Numeros 18:1-32
18 Katapos, hi Jehova nagsiring kan Aaron: “Ikaw ngan an imo mga anak nga lalaki ngan an imo panimalay* an may baratunon ha bisan ano nga pagtalapas ha mga sugo may kalabotan ha santuaryo,+ ngan ikaw ngan an imo mga anak nga lalaki an may baratunon ha bisan ano nga pagtalapas kontra ha iyo pagkasaserdote.+
2 Padaopa liwat an imo kabugtoan nga lalaki nga tikang ha tribo ni Levi, nga tribo han imo tatay, basi makaupod mo hira ngan magserbi ha imo+ ngan ha imo mga anak nga lalaki ha atubangan han tolda han Pagpamatuod.+
3 Tutumanon nira an ira mga responsabilidad ha imo ngan ha bug-os nga tolda.+ Pero kinahanglan diri hira humirani ha mga garamiton han baraan nga lugar ngan ha halaran, basi diri hira mamatay pati kamo.+
4 Maupod hira ha imo ngan magtutuman han ira mga responsabilidad may kalabotan ha tolda nga katirokan ngan ha ngatanan nga buruhaton ha tolda, ngan waray tawo nga diri awtorisado* nga mahirani ha iyo.+
5 Kinahanglan niyo tumanon an iyo responsabilidad ha baraan nga lugar+ ngan ha halaran,+ basi waray na kasina+ nga umabot ha katawohan han Israel.
6 Ako mismo an nagkuha han iyo kabugtoan nga lalaki, an mga Levita, tikang ha mga Israelita sugad nga regalo ha iyo.+ Iginhatag hira kan Jehova basi manginano han buruhaton ha tolda nga katirokan.+
7 Ikaw ngan an imo mga anak an responsable ha iyo mga buruhaton sugad nga saserdote may kalabotan ha halaran ngan ha aada ha sulod han kurtina,+ ngan kamo an magtutuman hini nga buruhaton.+ Iginhahatag ko an pagkasaserdote sugad nga regalo ha iyo, ngan an bisan hin-o nga diri awtorisado nga tawo* nga nahirani kinahanglan patayon.”+
8 Hi Jehova nakiistorya pa kan Aaron: “Ako mismo an nagtutuin ha imo ha pagdumara han mga kontribusyon ha akon.+ Gintatagan ko ikaw ngan an imo mga anak nga lalaki hin bahín han ngatanan nga baraan nga butang nga igin-amot han mga Israelita sugad nga permanente nga malon.+
9 Magigin imo ini tikang ha pinakabaraan nga mga halad nga ginsunog ha kalayo: an tagsa nga ira halad, upod na an ira mga halad nga tikang ha lugas+ ngan an ira mga halad tungod han sala+ ngan an ira mga halad tungod han pagin salaan+ nga ira gindadara ha akon. Baraan gud ito nga butang para ha imo ngan ha imo mga anak.
10 Kakaunon mo ito ha baraan gud nga lugar.+ Mahimo kumaon hito an tagsa nga lalaki. Magigin baraan ito nga butang para ha imo.+
11 Imo liwat ini: an mga regalo nga ira iginhahatag+ upod an ngatanan nga halad nga gin-aabyog+ han mga Israelita. Iginhahatag ko ito ha imo ngan ha imo mga anak nga lalaki ngan ha imo mga anak nga babaye sugad nga permanente nga malon.+ Mahimo kumaon hito an ngatanan nga limpyo nga tawo dida ha imo balay.+
12 “An ngatanan han pinakamaopay nga lana ngan an ngatanan han pinakamaopay nga bag-o nga bino ngan an lugas, an ira siyahan nga mga bunga,+ nga ira iginhahatag kan Jehova, iginhahatag ko ito ha imo.+
13 An siyahan nga hinog nga mga bunga han ngatanan dida ha ira tuna, nga ira dadad-on kan Jehova, magigin imo.+ Mahimo kumaon hito an ngatanan nga limpyo nga tawo dida ha imo balay.
14 “An tagsa nga iginlain nga butang* dida ha Israel magigin imo.+
15 “An tagsa nga suhag han ngatanan nga buhi nga linarang,*+ nga ira ighahalad kan Jehova, tawo man ito o hayop, magigin imo. Pero kinahanglan tubuson mo gud an suhag han katawohan,+ ngan sadang mo tubuson an suhag han mahugaw nga mga hayop.+
16 Tutubuson mo ito uyon ha presyo han pantubos kon usa ka bulan an edad hito tipaigbaw, uyon ha ginbanabana nga kantidad nga lima ka sekel* nga silber,+ uyon ha kabug-aton han sekel ha baraan nga lugar.* Bainte ka gera* ito.
17 An suhag nga baka nga lalakí o suhag nga nati nga karnero nga lalakí o suhag nga kanding, amo la an diri mo tutubuson.+ Mga baraan ito. Igwiwisik mo an dugo hito dida ha halaran,+ ngan an tambok hito imo papaasuhon sugad nga halad nga ginsunog ha kalayo nga nakakapalipay* nga hamot para kan Jehova.+
18 Ngan magigin imo an karne hito. Pariho han dughan han halad nga gin-aabyog ngan pariho han too nga paa, magigin imo ito.+
19 An ngatanan nga baraan nga kontribusyon nga ihahatag han mga Israelita kan Jehova,+ akon iginhahatag ha imo ngan ha imo mga anak nga lalaki ngan ha imo mga anak nga babaye sugad nga permanente nga malon.+ Usa ito nga nagpapadayon nga kasabotan han asin* ha atubangan ni Jehova para ha imo ngan ha imo katulinan.”
20 Hi Jehova nagsiring pa kan Aaron: “Ha ira tuna diri ka magkakaada hin panurundon, ngan waray bahin han tuna nga magigin imo dida ha ira.+ Ako an imo malon ngan an imo panurundon ha butnga han mga Israelita.+
21 “Yana kitaa nga iginhahatag ko ha mga anak ni Levi an kada ikanapulo nga bahin+ ha Israel sugad nga panurundon nga balos ha pagtuman han ira buruhaton, an buruhaton ha tolda nga katirokan.
22 Diri na madaop ha tolda nga katirokan an katawohan han Israel, kay kon dumaop hira makakasala hira ngan mamamatay.
23 An mga Levita amo an magtutuman han buruhaton ha tolda nga katirokan, ngan hira an may baratunon han ira pagtalapas.+ Usa ito nga nagpapadayon nga surundon durante han ngatanan niyo nga henerasyon nga diri hira magtatag-iya hin panurundon dida ha mga Israelita.+
24 Kay iginhahatag ko ha mga Levita sugad nga panurundon an ikanapulo nga bahin nga igin-amot han katawohan han Israel, nga ira ihahatag kan Jehova. Ito an hinungdan nga nagsiring ako ha ira, ‘Ha butnga han mga Israelita, diri hira magtatag-iya hin panurundon.’”+
25 Katapos, hi Jehova nagsiring kan Moises:
26 “Sumati an mga Levita, ‘Makarawat kamo tikang ha mga Israelita han ikanapulo nga bahin nga iginhahatag ko ha iyo tikang ha ira sugad nga iyo panurundon,+ ngan tikang hito mahatag kamo hin ikanapulo nga bahin han ikanapulo nga bahin sugad nga kontribusyon para kan Jehova.+
27 Ngan tatagdon ito nga iyo kontribusyon, nga sugad hin ito an lugas tikang ha giriokan+ o an bug-os nga produkto tikang ha purog-an nga panbino o purog-an nga panlana.
28 Hini nga paagi mahatag liwat kamo hin kontribusyon para kan Jehova tikang ha ngatanan nga ikanapulo nga bahin nga iyo nakakarawat ha mga Israelita, ngan tikang hito iyo ihahatag an kontribusyon para kan Jehova ngadto kan Aaron nga saserdote.
29 Maghahatag kamo han ngatanan nga klase hin kontribusyon para kan Jehova tikang ha pinakamaopay gud han ngatanan nga regalo nga iginhatag ha iyo+ sugad nga baraan nga butang.’
30 “Ngan kinahanglan sidngan mo hira, ‘Kon naghahatag kamo han pinakamaopay hito, tatagdon ito nga para ha mga Levita sugad nga produkto tikang ha giriokan ngan sugad nga produkto tikang ha purog-an nga panbino o purog-an nga panlana.
31 Mahimo niyo ito kaunon ngan han iyo sulod-balay ha bisan diin nga lugar, kay ito an iyo suhol sugad nga balos han iyo pag-alagad ha tolda nga katirokan.+
32 Diri kamo makakasala may kalabotan hito kon iginhahatag niyo an pinakamaopay tikang hito, ngan ayaw niyo pagpasiparahi an baraan nga mga butang han mga Israelita, kay mamamatay kamo.’”+
Mga footnote
^ Lit., “estranghero,” karuyag sidngon, usa nga tawo nga diri kapamilya ni Aaron.
^ Lit., “estranghero,” karuyag sidngon, usa nga tawo nga diri kapamilya ni Aaron.
^ Karuyag sidngon, an ngatanan nga ginhimo nga sagrado para ha Dios, pinaagi ha paglain hito para ha Dios nga diri puydi bawion ngan diri puydi tubuson.
^ Lit., “han ngatanan nga unod.”
^ O “han baraan nga sekel.”
^ O “nakakarelaks.” Lit., “nakakapakalma.”
^ Karuyag sidngon, permanente ngan diri nagbabag-o nga kasabotan.
