Numeros 17:1-13
-
Tungkod ni Aaron nga nanaringsing usa nga tigaman (1-13)
17 Hi Jehova nagsiring kan Moises:
2 “Pakiistorya ha mga Israelita ngan kuha tikang ha ira hin usa nga tungkod para ha tagsa nga panimalay,* tikang ha mga lider han tagsa nga panimalay,*+ 12 nga tungkod ngatanan. Isurat an ngaran han kada usa dida ha iya tungkod.
3 Igsusurat mo an ngaran ni Aaron ha tungkod ni Levi, kay usa la an tungkod para ha ulo han tagsa nga panimalay.*
4 Ibutang an mga tungkod ha tolda nga katirokan ha atubangan han Pagpamatuod,+ diin pirme ako nagpapakita ha iyo.+
5 Ngan an tungkod han tawo nga akon pilion+ mananaringsing, ngan pauundangon ko an pagngurutob han mga Israelita kontra ha akon,+ nga ira liwat iginngungurutob kontra ha iyo.”+
6 Salit hi Moises nakiistorya ha mga Israelita, ngan an ngatanan nira nga lider naghatag ha iya hin mga tungkod—usa nga tungkod para ha tagsa nga lider han panimalay,* 12 nga tungkod—ngan kaupod han ira mga tungkod an tungkod ni Aaron.
7 Katapos, iginbutang ni Moises an mga tungkod ha atubangan ni Jehova didto ha tolda han Pagpamatuod.
8 Han sunod nga adlaw, han kinadto hi Moises ha tolda han Pagpamatuod, kitaa! an tungkod ni Aaron nga para ha panimalay ni Levi nanaringsing ngan namiyoos ngan namukad ngan namunga hin hinog nga mga almendras.
9 Katapos, igin-gawas ni Moises an ngatanan nga tungkod tikang ha atubangan ni Jehova ngan gindara ngadto ha ngatanan nga katawohan han Israel. Ira ito ginkita, ngan ginkuha han tagsa nga lalaki an iya kalugaringon nga tungkod.
10 Katapos, hi Jehova nagsiring kan Moises: “Ibalik an tungkod ni Aaron+ ha atubangan han Pagpamatuod sugad nga butang nga titipigan para magin tigaman+ ha mga anak han pagrebelde,+ basi umundang an ira mga pagngurutob kontra ha akon ngan basi diri hira mamatay.”
11 Ginbuhat dayon ni Moises an iginsugo ni Jehova ha iya. Ito gud an iya ginbuhat.
12 Katapos, an mga Israelita nagsiring kan Moises: “Yana mamamatay kami, sigurado nga mapupoo kami, mapupoo kami ngatanan!
13 An bisan hin-o nga dumaop la ha tabernakulo ni Jehova mamamatay!+ Magkakamatay ba kami ngatanan?”+
