngbɔ-ɔ.+
Ɔ yo maan nvlenvle’m be lo be wun man min.
48 Ɔ de min min kpɔfuɛ mɔ be yo wlɛ’n be sa nun.
A fa min sie be nga be nin min kun’n be ti sunglo kpa.+
A de min sran wlɛfuɛ’n i sa nun.
49 I sɔ’n ti’n, Zoova, ń mánmán wɔ nvlenvle’m be nun,+yɛ ń tó jue* ń mánmán ɔ dunman’n.+
50 Ɔ yo sa dandan mun fa de i famiɛn’n.+
Ɔ kle sran ng’ɔ kpɛli i’n kɛ ɔ klo i dan,+ɔ kle Davidi nin i osu’n nunfuɛ’m be kɛ ɔ su yaciman be klolɛ le.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Annzɛ “min defuɛ m’ɔ le wunmiɛn kpa’n.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Annzɛ “aunmuan’n.”
^ Annzɛ “nzue sama mun.”
^ Annzɛ “lika gbawun kun.”
^ Annzɛ “ɲrɛnnɛnfuɛ mun.”
^ Annzɛ “Á fá min kpɔfuɛ’m be wiasin’n mán min.”
^ Ebr., “ń yó maan bé múan be nuan.”
^ Annzɛ “be wunmiɛn’n wíe.”
^ Annzɛ “ń bó miziki.”
