Job 42:1-17
42 Insan inmebat si Job ed si Jehova, a kuan to:
2 “Amtak la natan a sarag mon gawaen so amin a bengatlaTan anggapo so nononoten mon gawaen ya agmo nagawaan.+
3 Inkuan mo, ‘Siopa yay mamapakilot ed simbawak ya andiay kakabatan?’+
Kanian nansalita ak, balet andian ak na pakatalosEd saray bengatlan makapakelkelaw ed siak, saramay agko amta.+
4 Inkuan mo, ‘Dengel ka pa, ta mansalita ak.
Tepetan ta ka, tan ipaamtam ed siak.’+
5 Nadngelan ko lay nipaakar ed sika,Balet natan et nanenengneng ta ka la.
6 Kanian bababawien ko iramay imbagak,+Tan diad pagbabawik et akayurong ak ed dabok tan dapol.”+
7 Sanen ayari lan akitongtong si Jehova ed si Job, inkuan nen Jehova ed si Elifaz a Temanita:
“Pinasyay sanok ko ed sika tan ed duaran kakaarom,+ ta agkayo nansalitay katuaan nipaakar ed siak,+ aliwan singa say lingkor kon si Job.
8 Natan et mangala kayo na pitoran kalakian a baka tan pitoran kalakian a karnero tan la kayo ed lingkor kon si Job, tan mangiyapay kayo na bagat a popoolan parad inkasikayo. Tan ipikasi kayo na lingkor kon si Job.+ Et seguradon awaten koy kerew to,* ya agko gawaen ed sikayo so unong ed inkamakulangkulang yo, ta agkayo nansalitay katuaan nipaakar ed siak, aliwan singa say lingkor kon si Job.”
9 Kanian ginawa di Elifaz a Temanita, Bildad a Suhita, tan Zofar a Naamatita so imbaga nen Jehova ed sikara. Tan inawat nen Jehova so pikakasi nen Job.
10 Kayarin impikasi nen Job iray kakaaro to,+ impangangga nen Jehova so paniirap nen Job+ tan sikatoy pinaaligwas to lamet.* Dinoble nen Jehova so walad sikato nensaman.+
11 Amin ya agagi ton lalaki tan bibii tan amin a datin kakaaro to+ et linmad sikato tan nandurungo ra diad abung to. Akiambegya rad sikato tan niligliwa ra lapud amin ya irap ya inyabuloy nen Jehova a nagawad sikato. Kada sakey ed sikara et angiter ed sikato na kuarta tan balitok ya ikaw.
12 Kanian mas lalon benendisyonan nen Jehova so kaunoran iran taon na bilay nen Job nen say nen inmuna,+ tan awalaan si Job na 14,000 karnero, 6,000 kamelyo, 1,000 paris na baka, tan 1,000 kabatyan ya asno.+
13 Sikato met so awalaan ni na pitoran anak a lalaki tan taloran anak a bibii.+
14 Say inngaran to ed panguloan ya anak ton bii et Jemima, say komadua et Kesia, tan say komatlo et Keren-hapuc.
15 Diad interon dalin et anggapoy bibiin makapipara ed inkaganggana na saray anak a bibii nen Job, tan sikara pati saray agagi ran lalaki et pinatawiran nen ama ra.
16 Kayari na saya, si Job et nambilay ni na 140 taon, tan anengneng to ray ananak to tan saray apo to—apatiran henerasyon.
17 Diad kaunoran et inatey si Job kayari na andukey tan napnek ya impanbilay to.*
Paimanod leksab
^ Literal, “Seguradon itangwak so lupa to.”
^ Literal, “binalintuag nen Jehova so inkaerel nen Job.”
^ Literal, “matatken tan nakda na saray agew.”
