Job 29:1-25
29 Et intuloy nen Job so paliwawa* to, a kuan to:
2 “No makapawil ak labat komon ed apalabas iran bulan,Saramay agew sanen babantayan ak na Dios,
3 Sanen pasisindagen toy lamparaan to diad ulok,Sanen liliwawaan toy dalan ko no manaakar ak ed kabilungetan,+
4 Sanen wala ak nid kaksilan,Sanen say pikakaaro na Dios et nalilikna diad toldak,+
5 Sanen kaibak ni so Makapanyarin-amin,Sanen akapaliber ed siak iray ananak* ko,
6 Sanen saray dadakatan ko et napnapno na mantikilya,Tan saray bato et mangipapaagus na larak parad siak;+
7 Sanen oonla ak ed puerta na syudad+Tan onyuyurong ak diad plaza,+
8 Nanenengneng ak na saray kalangweran a lalaki tan onpipireg ira,*Tan anggan saray mamasiken et onaalagey tan mansiasiansian akaalagey.+
9 Saray prinsipe et ontutundan mansalita;Pepepetan day sangi ra.
10 Say boses na saray prominentin lalaki et agnarerengel;Say dila ra et ompepeket ed ngalangala ra.
11 Siopaman a makadngel ed siak et maong so ibabaga to nipaakar ed siak,Tan saramay makakanengneng ed siak et mantetestigo parad siak.
12 Ta ililiktar ko so mairap-bilay ya onkekerew na tulong,+Pati say ugaw ya ulilad ama tan siopaman ya anggapoy mananulong.+
13 Samay ngalngali la ompatey et bebendisyonan to ak,+Tan say puso na balon bii et napapaliket ko.+
14 Say inkatunong et isusulong kon singa kawes ko;Say inkahustisyak et singa ilalatop a kawes* tan turbante.
15 Nagmaliw ak a mata na bulagTan sali na piley.
16 Nagmaliw ak ya ama na mairap-bilay;+Iimbestigaan ko so kaso na saray agko kabat.+
17 Bebetagen ko ray panga na manggagaway mauges+Tan sasamsamen kod saray ngipen to so biktima to.
18 Ibabagak nensaman, ‘Wala ak ed dilin abung ko* no ompatey ak,+Tan saray agew ko et ondakel a singa saray buer ed dayat.
19 Saray lamot ko et onkayat ed saray danum,Tan sanlabin walay linaew ed saray sangak.
20 Say gloriak et lawas a napapasimbalo,Tan say pana ed limak et mantultuloy kon ikena.’
21 Saray totoo et madengedengel ed siak,Marendeen iran manaalagar ed simbawak.+
22 Kayarik a mansalita et anggapo lay ibaga ra;Saray salitak et makapaliket* ed layag da.
23 Manaalagar irad siak a singa ed isabi na uran;Saray salitak et iinumen da a singa unor ya uran.+
24 Sano iimisan ko ra, ag-ira makapanisia;Say liwawa na lupak so mamapaligen ed liknaan da.*
25 Bilang ulo ra et iwawanwan ko ra,Tan manbibilay ak a singa sakey ya ari diad limog na saray sundalo to,+Singa sakey a managligliwa ed saray maneermen.+
