Job 9:1-35
9 Et inmebat si Job, a kuan to:
2 “Amtak a tua iratay imbagam.
Balet panon a nibagan walad katunongan so sakey a too diad kaso to sumpad Dios?+
3 No walay malabay a misuppiatan ed Sikato,*+Agto makaebat na anggan sakey diad sanlibon tepet To.
4 Say Dios et makabat so puso to tan mabiskeg ed pakayari.+
Siopay nayarin onsumpa ed sikato ya agnasakitan?+
5 Iyaalis* to ray palandey ya anggapoy makakaamta;Diad sanok to et dederalen to iratan.
6 Yeyegyegen toy dalin,Kanian nayuyugayog iray lusek to.+
7 Say agew et igaganggan ton ag-onsinagTan sasaraan toy liwawa na saray bitewen;+
8 Sikaton bukor so mangibubuskag ed katawenan,+Tan sikatoy manaakar ed tapew na angkakabaleg a daluyon na dayat.+
9 Ginawa to ray konstelasyon ya Ash,* Kesil,* tan Kima,*+Tan saray konstelasyon diad abalaten a tawen;*
10 Sikatoy manggagawa na angkakabaleg tan agnausisa iran bengatla,+Saray makapakelaw a bengatla ya agnabilang.+
11 Sikatoy ondadalan ed abay ko, tan agko nanenengneng;Sikatoy onlalabas ed kawalaan ko, balet agko nabibidbir.
12 Sano walay sasamsamen to, siopay makapuger ed sikato?
Siopay makapangibagad sikaton, ‘Antoy gagawaen mo?’+
13 Agpokpokan na Dios so sanok to;+Anggan saray ontutulong ed Rahab*+ et ondakmomo ed sikato.
14 Nagkalalo la sirin sano onebat ak ed sikatoA nepeg kon pilien a maong iray salitak no misuppiatan ak ed sikato!
15 Anggano wala ak bilang ed katunongan, agak onebat ed sikato.+
Say nagawaan ko labat et mikasi ed ukom ko.*
16 No ontawag ak ed sikato, ebatan to ak kasi?
Agak manisian dengelen to ak,
17 Ta dederalen to ak diad panamegley na kalamidadTan paparakelen to ray sugat ko ya anggapoy makasengeg.+
18 Agto ak abuloyan a makaingas;Puro ampait a bengatla so iiter tod siak.
19 No nipaakar ed pakapanyari, sikato so mabiskeg.+
No nipaakar ed hustisya, ibabaga to: ‘Siopay makapangibagan walay eebatan ko?’*
20 No wala ak ed katunongan, kondenaen ak na mismon sangik;Anggano pansiasiansiaen koy integridad ko,* iyabawag ton nankasalanan* ak.
21 Anggano pansiasiansiaen koy integridad ko,* anggapoy kompiyansak ed sarilik;*Kabusol ko* so bilay ko.
22 Pareho lanlamang so nagagawa. Kanian ibabagak,‘Dederalen to so andiay kasalanan* tan pati say mauges.’
23 No walay inatey lapud biglan insabi na delap,Elekan to so panermen na andiay kasalanan.
24 Say dalin et inyawat ed samay mauges;+Sasakbongan To ray mata* na saray ukom ditan.
Ta no aliwan Sikato, siopa sirin ey?
25 Natan saray agew ko et mas maples nen say mensahero;+Ombabatik iratan ya agmakakanengneng na maabig.
26 Maples iratan ya onlalabas a singa baloton tanubong,Singa saray agilan mansasweng a manadagit ed biktima ra.
27 No ibagak ya, ‘Lingwanan ko lay reklamok,Umanen koy awawey ko tan magmaliw ak a maligsa,’
28 Ontakot ak nin siansia lapud amin a sakit a naliliknak,+Tan amtak ya agmo ak ipasen ya andiay kasalanan.
29 Siak so ompaway a nankasalanan.*
Kanian akin et mansagpot ak ni anta anggapoy nagunggonak?+
30 No manuras ak ed danum na natutunaw a niebe,Tan mansabon ak na limak,+
31 Iyan mo ak ed mapitek ya abot,Kanian anggan saray kawes ko et dimlaen da ak.
32 Ta sikatoy aliwan sakey a toon singa siak a nayarik ya ebatan,A nayari kamin manarap diad korte.+
33 Anggapoy siopaman a nayarin manggaway desisyon* ed baetan min dua,A nayarin magmaliw ya ukom mi.*
34 No itunda to lay panlelewet tod siak*Tan agto ak la taktakoten,+
35 Agak ontakot a mitongtong ed sikato,Ta agnisipor ed siak so mitongtong a natatakot.
Paimanod leksab
^ Odino “a mangawit ed Sikato diad korte.”
^ Odino “Eekalen.”
^ Nayarin tutukoyen na saya so konstelasyon a Baleg ya Oso (Ursa Major).
^ Literal, “saray dalem a kuarto na abalaten.”
^ Nayarin tutukoyen na saya so bibitewen a Pleyades diad konstelasyon a Taurus.
^ Nayarin tutukoyen na saya so konstelasyon ya Orion.
^ Nayarin sakey a baleg ya ayep ed dayat.
^ Odino posiblin, “ed kalaban kod korte.”
^ Literal, “nayarin mangipatawag ed siak?”
^ Odino “Anggano anggapoy kasalanan ko.”
^ Literal, “pikewet.”
^ Odino “Anggano anggapoy kasalanan ko.”
^ Odino “agko kabat so kamarerwak.”
^ Odino “Ipupulisay ko; Agko labay.”
^ Odino “iramay pansiasiansiaen day integridad da.”
^ Literal, “kalupaan.”
^ Literal, “mauges.”
^ Odino “Anggapoy manamegley.”
^ Literal, “mangitapew na lima to ed sikamin dua.”
^ Literal, “ekalen toy baston to manlapud siak.”
