Job 17:1-16
17 “Say espirituk et makapuy la, saray agew ko et nanaupot la;Manaalagar lad siak so ponponan.+
2 Papaliberan ak na saray managludlurey,+Tan kaukolan kon nengnengen so inkarebelyoso ra.
3 Komon ta awaten moy iiter ko bilang garantiya, tan iyatol mo.
Siopa ni arum a mipasamanod siak tan mamaseguro parad siak?+
4 Ta agmo imparungtal ed puso ra so pakatebek;+Kanian agmo ra itatandoro.
5 Nayarin iyopresi ton ikdan iray kakaaro to,Balet ta saray mata na ananak to et onkukuyep la.
6 Ginawa to ak a pantotongtongan* na saray totoo,+Kanian nilutlutdaan day lupak.+
7 Kinmuyep lay matak lapud gonigon,+Tan mapmabeng la ray taklay tan bikking ko.
8 Pankelawan iya na saray maptek a totoon makakanengneng,Tan say sakey ya inosente et nasyosyodotan ed samay mauges.*
9 Say matunong et mansiasiansia ed dalan to,+Tan say andian na kasalanan* et lalon ombibiskeg.+
10 Balet, amin yo et nayarin onla dia tan ituloy yoy pisusuppiatan yo,Ta anggapoy aromog kon marunong ed sikayo.+
11 Anampot la ray agew ko;+Aderal la ray planok, saray pipirawaten na pusok.+
12 Gagawaen dan agew so labi,Ya ibabaga ra: ‘Asingger lan onliwawa lapud ambilunget la.’
13 No manalagar ak, say Lubok* so magmaliw ya ayaman ko;+Ilirak so dukolan ko ed kabilungetan.+
14 Ibagak ed abot,*+ ‘Sika so amak!’
Tan diad bigis, ‘Sika so inak tan agik a bii!’
15 Kawalaan sirin na ilalok?+
Siopay makanengneng na ilalo parad siak?
16 Onlasur itan* diad abalewetan iran puerta na Lubok*Sano amin kami et manbabansag ya onleksab ed dabok.”+
