Job 33:1-33
33 “Balet natan, Job, dengel mo pa ray salitak;Talineng ka ed amin ya ibagak.
2 Imanom pa! Kaukolan kon biswatey sangik;Say dilak* et kaukolan a mansalita.
3 Ipapaamta na saray salitak so kaptekan na pusok,+Tan masimoon ya ibabalikas na bibil ko so amtak.
4 Ginawa ak na espiritu na Dios,+Tan abilay ak diad ingas na Makapanyarin-amin.+
5 Ebatan mo ak no sarag mo;Iyarap mod siak iray argumentom; alagey ka.
6 Nampara ta labat diad arapan na tuan Dios;Pinorma ak met manlapud pitek.+
7 Kanian agka nepeg ya ontakot ed siak,Tan agka nepeg a nadesdes ed siak.
8 Balet imparengel mod siak,On, lanang kon narerengel irayan salita,
9 ‘Malinis ak, anggapoy kasalanan ko;+Aliwa ak a marutak, anggapoy lingok.+
10 Balet say Dios et manaanap na rason pian sumpaen to ak:Ipapasen to ak a kabusol to.+
11 Iiyan to ray salik ed panangipangawan;Susukayan toy amin a dalan ko.’+
12 Balet nalilingo ka ed sayan imbagam, kanian ebatan ta ka:
Say Dios et atagtagey a maong nen say too.+
13 Akin et irereklamom so Dios?+
Kasin lapud agto eebatan so amin ya ibabagam?+
14 Say Dios et nansalitan aminsan tan amidua,Balet anggapoy mangiimano,
15 Diad sakey a kugip, diad sakey a pasingawey ed labi,+Sano masamsamit lay ugip na totooLegan iran nanaugip ed dukolan da.
16 Diad satan et lulukasan toy layag da+Tan ipupurek to* so bilin to ed sikara,
17 Pian ipaliis toy sakey a too ed mauges a kagagawa+Tan protektaan toy sakey a laki ed inkamapaatagey.+
18 Isasalba na Dios so bilay to manlapud abot,*+Say bilay to manlapud ipapatey diad panamegley na espada.*
19 Nipepetek met so too sano manliliknay sakit diad dukolan toTan sano ag-ontutunday panotot na saray pukel to,
20 Kanian makapadimlad sikato* so tinapay,Tan agto labalabay* anggan say mananam a naakan.+
21 Say laman to et manebeng lan manebeng,Tan saray pukel ton akaamot et mapatpatnag* la.
22 Sikatoy* manasingger lad abot;*Say bilay to et manasingger lad saramay managpatey.
23 No walay mensahero* parad sikato,Sakey ya onsusuporta manlapud sanlibo,A mangibagad too no antoy maptek,
24 Diad ontan, say Dios et mangipapatnag ed sikato na panangasi tan ibabaga to,‘Isalbam ed ilalasur tod abot!*+
Akaromog ak na panondon!+
25 Say laman to et magmaliw a malangwer* nen say laman na ugaw;+
Sikatoy ompawil ed saray agew na kaksilan to.’+
26 Sikatoy mikasi ed Dios,+ a mangawat ed sikato,Tan malikeliket ton nanengneng so lupa To,Tan ipawil To ed too so inkatunong To.
27 Sayan too et iyabawag* tod arum,‘Nankasalanan ak+ tan pinikewet ko so duga,Balet agko naawat no antoy manepeg ed siak.*
28 Dinondon to ak manlapud ilalasur ed abot,*+Tan say bilay ko et makanengneng na liwawa.’
29 On, amin iraya et gagawaen na DiosA mamidua odino mamitlo, parad too,
30 Pian sikatoy agwaten To ed abot,*Diad ontan et sikatoy nasinagan na liwawa na bilay.+
31 Imanom, Job! Dengel mo ak!Mandeen ka, ta ituloy koy mansalita.
32 No walay ibagam, ebat kad siak.Mansalita ka, ta labay kon paneknekan a duga ka.
33 No anggapoy ibagam, nepeg kan ondengel ed siak;Mandeen ka, ta ibangat kod sika so karunongan.”
Paimanod leksab
^ Literal, “Say dilak a kaibay ngalangalak.”
^ Literal, “iikdan toy tatak.”
^ Odino “lubok.”
^ Odino “armas.”
^ Odino “aglabalabay na kamarerwa to.”
^ Literal, “bilay to.”
^ Odino “akapaway.”
^ Odino “Say bilay to et.”
^ Odino “lubok.”
^ Odino “anghel.”
^ Odino “lubok.”
^ Odino “maabig.”
^ Literal, “ikansion.”
^ Odino posiblin, “Tan anggapoy agunggonak ed satan.”
^ Odino “lubok.”
^ Odino “lubok.”
