Numeros 12:1-16

  • Miriam ngan Aaron kinontra kan Moises (1-3)

    • Moises pinakamaaghop ha ngatanan (3)

  • Moises gindepensahan ni Jehova (4-8)

  • Miriam ginhampak hin liprosi (9-16)

12  Hira Miriam ngan Aaron nagyakan kontra kan Moises tungod han Cusita nga babaye nga iya nagin asawa, kay nagkuha hiya hin Cusita nga asawa.+  Nagsiniring hira: “Pinaagi la ba kan Moises nagyayakan hi Jehova? Diri ba nagyayakan liwat hiya pinaagi ha aton?”+ Ngan hi Jehova nagpinamati.+  Hi Moises an pinakamaaghop ha ngatanan nga tawo*+ ha bawbaw han tuna.  Hi Jehova nagsiring dayon kanda Moises, Aaron, ngan Miriam: “Gawas kamo nga tulo, ngadto ha tolda nga katirokan.” Salit ginawas hira nga tulo.  Ngan hi Jehova linusad ha harigi nga dampog+ ngan tinindog ha aragian tipasulod ha tolda, ngan gintawag hira Aaron ngan Miriam. Dinaop hira nga duha.  Katapos, hiya nagsiring: “Alayon pamatii an akon mga pulong. Kon may propeta hi Jehova dida ha iyo, magpapakilala ako ha iya ha usa nga bisyon,+ ngan makikiistorya ako ha iya ha usa nga inop.+  Pero diri sugad hito an akon ginbuhat ha akon surugoon nga hi Moises! Ha iya igintapod an akon bug-os nga panimalay.*+  Magkaatubang* nga nakikiistorya ako ha iya+ hin matin-aw, diri pinaagi hin mga patigo; ngan an presensya ni Jehova amo an iya nakikita. Salit, kay ano nga waray kamo mahadlok pagyakan kontra ha akon surugoon, kontra kan Moises?”  Salit an kasina ni Jehova naglaga kontra ha ira, ngan binaya hiya ha ira. 10  An dampog nagpahirayo tikang ha bawbaw han tolda, ngan kitaa! hi Miriam ginhampak hin liprosi nga sugad kabusag han niebe.+ Katapos, inatubang hi Aaron kan Miriam, ngan iya nakita nga ginhampak hiya hin liprosi.+ 11  Nagsiring dayon hi Aaron kan Moises: “Nakikimalooy ako ha imo, ginoo ko! Alayon ayaw pabay-i nga sirotan kami tungod hini nga sala! Kalurongan adto nga amon ginbuhat. 12  Alayon, ayaw pabay-i nga magin pariho hiya hin bata nga igin-anak nga patay, nga an unod haros dunot na han katawo!” 13  Ngan hi Moises nangaraba kan Jehova, nga nasiring: “O Dios, alayon tambala hiya! Alayon!”+ 14  Hi Jehova binaton kan Moises: “Kon tuprahan hiya han iya tatay ha iya mismo nawong, diri ba maaalohan hiya ha sulod hin pito ka adlaw? Ikwarentinas hiya hin pito ka adlaw ha gawas han kampo,+ ngan katapos hito mahimo na hiya pabalikon.” 15  Salit hi Miriam ginkwarentinas hin pito ka adlaw ha gawas han kampo,+ ngan an katawohan waray manangtang han ira mga tolda basi lumarga tubtob nga nakabalik hi Miriam. 16  Katapos, an katawohan binaya ha Hazerot+ ngan nagkampo ha kamingawan han Paran.+

Mga footnote

O “mapainubsanon hinduro (malumo), labaw pa kay ha bisan hin-o nga tawo.”
Lit., “Ha akon bug-os nga panimalay, ginpapamatud-an niya nga matinumanon hiya.”
Lit., “Baba ha baba.”