Job 39:1-30
39 “Amtam ta no kapigan manaanak iray atap a kanding?+
Abantayan mo la kasin nananak so ulsa?+
2 Bibilangen mo ta iray bulan a kaukolan dan palabasen?
Amtam ta no kapigan ira manaanak?
3 Akakebkeb ira sano iyaanak da ray kilaw da,Tan ontunda lay pampapasakit da.
4 Saray kilaw da et ombibiskeg tan ombabaleg diad uma;Onaalis ira tan agla ra ompapawil.
5 Siopay angibulos ed atap ya asno,+Tan siopay angukbar ed saray lubir na atap ya asno?
6 Say patar a desierto et ginawak ya abung toTan say maasin a dalin et ginawak ya ayaman to.
7 Eelekan toy gulo ed syudad;Agto narerengel iray eyag na managdagdag.
8 Sikatoy onliliber ed kapukdolan pian makalmo na pankabkaban,A manaanap na birdin tanaman.
9 Kasin say sakey a toro et mabulos to kan panlingkoran?+
Kasin mansanlabi diad kuwadram?*
10 Nabanlongan mo kasi ed panamegley na lubir so sakey a toro diad pambabakaan,Odino napatulok mo kasin manbaka* diad lawak?
11 Manmatalek ka kasi ed agaylan biskeg toTan paulyan mon gawaen toy ambelat a kimey mo?
12 Manilalo ka kasin isempet toy inanim,*Tan kasin tiponen to itan ed panag-ilikan mo?
13 Panliliketan na ostrits so pangikukulipaspas tod payak to,Balet kasin makapipara ed dulakak iray bago tan payak to?+
14 Ta ititilak tod dalin iray iknol to,Tan papepetangen to iratan diad dabok.
15 Nalilingwanan to ya ompan nagatinan iratan na totooOdino ompan gatin-gatinan na atap ya ayep.
16 Aliwliway panagtrato tod saray sibong to, a singano agto ra gawa;+Agnatatakot ya ompan anggapoy gunggona na pansasagpot to.
17 Ta insiblet ed sikato* na Dios so karunonganTan agto inikdan na pakatalos.
18 Balet sano onaalagey tan ikukulipaspas to ray payak to,Eelek-elekan toy kabayo tan say akalugan ed satan.
19 Kasin sikay mangiiter na biskeg ed kabayo?+
Kasin sasakbongan moy tenger to na ompapalasipas a buek?
20 Napaluksom kasi itan a singa sakey a duron?
Makapakebbiew so malastog a pampunges to.+
21 Sikatoy mankansag ed dalin diad lawak tan mabisbiskeg ton iyaatagey iray sali to;+Sikatoy manalibandos a paonlad guerra.*+
22 Eelekan to labat so takot tan anggapoy tatakotan to.+
Ag-ompupuliktar lapud espada.
23 Onkakalampag ed sikato so pananginan na pana,Mansasweng so gayang tan jabelin.
24 Sikatoy mapmaples ya onaabante,* a manggiwgiw ed liket,Agmakareen* sano ontatanol so tambuyog.
25 Sano papaknolen so tambuyog et ibabaga to, ‘Aha!’
Manlapud arawi et nasisingob toy guerraTan narerengel toy ikekelyaw na saray komandante tan say eyag parad guerra.+
26 Kasin lapud pakatalos mo kanian ontitikyab so falcon,Ya ibubuskag to ray payak to paarap ed abalaten?
27 Odino kasin lapud ganggan mo kanian ontitikyab a patagey so agila+Tan manggagaway ubong to diad tagey,+
28 A mamapalabas na labi diad kelas,Tan manaayam ed amotan to diad baleg a bato?*
29 Manlapu ditan et sikatoy manaanap na kanen to;+Saray mata to et akanengneng ed arawi.
30 Saray sibong to et mansusupsop na dala;Tan no iner so kawalaan na saray pinatey, wadman met.”+
Paimanod leksab
^ Odino “atotong mo.”
^ Odino “mansagar.”
^ Literal, “binim.”
^ Literal, “impailingwan ed sikato.”
^ Literal, “Satan et ompapaway a mangabet ed armas.”
^ Literal, “mangaakmon ed dalin.”
^ Odino posiblin, “Agto manisia.”
^ Literal, “diad ngipen na baleg a bato.”
